ခတ္တာနန် – ဒုဂအုပ်ဗၠာဲသၟိၚ် ကျဝ်သွဲဃာၚ် ၜုၚ်တက် ကုမာံတိတ်ပါၚ်သဵု မဒှ်ကောန်ကွာန် ကွာန်ယိုက် ပွိုၚ်ဍုၚ်ၜါသွာၚ် မၞုံအာယုက် ၂၄ သၞာံဂှ်ရ အဝဲကာယ ဆောတ်ယောၚ် လီုလာ်တုဲ ဒးပတိုန်လဝ် ရုၚ်ဂဥုဲရောၚ် ဂွံတီကေတ်ရ။
-
- စရၚ်ညးဗလး ကေုာံ ညးဒးဒုၚ်ရပ်လဝ်တံ
-
- ဗီုမာံတိတ်ပါၚ်သဵု ညးဒးတိုန်ရုၚ်ဂဥုဲမတ်မလီု
-
- ဗီုမာံတိတ်ပါၚ်သဵု ညးဒးတိုန်ရုၚ်ဂဥုဲမတ်မလီု
-
- ဗီုမာံတိတ်ပါၚ်သဵု အဃောနွံမံၚ်ရုၚ်ဂဥုဲဍုၚ်မတ်မလီု(၂၈-၅-၂၀၁၂)
ဟိုတ်နူစောဲစပ်လဝ် ကုမာံတိတ်ပါၚ်သဵု ပါလုပ်ပ္ဍဲကိစ္စ အမှုမၞိဟ်ချိုတ် ဟိုတ်နူဒှ်သၞတုဲ ဟိုတ်နူဗၠာဲသၟိၚ်ဂှ် ၜုၚ်တက်လဝ်ဂှ်ရ သ္ပပ္တံနူဂိတုမေ ၁၉ ဂှ် ဒးပတိုန်လဝ် ရုၚ်ဂဥုဲ ဍုၚ်မတ်မလီုရ။
“အခိၚ်အဲအာကျောဝ် ပ္ဍဲရုၚ်ဂဥုဲဂှ်တှေ် တဲၜါလပါ် မုလေဝ် ချဳဟွံဂွံရပုဟ်။ ဒးလဝ်သီုက္ဍိုပ်၊ အတိုၚ်ညးတြုံဂှ် ဟီုတှေ် ဒးဒုၚ်ပျဲပျာံလဝ် ဟွံသာပုဟ်၊ နကဵုဍေံ မုလေဝ် ဟွံဆေၚ်ကဵုအမှုဏံပုဟ် ဍေံဟီုကဵုအဲ” သာ်ဝွံ အမာတ်ကၠတ်ထဝ်တွဵုရးမန် ဒံက်တာအံၚ်နာၚ်ဥူ ဟီုရ။
ဟိုတ်နူဒးဒုၚ်ၜုၚ်တက် ဗွဲမဂိသကေဝ်ဂှ်ရ ကိုပ်ကၠာဂှ် ဒးပတိုန်ဏာလဝ် ရုၚ်ဂဥုဲၜါသွာၚ်တုဲ နူရုၚ်ဂဥုဲဂှ် ကေတ်ဟွံမာန်ဂှ်ရ ဒးပတိုန်ဏာ ရုၚ်ဂဥုဲ ဍုၚ်မတ်မလီုရောၚ်ဂှ် နာဲအံၚ်နာၚ်ဥူ ဟီုရ။
ဆေၚ်စပ်ကဵု အမှုမၞိဟ်ချိုတ်ဏံတုဲ ကရောံ မာံတိတ်ပါၚ်သဵုဂှ် ကောန်ကွာန် ကွာန်ယိုက်၊ ကၟာမဵု ကေုာံ ဒံၚ်ဥ ၁၈ တၠတံလေဝ် ဒးဒုၚ်ရပ်တုဲ ကလေၚ်ဗလးကဵု ညးလ္ၚဵုတံရောၚ်ဂှ် ဂွံတီကေတ်ရ။
“နကဵုအဲ ၜိုတ်သ္ပမာန်ဂှ် ရီုဗၚ်အာဏောၚ်၊ ကိစ္စဏံ ပတိုန်ထ္ၜးလဝ် ဒဵုကဵုသကိုပ်ဝန်ဇၞော် တွဵုရးမန်ရ။ ဒးဟီုတှေ် ညးဍုၚ်ကွာန်တံ ဒးဒုၚ်မံၚ် ဗီုဏံဂှ် တန်တဴကဵု မၞိဟ်ဂွံလဝ် အဝဵုတံဏောၚ်၊ ဟိုတ်ဂှ်ရ အလဵုအသဳဂှ် ဒးရပ်စပ် ပရေၚ်ဏံ ဗိုန်ဗိုန်ဗတ်ဗတ်၊ ဒးဓမံက်ပတိတ်ကဵု ဒဒှ်ဍာံတုဲ ဒးကေတ်ကဵုအရေဝ် ထေက်ဏောၚ်” သာ်ဝွံ နာဲအံၚ်နာၚ်ဥူ ဟီုရ။
ဒုဂအုပ်ဗၠာဲသၟိၚ်ဂှ် မပ္တံကဵု ဂြောပ်မုက် ပတိုန်လတူကွဳလိုန်ဓါတ်တုဲ ဒဳဂေတ်ဂၠိုၚ်ဂၠိုၚ်ကဵုဝါကီု၊ ကၠေၚ်ဒက်လဝ်တဲ လပါ်လက္ကရဴတုဲ ဒက်လကဲလဝ် တၟံကီု၊ ဒက်ကွၚ်လဝ် နကဵုဇုက်ကီု၊ ဒစုက်ကဵု ပၟတ်ၜံက်ကီု၊ တက်ကဵုလေံဒုက်ကီု ဍဵုဍိုက်ပျဲပျာံ နာနာသာ်တုဲ စၟဳစၟတ်သၟာန်သၟာန်လဝ် မာံတိတ်ပါၚ်သဵုရောၚ် ဂွံတီကေတ်ရ။
နကဵုမိမ မာံတိတ်ပါၚ်သဵုလေဝ် ဂွံပံက်အမှု ပတိုန်ဒုဟ် ကေတ်အရေဝ်ကဵု ဒုဂအုပ်ဗၠာဲသၟိၚ်ဂှ် ဟွံဂံၚ်သ္ပမွဲသာ်တုဲ အာတ်လဝ် အရီုအဗၚ် ဒံက်တာအံၚ်နာၚ်ဥူ ကိစ္စဂဗုတ်ဏံရောၚ် ဂွံတီကေတ်ရ။
စၟတ်သမ္တီဗွဳဒဳယဵု
