စၠန်ထဝ် – ဗော်ဒဳမဵုကရေဇြဳကောန်ဂကူမန် (MNDF) ဂှ် ပြံၚ်သၠာဲ နဒဒှ်ယၟုတၟိ ဗော်ဒဳမဵုကရေဇြဳမန် (MDP) တုဲ ပတိုန်စၟတ်သမ္တီဗော်ရောၚ် ညးအုပ်ကာနာနာ အစာသဝ် မာံစောန်တၟး (MNDF) ဟီုရ။
ညးစၞးဗော်ၜါလပါ် ဗီုသၠာဲဂတးလိခ်တၚ်တုပ်စိုတ်ပံၚ်ဗော်ၜါ(Photo-IMNA)
သွက်သ္ဂောံ ပတိုန်စၟတ်သမ္တီဗော်ဂှ် ကမ္မတဳကေၚ်ကာဗဟဵု ဗော်ဒဳမဵုကရေဇြဳကောန်ဂကူမန်ၜါတၠ နာဲသဵုမျေအ် ကဵု နာဲလျးတၟးတံ တ္ၚဲဏံ (ဂိတု အေပရဴ ၂၃) သွက်သ္ဂောံအာ နေပျဳတဝ်တေံဂှ် စဳဇန်မံၚ်ရောၚ် ဂွံတီကေတ်ရ။
ပေဲါရုဲမာဲ သၞာံ ၂၀၁၀ ကၠာဟွံဂွံဒှ်တေံရ ရုဲစှ်လဝ် ယၟုဗော်တၟိဏံရောၚ်ဂှ် ဒုဥက္ကဌ (၂) ဗော်ဒဳမဵုကရေဇြဳကောန်ဂကူမန် နာဲတေန်အံၚ် (နာဲတၠနန်) ဟီုရ။
“ကၠာဗော်ဒဳမဵုကရေဇြဳအလုံရးမန် ဟွံဂွံပတန်ဗော်ညးတံရ ပိုဲတံ ရုဲစှ်လဝ် ယၟုဗော်တၟိဏံနွံရ၊ လၟုဟ် ပိုဲပတိုန်စၟတ်သမ္တီဗော်တုဲတှေ် ကာလပေဲါရုဲမာဲ သၞာံ ၂၀၁၅ ကၠာဟွံဂွံစိုပ် အခိၚ် ဗော်ၜါပံၚ်ညးသကအ် ၂၀၁၄ တေံမ္ဂး စၟတ်သမ္တီဗော်နွံမံၚ်သီုၜါဗော်တှေ် ပဵုတုဲဍေံပြေပြံၚ်ကၠုၚ်မာန်ဏောဝ်” သာ်ဝွံ နာဲတေန်အံၚ် ဆက်ဟီုရ။
ဗော်မန်ၜါ မဒှ်ဗော်ဒဳမဵုကရေဇြဳအလုံးရးမန် (AMDP) လုပ်ပြိုၚ်လဝ် ပေဲါရုဲမာဲ သၞာံ ၂၀၁၀ ကဵု ဗော်ဒဳမဵုကရေဇြဳကောန်ဂကူမန် (MNDF) လုပ်ပြိုၚ်လဝ်မာဲ ၁၉၉၀ တံ သၞာံ ၂၀၁၄ ဂိတုဒဳဇြေမ်ပါ စွံလက္ကရဴအိုတ်တုဲ မ္ဒးပံၚ်အာရောၚ်ဂှ် နူကနှေံဏံ (အေပရဴ ၂၂) ဂှ် ဖျေံလဝ်သ္ဂုတ်သွာတ်တုဲအာရ။
ဗော်ဒဳမဵုကရေဇြဳကောန်ဂကူမန် (MNDF) ဂှ်ဝွံ ပ္ဍဲသၞာံ ၁၉၈၈ ဂှ် စဒက်ပတန်ကၠုၚ်ဗော်တုဲ ပ္ဍဲသၞာံ ၁၉၉၀ ဂှ် နကဵုညးစၞး ၁၉ တၠ လုပ်ပြိုၚ်ပေဲါရုဲမာဲဂှ် ဇၞးလဝ် ၅ ဒၞာဲကီုလေဝ် ပ္ဍဲသၞာံ ၁၉၉၂ ဂှ် ဒးဒုၚ်ပလီုကၠုၚ်ယၟုဗော် နူလုပ်သၞောဝ်အလဵုအသဳရ။
0 Comments