ဌာန်ပရိုၚ်ဗၠးၜးမန် – စပ်ကဵုကောံဓရီု ကမ္မတဳဗဟဵုလၟိုန် ဗော်သွးကောန်ဂကူကရေၚ် (KNU) မကၠောန်ဗဒှ် ပွိုၚ်ပိသတ္တဟတုဲ နူတနိတေံ KNU ပတိတ်လိက်လလောၚ်တြးမွဲတၞးရ။
ကောံဓရီုဂှ်ဝွံ နူအံက်တဝ်ပါ ၁၃ စဵုစိုပ်နဝ်ဝေမ်ပါ ၂၀ ကၠောန်ဗဒှ်ကၠုၚ် ပ္ဍဲခရိုၚ်ဘာအၚ် တိဍာ် KNU ရ။
“သ္ဂုတ်သွာတ်၊ လစွံစိုတ် နူကောံဓရီုလၟေၚ်ဍာံ ကမ္မတဳဗဟဵုပိုဲဏံဂှ် ထေက်ကဵုအလုံဍုၚ်မွဲတီဏောၚ် စှေ်စိုတ်တုဲ ပိုဲပတိတ်၊ တုဲပၠန် မိက်ဂွံကဵု ကောန်ဂကူကရေၚ်ပိုဲတံ တီတုဲ ပိုဲပတိတ်လိက်လလောၚ်တြးဏံ” သာ်ဝွံ ကမ္မတဳဗဟဵု KNU ဖဒဵုမာန်ညိၚ်မိုၚ် ဟီုရ။
က္ဍိုပ်သကိုပ်ကဆံၚ်လတူ ၃ တၠ မပါလုပ်သီု ညးဍိုက်က္ဍိုပ်ပၞာန်တံဂှ်လေဝ် ပ္ဍဲဂိတုအံက်တဝ်ပါ ၂၅ ဂှ် နူဗဟဵု KNU ကလေၚ်ခါန်ကၞက်ကဵု တာလျိုၚ်တြေံရ။
KNU ဂှ် သွက်ဂွံကလေၚ်ရုဲစှ် က္ဍိုပ်သကိုပ်တၟိ မွဲအဆက်ပၠန်ဂှ် ကၠောန်ဗဒှ် သဘၚ်သဳကၠဳ ၁၅ ဝါ နူဂိတုနဝ်ဝေမ်ပါ ၂၆ စဵုစိုပ်ဒဳဇြေမ်ပါ ရ ရောၚ် ဂွံတီကေတ်ရ။
တုပ်တဴသာ်ဂှ်ကီု KNU ဂှ် ကလေၚ်သ္ၚဳဂၠိပ်သဳကၠဳ အကာဲအရာ ပရေၚ်ဍုၚ်ကွာန် ဍုၚ်ဗၟာ မကတဵုဒှ် ပြံၚ်လှာဲမံၚ် ပ္ဍဲပစ္စုပ္ပန်ဏံကီု၊ တၚ်ရန်တၟံ ပရေၚ်ဍုၚ်ကွာန် ကောန်ဍုၚ်အရၚ်တံကီုတုဲ နူကောံဓရီုဂှ် ဖျေံဏာ လၟေၚ်ကမၠောန်အဓာန်ဂတ ၃ တၚ်ရ။
ယၚ်တၚ်တံဂှ်
၁။ သွက်ပရေၚ်ၜိုဟ်လလမ် ဍာံဍာံပြပြ သ္ဂောံမံက်တိုန်ဂှ် ဂွံသောၚ်ကလး ပြသၞာပရေၚ်ဍုၚ်ကွာန် ဆက်ဓမံက်အာရုပ်ရဴ ကမၠောန်ပရေၚ်ဆဵုဂဗသဳကၠဳရောၚ်။
၂။ သွက်ပရေၚ်ဍုၚ်ပံၚ်ကောံဇေတ်ဇေတ် ဂွံမံက်ဂတဝ်ကၠုၚ်ဂှ် အတိုၚ်ပၟိက်ဆန္ဒ ကောန်ဍုၚ်အရၚ်၊ ဇြဟတ်ဂကောံဒဳမဝ်ကရေဇြဳဂမၠိုၚ် ပံၚ်တောဲချဳဒရာၚ်အာရောၚ်။
၃။ ဗော်သွးကောန်ဂကူကရေၚ် KNU ဂှ် ပရေၚ်ၜိုဟ်လလမ်ဇေတ်ဇေတ် ဂွံမံက်ဂတဝ်ကၠုၚ်၊ ကောန်ဂကူကရေၚ်တံ သ္ဂောံကလိဂွံဒုၚ်စသိုၚ် ဂုဏ်ဖဵု ကေုာံ သ္ဂောံကလိဂွံ အခေါၚ်အရာတုပ်သၟဟ်တုဲ ပံၚ်ကောံချဳဒရာၚ်အာ ကုကောန်ဂကူကရေၚ် အပ္ဍဲဍုၚ်၊ မ္ၚးဍုၚ်တံရောၚ်တံ ပါလုပ်အိုတ်ရ။