ဌာန်ပရိုၚ်ဗၠးၜးမန် – ကဝ်ပဝ်ရေရှေန် တိုပ်ဒေပ်တမ်ရိုဟ် ဇြဟတ်ဓါတ်လလဳပၟတ် ဍုၚ်ကြုက် CPI ဂှ် သွက်သ္ဂောံဆက်ကၠောန် ကိုန်စဳဇန်ကၟိုန်ၜဳဇီုဂှ် ဆက်ဂစာန်မံၚ်ဖိုဟ်ရောၚ်ဂှ် နူဂကောံကၟိုန်ဍာ်ဍုၚ်နာနာတံ သ္ပလဝ်ဒတန်ရောၚ်ဂှ် ဂကောံဆက်စၠောံပရေၚ်ဖောအ်ဗြေဝ်မၞိဟ် ကချေၚ် KDNG ဟီုရ။
 
နူကဵု CPI မသိုၚ်ခၞံမံၚ် ကၟိုန်ဍာ်ၜဳဇီု ဨရာဝတဳဏံ သွက်သ္ဂောံသ္ပကဵု တၚ်သ္ၚဳဂၠိပ် လတူကိုန်စဳဇန်ဏံဂှ် တိုက်ရိုက် အာတ်မိက်လဝ် ဂကောံဆိုက်ဗဒက်စဳကၠး ပရေၚ်ကၟိုန်ဍာ် ဍုၚ်နာနာရောၚ်ဂှ် နူဂကောံကဝ်မရှေန် ကိုန်စဳဇန် ကၟိုန်ဍာ်ဇၞော် ဍုၚ်နာနာ ICOLD သ္ပဒတန် လလောၚ်ပတိတ်လဝ် ပ္ဍဲစၟတ်တ္ၚဲ မေ ၃၀ ရောၚ် သာ်ဝွံ KDNG ပတိတ်လဝ် လိက်လလောၚ်တြး ပ္ဍဲဂိတုဂျုန် ၁ ဏံရ။
 
“ညးတံ ကယျာန်စးမံၚ် သွက်ဂွံဆုဲတိတ် နူဗွိုၚ်ကိုန်စဳဇန် ကၟိုန်ဍာ်ဏံရ။ လၟုဟ်လေဝ် ညးတံ ပတိုန်စောဒနာ လတူကိစ္စ လဇလဝ်ကၟိုန်ဍာ်ဏံတုဲ ကော်နၚ် တၠပညာ ဆက်ဗဒက်စဳကၠး ပရေၚ်ကၟိုန်ဍာ် မဆေၚ်စပ်ကဵု အလုံဂၠးကဝ်ယျ” သာ်ဝွံ သာၚ်မာၚ် နူဂကောံဆက်စၠောံ ပရေၚ်ဖောအ်ဗြေဝ်မၞိဟ် ကချေၚ် KDNG ဂှ် ဟီုရ။
 
ပ္ဍဲတၚ်လလောၚ်တြး ICOLD ဂှ် နကဵုညးတံ ပ္ဍဲကမၠောန် ကလေၚ်လ္ၚတ်သ္ၚဳဂၠိပ် ကိုန်စဳဇန်ကၟိုန်ၜဳဇီုဏံဂှ် ဟွံပါလုပ်တိုက်ရိုက်ရောၚ် ကယျာန်တးပဲါလဝ်တုဲ ဂကောံကၠောန်ဒၟံၚ်ကၟိုန်ဍာ် အဓိက CPI ဂှ်ဟေၚ် ဆက်ကၠောန်ဒၟံၚ် ကမၠောန်သ္ၚဳဂၠိပ် လတူကၟိုန်ဍာ်ဏံရောၚ်ဂှ် ဟီုသ္ဂးလဝ်ရ။
 
“ကဝ်ပဝ်ရေရှေန် တိုပ်ဒေပ် ဇြဟတ်ဓါတ်လလဳ ဍုၚ်ကြုက် CPI ဂှ် လတူကိစ္စ လဇလဝ်ကိုန်စဳဇန်ကၟိုန်ဍာ်ဏံတုဲ သ္ပစမံၚ်ပရေံဏောၚ်” သာ်ဝွံ သာၚ်မာၚ် ဟီုရ။
 
အဆက်ဖဵု ပရေံပရေံ မပ္တံကဵု ပရေၚ်ပိုန်ဒြပ်၊ ပရေၚ်မၞိဟ် ကေုာံ ပွဳူသဘာဝ မကတဵုဒှ်ကၠုၚ် ဟိုတ်နူကၟိုန်ဍာ်ဏံဂှ် ညးဍုၚ်ကွာန်တံ ဒှ်ဓဝိၚ် ဇၞော်ကဵုဇြဟတ်တုဲ နူအလဵုအသဳဗၟာဂှ် ဟိုတ်နူ“ဆန္ဒညးဍုၚ်ကွာန်” ရောၚ် သ္ဂးတုဲ လဇထောံ ကိုန်စဳဇန်ကၟိုန်ဍာ်ၜဳဇီု ပ္ဍဲဂိတုသေပ်တေမ်ပါ သၞာံအာတေံရ။
 
ၜိုန်ဂှ်လေဝ် ကိုန်စဳဇန်ကၟိုန်ဍာ်ဏံဂှ် ပရေၚ်ဂီုကၠီု နွံပေၚ်ပေၚ်တုဲ ဂုဏ်ဖဵုနွံ ဗွဲမဂၠိုၚ်ရောၚ်ဂှ် သွက်သ္ဂောံထ္ၜးသက်သဳ နကဵု ICOLD ကလေၚ်လုပ်ကၠောန်မံၚ် ပ္ဍဲကမၠောန်ကလေၚ်သ္ၚဳဂၠိပ်ရောၚ်ဂှ် ပ္ဍဲဌာနဌာန်ပရိုၚ်ကြုက် ဓမံက်ထ္ၜးလဝ်ရောၚ်ဂှ်လေဝ် KDNG ဟီုဂးလဝ်ရ။
 
ၜိုန်ရလဇလဝ် ကိုန်စဳဇန်ကၟိုန်ၜဳဇီုကီုလေဝ် ဆက်ကၠောန်မံၚ် ကမၠောန်စန်ဒက်ဆဝ်မ္ၚုဟ် ကိုန်စဳဇန်ဏံတုဲ နူဗွိုၚ်ကိုန်စဳဇန်ဏံ ပွမသီရုပ်ထောံ စက်ယန်၊ ကောန်ကမၠောန်တံ ဟွံမွဲဏီရောၚ်ဂှ်လေဝ် ချူလဝ် ပ္ဍဲလိက်လလောၚ်တြးဂှ်ရ။
 
တုပ်တဴသာ်ဂှ်ကီု အလဵုအသဳဗၟာဂှ်လေဝ် ဟွံကဵုအခေါၚ် ကလေၚ်ဖျေံဒၞာဲဝဲါတြေံ ကုကောန်ကွာန် ဒးဒုၚ်ပြံၚ်ဆုဲလဝ် ဟိုတ်နူကိုန်စဳဇန်ကၟိုန်ဍာ်ဏံဏီတုဲ ကောန်ကွာန်တံဂှ်လေဝ် အကာဲအရာ ကိုန်စဳဇန်ဏံဂှ် ဟွံချိုတ်ပၠိုတ်ဏီဂှ်ရ ဒှ်မံၚ်သံသယ ဇၟော်ကဵုဇြဟတ်ဖိုဟ်ရ။
 
ကုမ္ပဏဳ CPI ဂှ် သွက်သ္ဂောံသွံပတိတ် ဇြဟတ်ဓါတ်လလဳ ကုဍုၚ်ကြုက်တုဲ လတူၜဳဨရာဝတဳ ကေုာံ ကၞာၚ်ဗၠိုၚ်ၜဳ မၞုံအပ္ဍဲတွဵုရးကချေၚ် မကတဵုဒှ်မံၚ် ပေဲါပၞာန်အပ္ဍဲဍုၚ်တံဂှ် သိုၚ်ခၞံမံၚ် ကၟိုန်ဍာ် ရ ရ။
 
ဂကောံကဝ်မရှေန် ကိုန်စဳဇန်ကၟိုန်ဍာ်ဇၞော် ဍုၚ်နာနာ ICOLD ဂှ် ဒက်ပ္တန်လဝ် နကဵုကောန်ဂကောံဍုၚ် ၉၅ ဍုၚ်တုဲ ကုမ္ပဏဳဓါတ်လလဳဇြဟတ်ဍာ်တံလေဝ် ပါလုပ်ကီုရ။