မာံသုတ – ခြာဟွံလအ် ကၠောန်ဗဒှ် ပေဲါကောံဆဵုဂဗသဳကၠဳ (Forum) သၟတ်မွဲရောၚ် မဒှ်တုဲ ညးစၞးသၟတ် နူစှ်ပွိုၚ်ဍုၚ်တံ တိုန်စိုပ်ရောၚ်ဂှ် ဂွံတီကေတ် နူညးဍိုက်က္ဍိုပ် ကၠောန်ဗဒှ်ရ။
ပေဲါကောံဆဵုဂဗသဳကၠဳဝွံ ပ္ဍဲဂိတုနဝ်ဝေမ်ပါ ၂၉-၃၀ ဂှ် ကၠောန်ဗဒှ် ပ္ဍဲဘာကျာ်သၚ်ခရေတ် Holy Family Church ဍုၚ်မတ်မလီုရောၚ်ဂှ်
ညးလျိုၚ်လလောၚ်ပရိုၚ် ကေုာံ ဆက်စၠောံ ဂကောံ (ပွၚ့်လၚ်းကွန်ရက်) တွဵုရးမန် မာံကျဳဇြဝ်လွေန် ဟီုရ။
ပ္ဍဲပေဲါကောံဆဵုဂဗသဳကၠဳ မကၠောန်သ္ပလၟုဟ်ဏံဂှ် နူဌာန်ကောံသၟတ်မန် Mon Youth Forum ပါလုပ် ၁၂ တၠတုဲ မွဲပွိုၚ်ဍုၚ် ၁၀ တၠ၊ သီုဖအိုတ် လၟိဟ်သၟတ် အကြာ ၁၅၀ ကဵု ၂၀၀ တိုန်စိုပ်ရောၚ်ဂှ် ဆိၚ်ဆကေတ်လဝ်ရ။
ပ္ဍဲပေဲါကောံဆဵုဂဗသဳကၠဳဏံဂှ် သဳကၠဳအာ မပ္တံ ပရေၚ်ပညာ၊ ပရေၚ်ထတ်ယုက်၊ ပရေၚ်ကောန်ဍုၚ်အရၚ်၊ ပရေၚ်ဒဳမဝ်ကရေဇြဳ၊ အခေါၚ်အရာမၞိဟ်၊ သၟတ်ကေုာံ နဲပညာ၊ သၟတ်ကေုာံ မဳဒဳယျာ မဆေၚ်စပ်ကဵုသၟတ် ၁၁ ကဏ္ဍရောၚ် ဂွံတီကေတ်ရ။
တုပ်တဴသာ်ဏံဂှ်ကီု ပေဲါကောံဆဵုဂဗသဳကၠဳ သၟတ်ယခေၚ် ဍုၚ်သေတ်တိုဲဂှ် ကၠောန်ဗဒှ်ဏာ ပ္ဍဲဂိတုနဝ်ဝေမ်ပါ ၂၁ ဏံတုဲ ပ္ဍဲဍုၚ်လ္ဂုၚ်ဂှ် ကၠောန်ဗဒှ် ပ္ဍဲစၟတ်တ္ၚဲ ၂၄၊ ၂၅ ရောၚ် ဂွံတီကေတ်ရ။
သအာၚ်နူဂှ်ပၠန် ပေဲါကောံဆဵုဂဗသဳကၠဳသၟတ် အလုံတွဵုရးယခေၚ်ဂှ် ကၠောန်သ္ပပ္ဍဲဂိတုဒဳဇြေမ်ပါ ပထမသတ္တဟရောၚ်ဂှ် သၟတ်ယခေၚ် ဍိုက်က္ဍိုပ်ကၠောန်ဗဒှ်မွဲတၠ ဟီုရ။
“စိုပ်သၞာံ ၂၀၁၄ ဏံ ဍုၚ်ပိုဲကေတ်တာလျိုၚ် ဥက္ကဋ္ဌ အာဇြဳယာန်တှေ် ကောံဓရီုသၟတ် အာဇြဳယာန်လေဝ် ဒှ်ကၠုၚ်ဏောၚ်၊ ဟိုတ်ဂှ်ရ ပရဟ်ဇိုၚ်တဲတုဲ ပ္ဍဲဂိတုဒဳဇြေမ်ပါဏံ သွက်ဂွံကၠောန် ပေဲါကောံဆဵုဂဗသဳကၠဳသၟတ် အလုံကၟိန်ဍုၚ်ဗၟာ Myanmar Youth Forum ဂှ် ဖျေံလဝ်အစဳအဇန်နွံ” သာ်ဝွံ မာံကျဳဇြဝ်လွေန် ဟီုရ။
ပေဲါကောံဆဵုဂဗသဳကၠဳသၟတ် အလုံကၟိန်ဍုၚ်ဗၟာ ဂိတုဒဳဇြေမ်ပါဏံဂှ် စဳဇန်လဝ် သွက်ဂွံကၠောန်ဗဒှ်အာ နကဵုညးစၞး ရုဲစှ်ပတိုန်နၚ် နူပေဲါကောံဆဵုဂဗသဳကၠဳသၟတ် ရး၊ တွဵုရးတံရောၚ်ဂှ် ဂွံတီကေတ်ရ။