ခတ္တာနန် – ရန်တၟံသွက်ဂွံ ဒက်ပတန် ဂကောံပံၚ်ကောံ မန်မလေဝ်ယှာတအ်ဂးတုဲ နူကဵုဂကောံ ကမ္မတီ သြန်ဂအုံ ကောန်ဂကူ၊ ဟံၚ်ပြာ်မန်မလေဝ်ယှာ၊ ဂကောံသၟတ်မန်မလေဝ်ယှာ၊ ဂကောံညးဗြဴမန်တအ် ပံၚ်ကောံတုဲ စကၠောန်အာ ပေဲါသၠာဲဂတးလညာတ် အလန်ပထမရောၚ် သာ်ဝွံ ညးမပါလုပ်ပ္ဍဲကဵုဂကောံကမ္မတီ ဒက်ပတန် ဂကောံပံၚ်ကောံ မန်မလေဝ်ယှာ နာဲဥက္ကာ ဟီုရ။
ဂကောံမန် မလေဝ်ယှာတအ် ကၠောန်ပေဲါသၠာဲဂတးလညာတ် အလန်ပထမ
“ ပစၞးကဵု ဂကောံမွဲမွဲတုဲ ကၠောန်ကမၠောန်မွဲမွဲတှေ် မန် အလုံမလေဝ်ယှာဂှ် ဟွံပါကၠုၚ်ပုဟ်၊ ဟိုတ်ဂှ်ရ ပိုဲတအ် ပစၞးကဵု အလုံမန်မလေဝ်ယှာတုဲတှေ် နူကဵု ဂကောံဇၞော်ဇၞော်တအ် စချပ်ကၠုၚ် ဗီုပြၚ် ဂွံဒက်ပတန် ဂကောံပံၚ်ကောံ မန်မလေဝ်ယှာ ဟီုတုဲ ဖျေံကၠုၚ် ပရေၚ်ကမၠောန်တုဲ စချီဒရိုၚ်ကၠုၚ်” သာ်ဝွံ နာဲဥက္ကာ ဆက်ဟီုရ။
ပေဲါသၠာဲဂတးလညာတ် အလန်ပထမဝွံ ကၠောန်ဗဒှ်လဝ် ပ္ဍဲကဵု ဍုၚ်ကွာလာလာံပူ အရပ်ပူတူ ဆေၚ်ဖျာ ဟံသာဝတဳတုဲ စၞးဂကောံ ဗၞတ် (၁၀) ဂကောံတိုန်စိုပ်တုဲ လၟိဟ်မၞိဟ် ၜိုတ် (၄၀) တၠ ပြၚ် နွံရောၚ် သာ်ဝွံ ဂွံတီကေတ်ရ။
ဆက်တုဲ “ ကမၠောန်ဏံဂှ်တှေ် ကမၠောန် ဒက်ပတန် ဂကောံပံၚ်ကောံ မန်မလေဝ်ယှာ ဏောၚ်တှေ် စၟပ်မန် တန်တဴမံၚ် ပ္ဍဲကဵုဍုၚ်မလေဝ်ယှာဏံဂှ်တှေ် ဆေၚ်စိုပ်မံၚ်ဖအိုတ်ရေၚ်” သာ်ဝွံ နာဲဥက္ကာ ဆက်ဟီုရ။
ဂကောံမန် ပစၞးကွာန်တုဲ ချီဒရိုၚ်မံၚ်တအ်ကီု၊ ဂကောံပစၞးကု ကောန်ဂကူတုဲ ချီဒရိုၚ်မံၚ်တအ်ကီု၊ ဂကောံပစၞးကု ဒေသတုဲ ချီဒရိုၚ်မံၚ်တအ်ကီု ဂကောံဖအိုတ်မဂး နွံပတ် ၜိုတ် (၄၀) ဂကောံရောၚ် သာ်ဝွံ ဂွံတီကေတ်ရ။
“ပိုဲရန်လဝ်ဂှ်တှေ် ပိုဲကၠောန်အာ ပေဲါသၠာဲဂတးလညာတ်တုဲ ကေတ်အာ လညာတ်မန်ပိုဲတအ်ဏောၚ်၊ ပိုဲစှေ်အာ ပရေၚ် စန်ဒက်တုဲတှေ် ပိုဲချပ်သွက်ဂွံကၠောန် ကောံဓရီုဇၞော်တုဲမှ ပိုဲချပ်အာ သွက်ဂွံရုဲမာဲတုဲ ပစၞးအာ ဂကောံ ပံၚ်ကောံ မန်မလေဝ်ယှာမွဲဏောၚ် ပိုဲရန်လဝ်” သာ်ဝွံ နာဲဥက္ကာ ဟီုရ။
သွက်ဂွံပၟံက်ပတိုန် ဂကောံပံၚ်ကောံ မန်မလေဝ်ယှာဝွံ နူကဵု ဂိတု မာတ် ၃၀ တေံ ဒက်ပတန်လဝ် ကမ္မတီ (ယာယဳ) တုဲ စချီဒရိုၚ် ကေတ်အာလညာတ် မန်နွံ ဍုၚ်မလေဝ်ယှာကီု သၚ်တအ်ကီု မဒှ်ရ။
