မိလျးထဝ် – နူကဵုဂကောံရပ်လွဟ်တံၚ်ရပ်မၞိဟ်တံ ထပ်အာတ်မိက်လဝ်သြန် ကုၝောံမၞိဟ်အရာပ် ဍုၚ်ကျာ်ပိ ဒေသပယျဵုသေံကဵုဗၟာ မွဲဝါပၠန်ရောၚ် ဂွံတီနူ ၝောံမၞိဟ်အရာပ်ဍုၚ်ကျာ်ပိတံရ။
ၝောံမၞိဟ်ကွာန်အရာပ် (၃) ဥူအေကို ဟီုဂှ်တှေ် “ဍေံတံဆက်နၚ်ဖုၚ်တုဲ ယၟုဂကောံလေဝ် ဟွံလဴမွဲသာ်၊ သီုကဵုအာတ်မိက်မံၚ်သြန်ရ၊ ယဝ်ရဟွံကဵုတှေ် မွဲနဲမွဲဗီု ဒးဖန်ဏောၚ်ဂှ်လေဝ် ဘပဠလဝ်ရ၊ တုဲပၠန်ဂကောံတံဂှ် ဂကောံလုပ်ကဵုသၞောဝ်လေဝ်ဟွံသေၚ်ပုဟ်၊ နကဵုပိုဲလေဝ် ကဵုဟွံထေက်ပုဟ် ညာတ်ကေတ်ရ”
သၞာံတဲုဲကၠုၚ်တေံဂှ်လေဝ် ပရေၚ်အာတ်မိက်သြန် ကေၚ်နွံကၠုၚ်ကီုလေဝ် နကဵုညးတံဂှ် မွဲအလန်လေဝ် ဟွံကေၚ်ကဵုလဝ်တုဲ သၞာံဏံလေဝ် ကလေၚ်အာတ်ကၠုၚ်ပၠန်ရ သာ်ဝွံ ညးဆက်ဟီုရ။
ပ္ဍဲကဵုသၞာံ ၂၀၁၁ တေံဂှ်လေဝ် ဂကောံရပ်လွဟ်တံၚ်ရပ်မၞိဟ်တံကဵု ၝောံမၞိဟ်ကွာန် (၄) တၠတံ ကေၚ်ပညဳပညပ်လဝ်ညးသကအ် သွက်ဂွံကဵု သြန်အထံက်အဗၚ်ကဵု ဂကောံညးတံရ။ ဆဂးနကဵု လ္ပာ်ၝောံမၞိဟ်ကွာန်တံ ထ္ၜးကၠုၚ်ပြယာဲနာနာတုဲ သြန်အထံက်အဗၚ် အတိုၚ်ညးတံအာတ်မိက်လဝ်ဂှ် ဟွံဂွံကဵုဟဂှ်ရ သာ်ဝွံ ညးက္ဍိုက်ပ် ဂကောံရပ်လွဟ်တံၚ်ရပ်မၞိဟ် နာဲထောန် ဟီုရ။
“သွက်ဂကောံပိုဲတံ ဂွံစသုၚ်အာတုဲ ပိုဲထပ်အာတ်မိက်လဝ်သြန်အထံက်အဗၚ် လၟေၚ်သၞာံ သွက်သၞာံ ၂၀၁၂ ဏံ ကုၝောံမၞိဟ်အရာပ်တံရ လၟုဟ်လေဝ်ညးတံ ဟွံကလေၚ်နၚ်ပရိုၚ်ကဵုပိုဲဏီ” သာ်ဝွံ ညးဆက်ဟီုရ။
သၞာံလောန်ကၠုၚ်တေံဂှ် ၜိုန်ရနူဂကောံရပ်လွဟ်တံၚ်ရပ်မၞိဟ်တံ အာတ်မိက်ဒၟံၚ်သြန်အထံက်အဗၚ် ကုၝောံမၞိဟ်အရာပ်တံ ဗွဲမယဵုလ္ဂူကီုလေဝ် ၝောံမၞိဟ်အရာပ်တံ ဟွံကဵုဂှ်ရ လ္ထူဍုၚ်ကျာ်ပိဂှ်ဝွံ ပရေၚ်တံၚ်ရပ်မၞိဟ် အာတ်မိက်သြန်တံ က္တဵုဒှ်ကၠုၚ်ဒၟံၚ်မွဲနှေဟ်မွဲနှေဟ်ရ။
ပ္ဍဲဂိတုမေ လောန်ကၠုၚ်ဏံဂှ် နူကဵုဂကောံရပ်လွဟ်တံၚ်ရပ်မၞိဟ် ရ တၠ တံၚ်ရပ်ဏာကောန်ဍုၚ်ကျာ်ပိ ၄ တၠ တုဲ အာတ်မိက်လဝ်သြန်သေံ ၅ ဠက်ၜါတ်ကီုလေဝ် ဟိုတ်နူရဲဒးဒုၚ်ရပ်တံ ဒုၚ်ဂုဏ်လရိုဟ်ယာံ ကရေဝ်ကရောယ်မံၚ်တုဲ သြန်မုစိလေဝ်ဟွံကေတ် ကလေၚ်ဗလးဖျဴရ။
ဂကောံရပ်လွဟ်တံၚ်ရပ်မၞိဟ်ဝွံ နကဵုယၟု “ဂကောံကလေၚ်ဒက်ပတန်ဍုၚ်မန်” ကော်စရ။ ဂကောံဂှ်ဝွံ ပ္ဍဲသၞာံ၂၀၁၁ ဂိတုမေ ဂှ် စပတန်ကၠုၚ်လဝ်ရ။
0 Comments