မာံသုတ – နူဂိတုနဝ်ဝေမ်ပါ ၁၁ စဵု ၁၃ ဂှ် ဂကောံကွးဘာ ၈၈ နာဲမေန်ကိုဝ်နာၚ် ဍိုက်က္ဍိုပ်တံ အာစိုပ်ဆဵုဂဗသ္ပပေဲါသဳကၠဳ ကုညးဍုၚ်ကွာန် ပ္ဍဲဍုၚ်ရေဝ်တုဲ နူပွိုၚ်ဍုၚ်ရေဝ် ဒုၚ်တၠုၚ်ညးတံ ဂြုဂြုဂြီုဂြီုရောၚ် ဂွံတီကေတ်ရ။
ဂကောံကွးဘာ ၈၈ တံ ဗိုက်လတက်လဝ်ကယျိုၚ်မန်
“ညံၚ်ရဴလုပ်မံၚ်ပေဲါဗတိုက် နနဲပရေၚ်ဍုၚ်ကွာန် ပ္ဍဲကၠတ်ထဝ်ဂှ်ကီု ဂကောံမဟာဇန် မပ္တံကဵု ခမဳသၚ်၊ ကွးဘာသၟတ်၊ ညးဒုၚ်ကာ အလဵုအသဳ မၞုံမ္ၚးကၠတ်ထဝ်တံဂှ်လေဝ် ဇြဟတ်ညံၚ်ဂွံခိုဟ်ကၠုၚ်ဂှ် ပၟိက်ဇၞော်မံၚ်ဏောၚ် က္ဍိုပ်သကိုပ်ကွးဘာတံ သောၚ်ကလးဏာ” သာ်ဝွံ နာဲမေန်မေန်နဲ ဟီုရ။
ပ္ဍဲဂိတုနဝ်ဝေမ်ပါ ၁၁ အခိၚ်ဗ္တံဂှ် ဂကောံကွးဘာ ၈၈ တံ စိုပ်ကၠုၚ်ဍုၚ်ရေဝ်တုဲ ပ္ဍဲဇြပ်သဘၚ်ဓရ် ဍုၚ်ရေဝ်ကီု၊ ပ္ဍဲစၟတ်တ္ၚဲ ၁၂ လဒေါဝ်တ္ၚဲဂှ် ပ္ဍဲကွာန်အစေၚ် ပါၚ်ၜဳကီု၊ ပ္ဍဲစၟတ်တ္ၚဲ ၁၃ လဒေါဝ်တ္ၚဲဂှ် ပ္ဍဲဍုၚ်လၟိုၚ်ကီု သ္ပပေဲါဟီုတွံတုဲ ဇူဒီုပ္ဍဲကွာန်ကၟာဝက် မဒှ်ဇာတိ နာဲမေန်ဇေယျတံရ။
ရဲကွာန်အစေန်တံ ဗီုဒုၚ်တၠုၚ်မံၚ် ဂြုဂြုဂြီုဂြီု
နကဵုဂကောံမဟာဇန် Civil Society ဂမၠိုၚ် ပရေၚ်ဒဒှ် ကတဵုဒှ်မံၚ် ပ္ဍဲဒေသဇကု မပ္တံကဵု ပရေၚ်အဓမ္မ အလဵုအသဳတံကီု၊ ပရေၚ်ဘပဠတံကီု ဓမံက်ဟီုထ္ၜးကဵု မဳဒဳယျာ မွဲကဆံၚ်ညိဂှ် က္ဍိုပ်သကိုပ်ကွးဘာတံ ဗတိုက်ဖအောဝ်လဝ်ကီုရောၚ် ဂွံတီကေတ်ရ။
တရဴပရေၚ်စန်ဒက် ဂကောံကွးဘာ ၈၈ တံဂှ် စပ္တံနူဂိတုနဝ်ဝေမ်ပါ ၉ တုဲ သွက်ဂွံဓမံက်ရုပ်ရဴ ပရေၚ်ၜိုဟ်လလမ်ကေုာံ ပရေၚ်ပခိုၚ်ဇြဟတ် ဂကောံပြဝါမၞိဟ်တၟးဖ္ဍးဂှ် ဟီုတွံကၠုၚ် ပ္ဍဲပွိုၚ်ဍုၚ်ၜဳကလေၚ်၊ ကျာ်ထဝ်၊ သဓီု၊ ပံၚ်၊ မတ်မလီု၊ ကျာ်မြဟ်၊ မုဟ်ဍုၚ် ကေုာံ ဇြပ်ဗုတံတုဲရ။
