မိလျးထဝ် – ဂကောံတံၚ်ရပ်မၞိဟ်အာတ်မိက်သြန်တံ ကော်ရပ်ဏာလဝ် မၞိဟ် ၄ တၠ လ္တူဍုပ်ကျာ်ပိဂှ် ပ္ဍဲစၟတ်တ္ၚဲမေ ၁၀ အခိၚ် သဝ်တ္ၚဲ ၄ နာဍဳပြၚ်ၚ်ဂှ် ကလေၚ်ဗၠးကၠုၚ်ယျရောၚ် ရဲဍုၚ်ကျာ်ပိတံ ဟီုရ။

“ဒးကဵုသြန်သေံ ၜါတ် ၄ ဠက်ဘာ်တုဲ နူကဵုဂကောံတံၚ်ရပ်မၞိဟ်တံ ကလေၚ်ဗၠးနၚ်ကဵု သီုမၞိဟ် ၄ ဂှ်ယျ” သာ်ဝွံ ရဲဍုၚ်ကျာ်ပိမွဲတၠ ဟီုရ။

ပ္ဍဲဂိတုမေ ၈ ဂှ်ဝွံ နူကဵုဂကောံတံၚ်ရပ်မၞိဟ် ရ တၠတံ တံၚ်ရပ်ဏာ ကောန်ဍုၚ်ကျာ်ပိ ၄ တၠတုဲ အာတ်မိက်လဝ်သြန်သေံ ၅ ကိုဋ် ၜါတ်ရ။

“ပ္ဍဲဍုၚ်ကျာ်ပိဏံဂှ် ကိစ္စတံၚ်ရပ်မၞိဟ်အာတ်မိက်သြန်ဏံဂှ် က္တဵုဒှ်ကၠုၚ်မံၚ် မွဲနှေဟ်မွဲနှေဟ်ရ ဆဂး ညးတာလျိုၚ်ဗၟာ လ္တူဍုၚ်ကျာ်ပိဏံဂှ် ပရေၚ်ဂီုကၠီုကီု၊ ပရေၚ်စဵုဒၞာကီု ညိလေဝ်ကေတ်ကဵုတာလျိုၚ်ဟွံမွဲ၊ လအ်ကၠုၚ်မ္ဂးတှေ် လ္တူဍုၚ်ကျာ်ပိဏံဂှ် မၞိဟ်ဂွံဂံၚ်မံၚ်ဂှ် ဍေံအောန်ကၠုၚ်မာန်ဏောၚ်” သာ်ဝွံ ညးတာလျိုၚ်ဂကောံလိက်ပတ်ယေန်သၞာၚ်မန် လ္တူဍုၚ်ကျာ်ပိမွဲတၠ ဟီုရ။

ဂကောံတံၚ်ရပ်မၞိဟ်အာတ်သြန်တံဏံဂှ် ပ္ဍဲသၞာံ၂၀၁၁၊ ဂိတုနဝ်ဝေမ်ဗာတေံဂှ်လေဝ် နကဵုဖုၚ်ကီု၊ သီုကဵုလိခ်ကီု ကေၚ်အာတ်မိက်လဝ်သြန်ကု ညးတၠပိုန်ဒြပ်၊ ညးတၠကၠအ်၊ ညးတၠကမၠောန်လ္တူဍုၚ်ကျာ်ပိနွံကၠုၚ်ရ။

“မၞိဟ်ပိုဲရပ်နၚ်တံဂှ် ဝါတ်ကျာတ် သြန်သွက်ဂွံကဵုပိုဲဂှ် ဂၠာဲဟွံဂွံ၊ ညးတံလေဝ် ဒုၚ်ဂုဏ် လရိုဟ်ယာံ ကရေဝ်ရောတ်မံၚ်တှေ် ပိုဲလေဝ် သြန်မုစိ ဟွံကေတ်တုဲ ကလေၚ်ဗလးဖျဴဏာရ” သာ်ဏံ နူဂကောံတံၚ်ရပ်မၞိဟ် နာဲထောန် ဟီုထ္ၜးကဵုရ။

ပ္ဍဲဂိတုနဝ်ဝေမ်ပါ ၂၂ သၞာံ ၂၀၁၁ လောန်ကၠုၚ်တေံဂှ်လေဝ် ရဲကၠအ်ထၜိုတ် ကောန်ဍုၚ်ကျာ်ပိ ၃ တၠဂှ် ဒးဒုၚ်တံၚ်ရပ်ဏာ ဘဲဂကောံရဲရပ်လွဟ်အာတ်သြန်တံ ကေၚ်က္တဵုဒှ်ကၠုၚ်နွံရ။

လ္တူဍုၚ်ကျာ်ပိဝွံ ဒပ်ပၞာန်ဗၟာ၊ ဒပ်ပၞာန်မၚ်ပယျဵု၊ ဒပ်ဗၠာဲသၟိၚ်၊ ဒပ်ပၞာန်မၚ်ကွာန် (ပြည်သူ့စစ်) တံ ကေတ်လဝ်တာလျိုၚ်ဂီုကၠီုအိုတ်တုဲ အပ္ဍဲပွဳပွူမ္ၚးဍုၚ်ဂှ် ဗော်ဍုၚ်မန်တၟိ၊ ဗော်သွးကောန်ဂကူကရေၚ် KNU၊ ဒဳကေဘဳအေ၊ ကံၚ်ဇြဳပရေၚ်ၜိုဟ်လလောမ်ကရေၚ်တံ ချဳဒရာၚ်ဒၟံၚ်နွံရ။