မိလျးထဝ် – ဌာနပရေၚ်ပညာမန် (ဗဟဵု) တံ အာတ်မိက်လဝ် အလဵုအသဳ သွက်ဂွံဗတောန်အာလိက်မန် နဒဒှ်ဘာသာမွဲ အပ္ဋဲဘာတန်ဗတောန်အလဵုအသဳဂှ် အလဵုအသဳတံ တ္ၚဲသ္ၚိသဝ်၊ အဒိုက် ၜါတ္ၚဲဟေၚ် ကဵုအခေါၚ်ဗတောန်ရောၚ် ကမ္မတဳပညာဗဟဵု ဟီုရ။
ပ္ဍဲဂိတုဧပရာ ၁၁ လောန်ကၠုၚ်ဂှ် ဗော်ဍုၚ်မန်တၟိတံ ဆဵုဂဗသဳကၠဳကဵု ဝန်ဇၞော် ဂကောံပရေၚ်ၜိုဟ်လံ ဥူအံၚ်မေန်တုဲ စပ်ကဵုသွက်ဂွံဗတောန်လိက်မန် ပ္ဍဲဘာအလဵုအသဳဂှ် နူဌာနပရေၚ်ပညာ (ဗဟဵု) အ္စာၝောံ မိသာဍာ အာတ်မိက်ပတိုန်ထ္ၜးလဝ်တုဲ လ္ပာ်အလဵုအသဳတံ ကဵုကၠုၚ်အခေါၚ် ဗီုဂှ်ရ။
“ဆဂးနကဵုဌာနပရေၚ်ပညာတံဂှ်တှေ် ကမၠောန်ဏံဗီုလဵုပိုဲဂွံဆက်ကၠောန်အာဂွံဂှ် ပ္ဍဲကဵုအကြာဂိတုမေဏံ သွက်ဂွံကလေၚ်ပညဳကဵု လ္ပာ်အလဵုအသဳတံ နွံဒၟံၚ်ဏီ” သာ်ဝွံ ညးတာလျိုၚ် ကမ္မတဳပညာဗဟဵုမွဲတၠ ဟီုသည်။
သၞာံ ၁၉၉၅ အခိၚ်ဗော်ဍုၚ်မန်တၟိဒေံါပန်ပှော်ကၠာအိုတ်ဂှ် အကြာကောန်ဂကူမန် မပ္တံ ပွိုၚ်ဍုၚ်မတ်မလီု၊ ပွိုၚ်ဍုၚ်ကအ်ကြိက်၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်လှာဒကှ်၊ ပွိုၚ်ဍုၚ်ရေဝ်သၟဝ်ကျာ၊ ရေဝ်သၠုၚ်ကျာတံဂှ် ဘာပံၚ်နှာဲ (ဗတောန်လိက်မန်အပ္ဍဲဘာအလဵုအသဳ) နွံကၠုၚ် ၁၀၉ ဘာဟေၚ်ရ။
လၟုဟ်မ္ဂး နူဌာနပရေၚ်ပညာ (ဗဟဵု) တံ ရန်တၟံလဝ် သွက်သ္ဂောံလုပ်ဗတောန်လိက်မန် အပ္ဍဲဘာ အလဵုအသဳ (၄၀၀) ဒၞာဲနွံတုဲ၊ အပ္ဍဲပွိုၚ် (၃) သၞာံ သွက်ဂွံထမံက်အာရုပ်ရဴနွံရ။
ညးဆက်ဟီုဂှ် “စဳဇန်လဝ်ဂှ်တှေ် ပိုဲစထမံက်အာရုပ်ရဴ ပ္ဍဲသၞာံ ၂၀၁၂ ဏံရ၊ ပိုဲစဗတောန်အာ နူတန်ကောန်ၚာ်ဒဵုစိုပ်တန်မူလ (၄) တန်တုဲ လိက်သွက်ဂွံဗတောန်ကောန်ၚာ်တံဂှ် စပ်ကဵုလိက်ဗွဟ်မန်ဂှ်တှေ် နူဌာနပညာပတိတ်လဝ်ဂှ် ဗတောန်အာဏောၚ်”
အပ္ဍဲလိက် သွက်ဂွံဗတောန်ဂှ်မ္ဂး ပရူပရာ လိက်ဝၚ်၊ ကဗျ၊ ယေန်သၞာၚ်အခိုက်ကၞာ ကေုာံ ဗီုပြၚ်ဂွံ သုၚ်စောဲသဒ္ဒါ ကာလချူလိက် သာ်ဝွံ ကမ္မတဳပညာဗဟဵု ဆက်ဟီုရ။
တၚ်ရန်တၟံ ဌာနပရေၚ်ပညာ (ဗဟဵု) တံဂှ်မ္ဂး (၁) နကဵုဘာသာမန် ကေုာံယေန်သၞာၚ်မန်တံဂှ် သ္ပအဓိကတုဲ ညံၚ်သ္ဂောံထိၚ်ဒဝ်လွဳပရာအာ၊ (၂) ညံၚ်သၟတ်တံ ဂွံစိုတ်လုပ်စတုဲ သ္ဂောံဗှ်လ္ၚတ်အာလိက်မန်မာန်၊ (၃) ညံၚ်သ္ဂောံသုၚ်စောဲချူ သဒ္ဒါ ကေုာံ မအရေဝ်ဝေါဟာ ဗွဲမဍာံပြ၊ (၄) အတိုၚ်ဂွံလ္ၚတ်လဝ် နကဵုဘာသာတၞဟ်ဟ်တံတုဲ ညံၚ်ညးတၞဟ်ဂွံဗှ်ကေတ် နကဵုဘာသာမန်မာန်၊ (၅) ဘာသာဗၟာတံဂှ် ဂွံကၠိုဟ်ကေတ်ဗွဲမလောဲသွာ၊ (၆) ညံၚ်သ္ဂောံကတ်လ္ၚတ်ဂၠိုက်ဂၠာဲအာ လိက်ပတ်မန်တြေံတြဟ် ကေုာံ လိက်တၟအ်တံမာန်ကီု (၇) စပ်ကဵုလိက်မန်တုဲ ညံၚ်သ္ဂောံသ္ပအာ သုတေသနမာန်တံ ပါလုပ်ရ။
အ္စာၝောံ/ဘာဂှ် အာတ်ကေတ်အရီုဗၚ် အ္စာၝောံ/ဘာ ဥတုကညၚ်တံတုဲ ကွာန်ညးကဵုညး ဗတောန်အာရောၚ်။ အ္စာၝောံတံဂှ်လေဝ် နူကဵုဌာနပညာတံ သွက်ဂွံကဵုဘာနွံဒၟံၚ်တုဲ သီုကဵုဂွံလလောၚ်ကဵု ခမဳသၚ် ကေုာံ ဂကောံလိက်ပတ်ယေန်သၞာၚ်မန် အကြာကွာန်တံ ဆက်ထိၚ်ဒဝ်အာ လိက်ပတ်ယေန်သၞာၚ်မန်ကီုရ။
