မိလျးထဝ် – နူကန်ပဏဳ Bangkok Union Insurance ကေုာံကန်ပဏဳဒုၚ်လျိုၚ်ပရေၚ်ဘဲဒဏ် Syn Mun Kong Insurance Company Limited (Thailand) တံ ပတိတ်ကဵုသြန်အလေဲ လၟိဟ်သြန်ၜါတ် ၁၆ ကိုဋ်ဘာ် သွက်မၞိဟ်စုတိအာတံဂှ်တုဲ နကဵုဝန်ဇၞော်ခရိုၚ်တာခ် နာဲသုရိယ ပရသာတ်ၜါန်ဍိတ် ပအာပ်သြန်တံဂှ် ကု ကောန်ဇာတ်ညးတံ အပ္ဍဲဌာနဗၠာဲသၟိၚ်ဍုၚ်တာခ် အပ္ဍဲဂိတုဂျုန် ၁၄ ဂှ် ဂွံတီရ။

သၟာကမၠောန်ကောန်ဍုၚ်ဗၟာ မၞုံပါတ်သပေါတ်(ယာယဳ)တံ ကွဳစက်ဗကပ်အာ ပ္ဍဲဂိတုဧပြဳ၂၄ လောန်ကၠုၚ်ဂှ် သၟာကမၠောန်ၜိုတ် ၅၀ တၠတံ ဒးအာဘဲဝပ်အပ္ဍဲဂှ် သၟာကမၠောန်မန် ၃ တၠ စုတိအာလဝ်ရ။

ဟိုတ်ဂှ်တုဲ သြန်အလေဲ နူကဵုကုမ္မဏီ Bangkok Union Insurance ဂှ် ၂၀၀၀၀၀ ၜါကိုဋ်ၜါတ်ကေုာံ နူကန်ပဏဳဒုၚ်လျိုၚ်ပရေၚ်ဘဲဒဏ်ဂှ် ၃၅၀၀၀၀ ပိကိုဋ်ဘာ်ၜါတ် ပံၚ်ကောံတုဲ ညးစုတိမွဲမ္ဂး ၅၅၀၀၀၀ မသုန်ကိုဋ်ဘာ်ၜါတ် အာပ်ကဵု ညးတၠခန္ဓဆေၚ်စပ်တံရ။

“ပိုဲတံကောံညးသကအ်တုဲ အာဒုၚ်တဲသြန်တုဲအာယျ၊” သာ်ဏံ ညးရေၚ်တၠုၚ်ဖဵုသွက်သၟာကမၠောန်၊ ညးတာလျိုၚ်နူဂကောံရိုက်ထာဲတြေံ နာဲသုရတ်ဆာဲ ဟီုလဴကဵုရ။

ညးစုတိအာပိတၠတံဂှ်မ္ဂး နာဲသဝ်အံၚ် အာယုက် ၄၁ သၞာံ ဇာတိကွာန်ကအ်ဗိန်၊ မိနွေ အာယုက် ၃၀ သၞာံ ဇာတိကွာန်ကအ်မိတ်၊ မိတိၚ် အာယုက် ၄၁ သၞာံ ဇာတိကွာန်ကအ်မိတ်တံရ။

“နာဲသဝ်အံၚ်ဂှ် ဒှ်မံၚ်က္ဍိုပ်ကၟိန်သ္ၚိညးရ၊ ညးချိုတ်အာတုဲ သမ္ဘာညး ဂွံကၠောန်ကမၠောန်ဟွံဂွံ ဒးရံၚ်မံၚ်ကောန်ၚာ်ၜါဂှ်တုဲ နူကနေံဏံ ညးတံ ကလေၚ်စဴအာကွာန်ယျ” သာ်ဏံ ညးမဒှ်မသ နာဲသဝ်အံၚ် ဟီုလဴကဵုရ။

အတိုၚ်သၞောဝ်ဍုၚ်သေံဏံမ္ဂး သွက်သ္ဂောံဂွံ သြန်လေဲၚုဟ်လမျီုဂှ် ကိုပ်ကၠာ ဒးပကောံတၚ်နၚ်မၞိဟ် စုတိအာလဝ်တံတုဲ သွက်မၞိဟ်ဂွံဒုၚ်တဲသြန်တံဂှ် ဒးဆေၚ်စပ်မံၚ်ကဵု ညးတၠးခန္ဓစုတိအာတံ ဍာံပြရောၚ်ဂးရ။

ယဝ်ရ မၞိဟ်စုတိအာတံဂှ် ဒှ်ဒၟံၚ်တြုံသမ္ဘာညးသကအ်ကီု ဒှ်ကောန်ဇာတ်ကီုတံဂှ် ဒးထ္ၜးသက်သဳချိုတ်ပၠိုတ်ရ -ဥပမာ ဒှ်တြံုသမ္ဘာတှေ် နကဵုတၞးလိက်စၟတ်သမ္တီဒှ်တြံုသမ္ဘာတံဒးနွံတုဲ ယဝ်ရဒှ်ကောန်ဇာတ်မ္ဂး နဒဒှ်တၞးလိက်စၟတ်သမ္တီကောန်ဇာတ်(စရၚ်သၠးဂဝ်ဂၞဴ)တံ ဒးနွံတဴရောၚ် ဂွံတီရ။