မာံသုတ – အပ္ဍဲပရေၚ်ရပ်စပ်ဂွံမံၚ်ဂဥုဲၜူမာဲတံဂှ် လွဟ်တံလေဝ်ရပ်သီဂွံမံၚ်ကီုရောၚ် သာ်ဝွံညးတာလျိုၚ်ဗၠာဲသၟိၚ်(ပလိက်) တွဵုရးကရေၚ်မွဲတၠ ဟီုလဴကဵုရ။

“ချိၚ်ဆကေတ်တှေ် အပ္ဍဲမွဲဂိတု ပရေၚ်ရပ်စပ်ဂဥုဲၜူမာဲ ၄ ဝါ က္တဵုဒှ်မ္ဂး ၜိုတ် ၃ ဝါဂှ် အမှုလွဟ်လက်နက်တံ ပါကၠုၚ်မံၚ်ရ၊ အတိုၚ်ရဲဒုၚ်ဝန်တံဟီုလဴကဵုဂှ်တှေ် မၞိဟ်လ္ၚဵုလ္ၚဵုတံဂှ် မွဲနဲမွဲဗီု ဆက်ကၠောံမံၚ်ကဵု မၞိဟ်နူဂကောံရပ်လွဟ်တံမွဲမွဲနွံမံၚ်” သာ်ဏံ ညးဆက်ဟီုရ။

ပ္ဍဲကဵုတွဵုရးကရေၚ်၊ ဍုၚ်ကြုၚ်ဒဵု ဒၞာဲသ္ၚိဒၟံၚ် ဉာဏ်ထောန်ဂှ် ညးတာလျိုၚ်ပလိက်ဗၠာဲသၟိၚ်တံ ကာလကၠုၚ်ရပ်ဂဥုဲချေံ ၁၇၇ မဂှ် သီုသီဂွံလွဟ်ပေတ်သတဝ် Czecholokia မွဲဇကိုအ်ဂးရ။

အပ္ဍဲကဵုပွိုၚ်မွဲတ္ၚဲဂှ်ပၠန် ဒၞာဲသ္ၚိဒၟံၚ် မနာန်ဖဝ် ရဲကွာန်အိန္ဒု၊ ပွိုၚ်ဍုၚ်ဘာအၚ်ဂှ်လေဝ် ရပ်ဂွံဂဥုဲချေံ ၂၆၆ မ၊ မွဲကရောံဂှ် သီုသီဂွံလွဟ်လက်နက်ဇမၠေံပေတ်သတဝ် မွဲဇကုကီုဂှ်လေဝ် ညးဆက်ဟီုလဴကဵုရ။

ဗၠာဲသၟိၚ်ရပ်စပ်ဂဥုဲၜူမာဲ(ဒပ်တၟေၚ်) ဍုၚ်ဗြဝတဳ တွဵုရးကရေၚ်မွဲတၠဟီုဂှ် “အပ္ဍဲကဵုဂိတုသေပ်တေမ်ပါ ၄ ဂှ် ပိုဲတံ ဗက်ရပ်ဂဥုဲၜူမာဲ အကြာဆေၚ်ဖျာ (Game) လ္တူဍုၚ်ဂှ်တှေ် ဂဥုဲချေံကဵု လွဟ်လက်နက်ဍောတ်တ်မွဲဇကု သီုကဵု မကမ်တံ ရပ်ဂွံလဝ်ကီုရ” သာ်ဏံ ညးဟီုလဴကဵုရ။

အပ္ဍဲကဵုဆေၚ်ဖျာ (Game) လ္တူဍုၚ်ဗြဝတီဂှ် ရပ်ဂွံဂဥုဲချေံတဆိပ် WY လၟိဟ်၂၀၁၅ မ ကေုာံ လွဟ်လက်နက် ပေတ်သတဝ် ဒဿမ ၂၂ ကဵု မကမ်ဂမၠိုၚ် နူညးလုပ်ဂကောံဒပ်ပၞာန်ကရေၚ် DKBA မွဲတၠ မဒှ်ရ။

တုပ်သာ်ဂှ်ကီု အပ္ဍဲဂိတုသေပ်တေမ်ဗာ ၁၅ အခိၚ်ဗ္တံဂှ် အပ္ဍဲရးဒေသဇၞော်လ္ဂုၚ် ပွိုၚ်ဍုၚ်မၚ်္ဂလ၊ ဍုၚ်ထံက်ကျ၊ အရာပ်ဗဂေါ ဒၞာဲသ္ၚိဒၟံၚ်တာန်သဝ်ဂှ် ဗၠာဲသၟိၚ်ပလိက်တံ ရပ်ဂွံဂဥုဲချေံတဆိပ် WY လၟိဟ် ၃၃၉၅၆ မကေုာံ သီုလွဟ်ပေတ်သတဝ်မွဲဇကိုအ်၊ မကမ်ပါ ၁၁ မဖျေဲမွဲဂှ် အပ္ဍဲကဵုလိက်ပရိုၚ် The Myawady Daily ထမံက်ထ္ၜးလဝ်နွံရ။

ဒပ်ဗၠာဲသၟိၚ်ပလိက် ပ္ဍဲရးဒေသဇၞော်သကိုၚ်၊ ခရိုၚ်ကလေဝ်၊ ပွိုၚ်ဍုၚ်တမူတံဂှ် ညးတာလျိုၚ်လ္ၚဵု ဆက်စပ်မံၚ်ကဵုပရေၚ်ကူသာန်သွံရာန်ဂဥုဲၜူမာဲကေုာံ လွဟ်ဟွံလုပ်သၞောဝ်ဂမၠိုၚ်တံနွံမံၚ်ဂွံပရိုၚ်တုဲ ဂကောံဗၠာဲသၟိၚ်ပလိက်နူနေဗျဳတဝ်တံ အာစၟဳစၟတ်ရပ်စပ် ကေတ်ထောံအရေဝ် ပ္ဍဲဂိတုဂျောန်လောန်ကၠုၚ်တေံ ကေၚ်က္တဵုဒှ်လဝ်နွံရ။