မာံလုၚ် – ပ္ဍဲဘာတက္ကသိုလ်မန် ရာမညရဌဗုဒ္ဓဂှ် သွက်ခၟဳသၚ်အံၚ် ဓမ္မစရိယကမၠိုၚ် စပံက်တန်ဗ္တောန်ပ္ကတ်ပ္ကေၚ် ကောန်ပျုတာ ကေုာံ ဘာသာအၚ်္ဂလိက် ပ္ဍဲဂိတုဂျူလာၚ် (၂၅) ဂှ်ရောၚ် ဂွံတီကေတ်ရ။

မၞုံဂၠံၚ်မိစဴဗု၊ အရာပ်မျာၚ်တာယာ၊ ဍုၚ်မတ်မလီု၊ တွဵုရးဍုၚ်မန်ဂှ် သွက်ဂွံစီုသကီု ပရေၚ်ပညာကောန်ပျူတာ ကေုာံ ဘာသာအၚ်္ဂလိက်မာန်ကီု၊ အာကတ်ဗ္တောန်ပညာ ဍုၚ်သၟာၚ်မ္ဂး သွက်ဂွံသုၚ်စောဲ ဘာသာဍုၚ်သၟာၚ် International Language မွဲ ဗွဲမဇိပ်ဂၠိပ်မာန် ကေုာံ သွက်ကွးဘာတိုန်တက္ကသဵုဂမၠိုၚ် သ္ဂောံဂွံအခေါၚ်အရာ ကမၠောန်ခိုဟ်ဟ်ဂမၠိုၚ်ဂှ် ရန်တၟံလဝ်ရောၚ် ဂွံတီကေတ်ရ။

ပိုၚ်ခြာလဝ်လၟိုဟ်ကွးဘာတအ်နွံတုဲ လိက်စရၚ်ပ္တိုန်အခေါၚ် တိုန်တန်ဗ္တောန် ပွိုၚ် (၃) ဂိတုဂှ် ပ္ဍဲဂိတုဂျူလာၚ် (၂၀)ဂှ် စွံလက္ကရဴအိုတ်တုဲ ကၟတ်အာစရၚ်ရောၚ် သာ်ဝွံ အ္စာတန်ဗ္တောန် မေန်အာကာဇြဝ် ဟီုရ။

ညးဝွံ “ပိုၚ်ခြာလဝ်ကွးဘာဟီုဂှ်တှေ် မၞိဟ်ပတိုန်ကၠုၚ်ဂှ်တှေ် ဂွံအခေါၚ်ဂၠိုၚ်ရ။ ပိုဲတံဒုၚ်တဲဂှ် နွံၜါသာ်ရ။ ခၟဳသၚ်အံၚ်လဝ် ဓမ္မစရိယတံကဵု ကွးဘာစှ်တန်တံ၊ ညးဗြဴညးတြုံ ဟွံရုဲရ။ အခေါၚ်မံၚ်ပ္ဍဲဗဒံဂှ် ဟၟဲရ။ အခိၚ်ဗ္တောန်လိက်ဂှ် ကၠုၚ်စိုပ်တုဲ ကတ်ဗ္တောန်ရ” သာ်ဝွံ ဟီုရ။

အ္စာတန်ဗ္တောန်တံဂှ် ကျာ်ဇၞော်အ္စာမဟာသာရ ကေုာံ အ္စာအာကာဇြဝ် နူ English International School တံ မဒှ်တုဲ ညးတိုန်တန်ဗ္တောန်မွဲတၠမ္ဂး ၚုဟ်တန်ဗ္တောန် ပိဠက် ဒကေဝ် စၟတ်လဝ်ရောၚ် ဂွံတီကေတ်ရ။

“သွက်တန်ဗ္တောန် (၃) ဂိတုဂှ် ညးမွဲ ပိဠက် စၟတ်လဝ်ဏောၚ်။ ညးတိုန်တန်ဗ္တောန်မွဲတၠ တိုန်တန်ဗ္တောန်လၟေၚ်ၚ်၊ ကၠောန်သ္ပအာလိက်လၟေၚ်ၚ်၊ ကေက်သ္ကာမ္ဂး ၚုဟ်တန်ဗ္တောန်ပိဠက်ဂှ် ပိုဲတံကလေၚ်ထံက်ပၚ် စရိတ်ဗ္တောန်ပညာဍေံတံရ” သာ်ဝွံ မေန်အာကာဇြဝ် ဆက်ဟီုရ။

ဓမ္မကတိကတၠဂုန်အ္စာမန် သဳလစာရ က္ဍိုက်က္ဍိုပ်တုဲ သၞာံတုဲကၠုၚ်တေံဂှ် စသိုၚ်ခၞံကၠုၚ် တက္ကသဵုရမညရဌဗုဒ္ဓမန်တုဲ ဗ္တောန်မံၚ်ကဵု ဘာသာအၚ်္ဂလိက် ကေုာံ တန်ဗ္တောန်ကမ်ပျူတာ မဒှ်ရ။