မန်ထဝ်
ပေါဲသောၚ်ကလးပရိုၚ်AMDP (GS)
ပေဲါသောၚ်က္လးပရိုၚ်ဂှ် ကၠောန်သ္ပဏာ ပ္ဍဲရုၚ်ဋ္ဌာန်ဂအုပ်ဗဟဵုဗော် မၞုံအရာပ်မျာၚ်သာယာ (၆) ဂၠံၚ် ဍုၚ်မတ်မလီုတုဲ ဒု – ဥက္ကဋ္ဌဗော် နာဲသိုက်၊ ညးအုပ်ကာနာနာ ဒံက်တာမေန်နဲသဵု၊ နာဲလွဳအံၚ်၊ ဒံက်တာဗညာအံၚ်မောဝ် ကေုာံ နာဲသာန်တေန် စပ္တံတံ တိုန်စိုပ်သောၚ်က္လးလဝ်ရ။
“ဗော်ပိုဲဂှ် အတိုၚ်တၚ်သ္ဂုတ်သွာတ်ကောံဓရီု ကေၚ်ကာဗဟဵုဖျေံလးလဝ် ပ္ဍဲလိက်လလောၚ်တြးဗော် ၁/၂၀၁၄ ဂှ်ရ ဒတူလိုၚ်အာဏောၚ်၊ နကဵုယၟုဗော်ဏံရ ပိုဲလုပ်ဒုၚ်ရုဲမာဲ ၂၀၁၅ ရောၚ်” သာ်ဝွံ ညးအုပ်ကာနာနာ ဗော်ဒဳမဵုကရေဇြဳ အလုံရးမန် ဒံက်တာမေန်နဲသဵု ဟီုရ။
ပ္ဍဲလိက်လလောၚ်တြး ဗော်ဒဳမဵုကရေဇြဳအလုံရးမန် ၁/၂၀၁၄ စၟတ်တ္ၚဲ ၅-၁-၂၀၁၄ ပ္တိတ်လဝ်ဂှ်မ္ဂး ဒုၚ်သ္ဇိုၚ်ကဵုကောံ ဓရီု ကေၚ်ကာဗဟဵု ပ္ဍဲစၟတ်တ္ၚဲ (၇-၁၂-၂၀၁၃) ကေုာံ စၟတ်တ္ၚဲ (၂၁-၁၂-၂၀၁၃) မကၠောန်သ္ပလဝ်ၜါဝါဂှ်တုဲ ဟွံရိုဟ်ပလီုဗော်မွဲသာ် နကဵုယၟုဗော်ဒဳမဵုကရေဇြဳ အလုံရးမန်ဂှ် ဒဵုကဵုစိုပ်ပေဲါရုဲမာဲ ၂၀၁၅ တေံတုဲဒှ် ဆက်တန်တဴအာ ရောၚ်ကီု၊ ကုဂကောံ ကေုာံ ဗော် မကိတ်ညဳကဵုမူဝါဒဗော်မ္ဂး နဗီုပြၚ်မဟာမိတ် ပံၚ်တောဲကၠောန်အာရောၚ် ရဴဝွံ ဓမံက်ထ္ၜးလဝ် တၚ်သ္ဂုတ်သွာတ် (၂) တၚ်ရ။
ကုကောန်ဗော် ညးနွံပၟိက်ကဵု လုပ်ပံၚ်ကောံ ပ္ဍဲကဵုဗော်ကောန်ဂကူမန် (Mon National Party) မမံက်ဒှ်ကၠုၚ်လဝ်တၟိ နူစၟတ်တ္ၚဲ ၂၂ – ၁၂ – ၂၀၁၃ တံဂှ် နကဵုဗော်ဒဳမဵုကရေဇြဳအလုံရးမန် ဟွံကၟာတ်ဒၞာလဝ် အခေါၚ်ပူဂဵုတုဲ အာတ်မိက်ပ္တိုန်လိက် အတိုၚ်လၟေၚ်စဳပၞောန်ဗော်ဇကုတုဲမ္ဂး နုက်တိတ်မာန်ရောၚ် က္ဍိုပ်သ္ကိုပ်ဗော်ဒဳမဵု ကရေဇြဳအလုံရးမန်တံ ဟီုအိုတ်ရ။
“ညးလဵုမွဲဟွံဟီု ဗော်ညးစှေ်စိုတ်ဂှ် အခေါၚ်ညးရုဲစှ်နွံရ၊ နုက်တိတ်အာတုဲ မိက်ဂွံက္လေၚ်လုပ်ပၠန်လေဝ် နကဵုဗော်ဒဳမဵု ကရေဇြဳအလုံရးမန်ဂှ် ပံက်လဝ်ကဵုပါၚ်တြၚ်သၠဲသၠဲရ၊ အဓိကဂှ် သွက်ဂုဏ်ဖဵုညးဍုၚ်ကွာန် မုကၠောန်ကဵုညးတံမာန် ရောဂှ်ရ မွဲတ္ၚဲမ္ဂး ဍေံကဵုသ္ဂုတ်သွာတ်ရောၚ်” သာ်ဝွံ ကမ္မတဳကေၚ်ကာဗဟဵု ဒံက်တာဗညာအံၚ်မောဝ် သ္ဂးရ။
ဗော်ဒဳမဵုကရေဇြဳ အလုံရးမန်ဝွံ ပ္ဍဲသၞာံပေဲါရုဲမာဲ ၂၀၁၀ ဂှ် သွက်ဂွံကၠောန်ပ္တုဲဂုဏ်ဖဵုကဵု ကောန်ဂကူမန်တံ အပ္ဍဲဗွိုၚ်သၞောဝ်မာန် ဗော်ပရေၚ်ဍုၚ်ကွာန်မွဲ ဒးနွံထေက်ရောၚ် ဂးတုဲ အတိုၚ်ဆန္ဒညးဍုၚ်ကွာန်၊ ခမဳသၚ်ဂမၠိုၚ်ဂှ် ပံက်ပ္တန်ဗော်မွဲ နကဵုယၟုဗော်ဒဳမဵုကရေဇြဳအလုံရးမန်တုဲ လုပ်ဒုၚ်ရုဲမာဲ ဂွံကၠုၚ်ညးစၞးအမာတ် ၁၆ ဒၞာဲကီုရ။
0 Comments