ဌာန်ပရိုၚ်ဗၠးၜးမန် – ပ္ဍဲဒေသဓညဝတဳ၊ သုဝဏ္ဏဘုံ (သဓီု) တံဂှ် ဂကူပျူတံ ပ္တန်ကၠုၚ်ဍုၚ်တုဲ သ္ပဒတဴမံၚ်စံၚ်ကၠုၚ်ရောၚ်ဂှ် ပ္ဍဲလိက်ပရိုၚ်အလဵုအသဳဗၟာ (ကြေးမုံ) ချူကၠုၚ်လဝ် ပ္ဍဲစၟတ်တ္ၚဲ အံက်တဝ်ပါ ၁၂ ဂှ်တုဲ ပွမချူသာ်ဏံဂှ် ဇီုကပိုက်ကဵု ပရေၚ်ညဳသၟဟ်ကောန်ဍုၚ်အရၚ်ဏောၚ်ဂှ် တၠပညာဝၚ် ကောန်ဂကူမန်တံ ထံက်ထ္ၜးအိုတ်ရ။
ဓညဝတဳဂှ် မဒှ်အာဲကၟာဲတြေံ ဂကူယခေၚ်တံတုဲ သုဝဏ္ဏဘုံ ကော် သဓီုဂှ်လေဝ် မဒှ်ဍုၚ်နန် ဂကူမန်တံဂှ်ရ ပွမချူသာ်ဝွံဂှ် ဒစဵုဒစးမံၚ်ကဵု ပရေၚ်ညဳသၟဟ်ကောန်ဍုၚ်အရၚ်ရောၚ် မမိက်သ္ဂးရ။
“နူကဵုလညာတ် ပျူလေဝ်ဗၟာ၊ ဗၟာလေဝ်ပျူဂှ် လၟုဟ် ဒေသတကံၚ်၊ ဟာန်လေန်၊ ဗဳသၞု၊ သရေခေတ္တရာသၟး ဟွံသေၚ်ရပုဟ်၊ ဍုၚ်သဓီု ဂကူမန်၊ ဍုၚ်ဓညဝတဳ ဂကူယခေၚ်တံဂှ်လေဝ် ဂြဲပၠုပ်ဏာဍုၚ်ပျူပၠန်ရ” သာ်ဝွံ နာဲမိုၚ်တဝ် မဒှ်သကိုပ်စၞောန်ပ္ညုၚ်(တြေံ) ဌာနထိၚ်ဒဝ်တၚ်သမ္တီကောန်ဂကူဂှ် ဟီုရ။
ပ္ဍဲလိက်တၟံ စေတဳမြ ရာဇကုမာရ်ဂှ် ဂွံဆဵုကေတ် လချူအက္ခရ်ပျူ လက္ကရဴအိုတ်ကဵု အက္ခရ်ဗၟာ ကိုပ်ကၠာအိုတ် မွဲစွံရောၚ်ဂှ်လေဝ် ညးထံက်ထ္ၜးဏာရ။
ဟိုတ်ဂှ်ရ သွက်သ္ဂောံထိၚ်ဒဝ် ဓမံက်ထ္ၜး ဝၚ်မန်ဂှ် ခမဳသၚ်မန်ဂမၠိုၚ်၊ ဗော်ပရေၚ်ဍုၚ်ကွာန်မန်ဂမၠိုၚ် ကေုာံ ဂကောံမဟာဇန်မန်ဂမၠိုၚ်တံ ပံၚ်ကောံပါလုပ် ဒက်ပ္တန်ကၠုၚ် ဂကောံသုတေသနဝၚ်မန် ပ္ဍဲကွာန်ကၟာဝက်၊ ပွိုၚ်ဍုၚ်မုဟ်ဍုၚ် ပ္ဍဲစၟတ်တ္ၚဲအံက်တဝ်ပါ ၂၂ ရောၚ်ဂှ် ဒံက်တာမေန်ကျဳဝေန် ကော် အာစာသဝ်ဟံၚ်ဍုၚ် မဒှ်ကောန်ဂကောံ သုတေသနဝၚ်မန်ဂှ် ဟီုရ။
“ပိုဲဂှ် ပါလုပ် နူကဵုဂကောံပံၚ်ကောံလိက်ပတ်ယေန်သၞာၚ်မန်။ ပ္ဍဲပေဲါဗှ်လိက်ခၞံ ဒံက်တာချေတ်ဇြာန်ဝေန်တံဂှ် နကဵုတၠပညာမန်တံ ဂၠာဲအာနဲကဲ သွက်သ္ဂောံဂွံအခေါၚ်ဗှ် ပရူဍုၚ်သၟိၚ်မန် သုဝဏ္ဏဘုံဏောဝ်” သာ်ဝွံ ညးဆက်ဟီုရ။
နကဵုပရေၚ်အထံက်အပၚ် ဗာန် (တိုက်သြန်) ထောန်ဖံၚ်ဒေရှေန် ကၠောန်ဗဒှ် ပေဲါဗှ်လိက်ခၞံ “ဂကူပျူ ကေုာံ ကၟိန်ဍုၚ်ပျူ” နူဂိတုအံက်တဝ်ပါ ၁၆ စဵုကဵု ၁၈ ပ္ဍဲဍုၚ်လ္ဂုၚ်ရောၚ် မဒှ်တုဲ လိက်ခၞံ မချူလဝ် ပရေၚ်ဂကူပျူ ကဏ္ဍစုၚ်လေၚ် ပါလုပ် ၄၀ စံၚ်ရ။ ပ္ဍဲဂှ် လိက်ခၞံဗီုရုပ် ရ၀၀ ပြၚ် ပါလုပ်မွဲစံၚ်၊ လိက်စံၚ်ဘာသာအၚ်္ဂလိက် ၄ စံၚ်လေဝ် ပါလုပ်ကီုရောၚ်ဂှ် ဓမံက်ထ္ၜးလဝ် ပ္ဍဲလိက်ပရိုၚ်ဗၟာ (ကြေးမုံ) ဂှ်ကီုရ။
တုပ်တဴသာ်ဂှ်ကီု ပ္ဍဲဂိတုနဝ်ဝေမ်ပါ ၃၊ ၄ ဂှ်လေဝ် နူတက္ကသိုလ်မတ်မလီု ဍိုက်က္ဍိုပ်တုဲ ကၠောန်ဗဒှ်အာ ပေဲါဗှ်လိက်ခၞံ “သုဝဏ္ဏဘုံ” ပ္ဍဲၝောံဗဒမ်ဇၞော် ဍုၚ်မတ်မလီု တွဵုရးမန်ရောၚ်ဂှ် လလောၚ်လဝ်ပရိုၚ်ရ။
