ဌာန်ပရိုၚ်ဗၠးၜးမန် – လတူဍုၚ်ကျာ်ပိ ပယျဵုသေံ-ဗၟာ ပွိုၚ်ဍုၚ်လှာဒကှ် တွဵုရးကရေၚ်ဂှ် ပ္ဍဲဂိတုဒဳဇြေမ်ပါ ၁၆ အခိၚ်နူဂယးပြဟ် ဂွံဆဵုကေတ်ဇွမွဲ သီုပၞေတ်ဝပ်ရောၚ်ဂှ် ညးဒေသတံ ဟီုအိုတ်ရ။
“နူဗတမ်ဏံ အခိၚ်လဵုချိုတ်မံၚ်ရောလေဝ် ဟွံတီပုဟ်။ နူဂယးပြဟ် အခိၚ်ဖလာၚ်ယျးမှ ဂွံဆဵုကေတ်ဇွ သီုဒးဒုၚ်ရေက်လဝ်ကအ်” သာ်ဝွံ ကောန်ဍုၚ်ကျာ်ပိမွဲတၠ ဟီုရ။
မာံလွေန်နံၚ်နံၚ်ဝွံ သ္ပဒတဴ ပ္ဍဲဍုၚ်ကျာ်ပိ (သြၚ်သေံ) တုဲ ကၠောန်ဒၟံၚ်ကမၠောန် ပ္ဍဲရုၚ်စက် ဇိၚ်ဒၞပ်ရ။ ညးဝွံ ဃောကၠုၚ်ဝေၚ် ဍုၚ်ကျာ်ပိ လပါ်သြၚ်မန်ဗၟာတုဲ ဒးဒုၚ်ဂစိုတ်ရောၚ် ကောန်ဍုၚ်ကျာ်ပိတံ ဟီုရ။
ထဝ်လျိုၚ် ပိဒကေဝ် ညးကျိုၚ်လဝ်ဂှ်လေဝ် ကၠေံမံၚ်ရောၚ်ဂှ် ညးမဆဵုလဝ် ကိုပ်ကၠာညးဟွံချိုတ်ဏီတံ ဟီုအိုတ်ရ။
“အရာပ်ဂှ်ဂှ် ဝိုၚ်ဝေၚ်လေဝ် နွံ။ ဟိုတ်ဂှ်ရ တံၚ်မၞိဟ်တုဲ ဂစိုတ်ထောံဟာ။ ဟဂှ်ဟွံသေၚ် မၞိဟ်ဒဒှေ်ဒယှေ်ကဵုညး မွဲမွဲ ကၠောန်သ္ပဏာလေဝ် ဒှ်မာန်မံၚ်” သာ်ဝွံ ကောန်ဍုၚ်ကျာ်ပိမွဲတၠ ဟီုရ။
မုဟိုတ်ဒးဒုၚ်ဂစိုတ်ထောံဂှ် သ္ပဒတန် ဟွံဂွံဏီရောၚ် ကောန်ဍုၚ်ကျာ်ပိတံ ဟီုရ။
ပ္ဍဲအရာပ် ၄ (အရာပ်ကၟာဥဒံၚ်) ဍုၚ်ကျာ်ပိဂှ်မ္ဂး ပံက်လဝ် ဝိုၚ်ဝေၚ်နာနာ၊ ဆေၚ်ဗြဴစရာဲဍုၚ်တံတုဲ ဒှ်ဒၟံၚ်ဒၞာဲသွံရာန်ဂဥုဲၜူမာဲ မပ္တံကဵုဂဥုဲချေံတံရောၚ် ကောန်ဍုၚ်ကျာ်ပိတံ ဟီုရ။
ပ္ဍဲဂိတုတုဲကၠုၚ်ဏံဂှ် လတူဍုၚ်ကျာ်ပိ ပွတံၚ်ဓဇက်မၞိဟ်အာတ်သြန်၊ ပွမဗတိုက်ဒမၠ ကေုာံ ပွမကၠတ်ဂၠံက်ကပေါတ်တံ ကတဵုဒှ်ကၠုၚ်လဝ် နွံရ။ ၜိုန်ဂှ်လေဝ် ပွမဂစိုတ်ကၠေံမၞိဟ်တုဲ ကေတ်ဏာထဝ်သြန်ဂှ် လၟုဟ်ဒှ်အလန်ကိုပ်ကၠာအိုတ်ရ။