နာဲမာန် – ဂိတု အဝ်ဂါတ် သၞာံ ၂၀၁၂ ဏံမ္ဂး ကွဳလိုန်ဓါတ် ဟွံမွဲကဵုလာၚ်ဇြေန်တအ်ဂှ် ရပ်ဂွံမ္ဂး နကဵုသၞောဝ်ဥပဒေ ကေတ်အာအရေဝ်ရောၚ်တုဲ ကွဳလိုန်ဓါတ် ဟွံဂွံကၠောန်လဝ်လာၚ်ဇြေန်တံ စပ္တံ နူလၟုဟ် ညံၚ်ဂွံအာကၠောန်လာၚ်ဇြေန် ပ္ဍဲရုၚ် (ကညန) မတ်မလီုညိဂှ် နူကဵုသွာၚ် ကောပ်ကာဲစက်ယာဉ် ဍုၚ်မတ်မလီုတံ ဗက်လလောၚ်ဒၟံၚ် နကဵုစက်သၠဲရမျှာၚ်ရ။
အဃောကၠောန်ကဵုမံၚ် ကွဳလိုန်ဓါတ် ဟွံမွဲကဵုလာၚ်ဇြေန် လ္တူဍုၚ်မတ်မလီု သၞာံ ၂၀၀၈ တေံ
အစဳအဇန် ကၠောန်လာၚ်ဇြေန် ကွဳလိုန်ဓါတ်ဂှ် စပ္တံနူဂိတုဂျောန် တုဲကၠုၚ်တေံတုဲ ကၠောန်ဒၟံၚ် ဒဵုတ္ၚဲဏံရ။ ၚုဟ်မး လာၚ်ဇြေန်ဂှ် တန်တဴကဵု သက္ကရာဇ်ကွဳလိုန်ဓါတ် သၠုၚ်သဝ်ရ။
ပ္ဍဲကဵုတွဵုရးဍုၚ်မန်ဝွံ လ္တူဍုၚ်မတ်မလီုဂှ် ကၠောန်ဒၟံၚ်လာၚ်ဇြေန်ကွဳလိုန်ဓါတ် အရိုဟ်ဒဒှ်တ္ၚဲတုဲ လၟိဟ်ကၠောန်လာၚ်ဇြေန် ကွဳလိုန်ဓါတ် လ္တူဍုၚ်မတ်မလီုဂှ် ဂၠိုၚ်အိုတ်ရ။ လၟိဟ်ကၠောန်လာၚ်ဇြေန် ပွိုၚ်ဍုၚ်ဒုတိယဂှ် ဒှ်ပွိုၚ်ဍုၚ်ဇြပ်ဗုရ။ နကဵု စရၚ်အလဵုအသဳတံ ဓမံက်လဝ် ဂိတုအဝ်ဂေတ် တုဲကၠုၚ်တေံမ္ဂး ပွိုၚ်ဍုၚ်မတ်မလီု၊ ပွိုၚ်ဍုၚ်သဓီု၊ ပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်မုဟ်ဍုၚ် ကဵု ပွိုၚ်ဍုၚ်ရေဝ်ဂှ် လၟိဟ် (၁၆၈၁၇) ဖ္ဍိုက် ကၠောန်ဏာ လာၚ်ဇြေန် တုဲဒှ်အာတုဲ ဂွံသြန်အကံက်အခေါန်ဘဏ္ဍာ လၟိဟ် (၄၂၇.၈၆၃) ပြကောတိကိုဋ်ဒကေဝ် တုဲဒှ်အာရ။
ညးမဆေၚ်စပ်ဒၟံၚ်ကဵု ဂကောံရပ်လွဟ် ပရေၚ်ၜိုဟ်လလမ်ဂကူမန် ကေုာံ ကရေၚ်ဂှ် ညးလျိုၚ် ဗွိုၚ်အပ္ဍဲဍုၚ်ညးတံ ကၠောန်ပ္တိတ်လဝ် လိက်ထံက်ဂလာန် ဆေၚ်ကဵုကွဳစက် ကွဳလိုန်ဓါတ်ဂကောံညးတံ နွံမံၚ်ကီုတုဲ ဆေၚ်စပ်ကဵု ကွဳလိုန်ဓါတ်ဂှ် နူဗော်ဍုၚ်မန်တၟိဂှ် ညးတာလျိုၚ် ဗွိုၚ်အပ္ဍဲဍုၚ်မွဲတၠ ဟီုဂှ် “ ကွဳလိုန်ဓါတ်လာၚ်ဇြေန်ဟွံမွဲ အလဵုအသဳ ရပ်ဏောဝ်ဟီုဂှ် ညးတံ ကဵုလဝ်ပရိုၚ်ကဵု ပိုဲကီုရ၊ ရဲဂကောံပိုဲတံ ရဲရပ်လဝ် လိက်ထံက်ဂလာန်ဗော်ပိုဲတှေ် ပိုဲအာတ်လဝ် အလဵုအသဳရ ညးတံလေဝ်ဟီုလဝ်ကဵုပိုဲ ရဲဂကောံတံတှေ် ညးတံ ပဲါကဵုရောၚ် ဟီုလဝ်ရ” သာ်ဏံ ညးတာလျိုၚ်ရုၚ်ဆက်ဆောံဍုၚ်ဇြပ်ဗု နာဲမန်ဆာန် ဟီုထ္ၜးရ။
နူကဵု အလဵုအသဳတိုန်တၟိတုဲ ပရေၚ်ကၠောန်လာၚ်ဇြေန်ကွဳလိုန်ဓါတ်ဝွံ ကၠောန်ဒၟံၚ်လၟုဟ်ဂှ် ဒှ်အလန်ကိုပ်ကၠာ အိုတ်တုဲ ညးကၠောန်လာၚ်ဇြေန်ကွဳလိုန်ဓါတ်တံလေဝ် ဆိုအ်ပေၚ်ဒၟံၚ် ပ္ဍဲရုၚ်ကၠောန်လာၚ်ဇြေန်ကွဳလိုန်ဓါတ်တံ ဇၟာပ်ပွိုၚ်ဍုၚ်ရ။
“ကၠောန်လာၚ်ဇြေန်ကွဳလိုန်ဓါတ် ၜိုန်ရ ဒးကၠောန်ကဵုသၠဲကီုရလေဝ် ယဝ်ရ ကွဳဇကု ဇကုကၠောန်ကေတ်တ် ဟွံလိၚ် ကော် ရဲစအကြာ (ပွဲစား) မ္ဂးတှေ် ဒးမၚ်ၜေတ်အိုတ် အခိၚ်ကွေံကွေံ မွဲတဲရောၚ်၊ ဒးဒုၚ်ဒဒိုက် ကွေံကွေံတုဲမှ ဂွံကၠောန်လာၚ်ဇြေန်ဂှ်ရောၚ်” သာ်ဏံ ညးကၠောန်လာၚ်ဇြေန် လ္တူဍုၚ်မုဟ်ဍုၚ်မွဲတၠ ဟီုရ။
