ပ္ဍဲကဵုဒက်ပ္တန်ပရေၚ်ၜိုဟ်လလံဂှ် ကဏ္ဍမဳဒဳယာကိစ္စဇၞော်မံၚ်ရောၚ် သ္ကိုပ်ဝန်ဇၞော်တွဵုရးသေံ ဟီု

ဌာန်ပရိုၚ်ဗၠးၜးမန် – ပ္ဍဲကဵုအခန်ကၞာမဳဒဳယာကောန်ဍုၚ်အရၚ် အလန်ဒုတိယ မကၠောန်ဗဒှ် စနူဂိတုမာတ် (၄) ပ္ဍဲၝောံခန်လိက်ပတ် ကေုာံ ယေန်သၞာၚ် မၞုံပ္ဍဲဍုၚ်ဇၞော်တံၚ်ဂျဳ၊ တွဵုရးသေံဂှ်ဝွံ ပ္ဍဲကဵုဒက်ပ္တန်ပရေၚ်ၜိုဟ်လလံဂှ် မဳဒဳယာ(ပရိုၚ်) မဒှ်မဏ္ဍိုၚ်စတုတ္ထဂှ်လေဝ် ကိစ္စဇၞော်မံၚ်ရောၚ် သ္ကိုပ်ဝန်ဇၞော်တွဵုရးသေံ “စဝ်အောၚ်မြတ်” ဟီုဂးဏာ ပ္ဍဲဂလာန်ပံက်အခန်ကၞာဂှ်ရ။

သ္ကိုပ်ဝန်ဇၞော် “စဝ်အောၚ်မြတ်” ဂှ် ကာလဒက်ပ္တန်ပရေၚ်ၜိုဟ်လလံမ္ဂး မဳဒဳယာကောန်ဍုၚ်အရၚ် ကေုာံ ဇၟာပ်မဳဒဳယာတံ သွက်ဂွံဓမံက်ပ္တိတ် ပရိုၚ်ဍာံ၊ တၚ်နၚ်ဍာံတံဂှ် ကိစ္စဇၞော်မံၚ်ကီု၊ ကၠုၚ်ကၠောန်သ္ပ ပေဲါကောံဓရီု မဳဒဳယာကောန်ဍုၚ်အရၚ် ပ္ဍဲတွဵုရးသေံလၟုဟ်ဏံဂှ်လေဝ် ဒုၚ်တၠုၚ်မိပ်စိုတ်မံၚ်ကီုရောၚ်” သာ်ဝွံ ဟီုရ။

တုဲပၠန် ဒုဝန်ဇၞော်ကၟိန်ဍုၚ် “ဥူပိုက်တိုဲ” ဌာနဝန်ဇၞော်လလောၚ်ပရိုၚ်ဂှ်လေဝ် ကာလဓမံက်ရုပ်ရဴ ပရေၚ်ပြံၚ်လှာဲ ဒဳမဝ်ကရေဇြဳဂှ် ကဏ္ဍမဳဒဳယာဂှ်လေဝ် သွက်ဂွံဒှ်ကၠုၚ်မဳဒဳယာ မကိတ်ညဳကဵုခေတ်မွဲဂှ် အလဵုအသဳကၟိန်ဍုၚ်တံ ကၠောန်သ္ပရေၚ်တၠုၚ်မံၚ်ကီု၊ သၞောတ်(ဆၚ်ဆာ) မသုၚ်စောဲကၠုၚ်လဝ် သၞာံဗွဲမလအ်လဂှ်ဝွံ ပ္ဍဲသၞာံ (၂၀၁၂) ဂှ် စပလီုကၠုၚ်လဝ်ကီု ကေုာံ အခေါၚ်တက်တြးပ္တိတ်လိက်ပရိုၚ် ပုဂ္ဂလိကဂှ်လေဝ် ကဵုအခေါၚ်ပ္တိတ်ကၠုၚ်လဝ်ကီု ညးဟီုဂးဏာရ။

“ဒေသကောန်ဍုၚ်အရၚ်ကဵု ဒေသကွာန်ပယျဵုတံဂှ် ပရေၚ်မဳဒဳယာတံ ဇြဟတ်ဍိုန်မံၚ်ရ။ အခိၚ်လၟုဟ်တှေ် ပ္ဍဲကဵုဒေသကောန်ဍုၚ်အရၚ်တံဂှ် လိက်ပရိုၚ်ဂျာနေဝ် နကဵုဘာသာကောန်ဍုၚ်အရၚ်တံဂှ် ကဵုအခေါၚ်တက်တြးပ္တိတ်ရတုဲ ဂတဏံပၠန်လေဝ် ဆက်ကဵုအာအခေါၚ်ပၠန်ရ” သာ်ဝွံ “ဥူအံၚ်ကျဳ” ဟီုရ။

စဵုကဵုဂိတုဖေဖဝ်ဝါရဳ သၞာံ (၂၀၁၄) အခိၚ်လၟုဟ်ဂှ် ကဵုလဝ်အခေါၚ်တက်တြးပ္တိတ် လိက်ပရိုၚ်ဂျာနေဝ် ဘာသာကောန်ဍုၚ်အရၚ် (၉) ကၞပ် တုဲကၠုၚ်ကီု၊ တက်တြးပ္တိတ်မံၚ် လိက်ပရိုၚ်လၟေၚ်တ္ၚဲ (၁၈) ကၞပ်ကဵု ဂျာနေဝ်လၟေၚ်သတ္တဟ (၃၈၉) ကၞပ်ကီု၊ ခြာဟွံလအ်ဏံမ္ဂး ပ္ဍဲဒေသကောန်ဍုၚ်အရၚ်တံလေဝ် Radio, FM ကေုာံ TV Station ဂမၠိုၚ်တံဂှ် ကဵုဏာအခေါၚ် ကုဂကောံအလဵုအသဳဟွံသေၚ် (ဝါ) ပုဂ္ဂလိကတံရောၚ် “ဥူပိုက်ထိုဲ” ဆက်ဟီုရ။

ပေဲါကောံဓရီု မဳဒဳယာကောန်ဍုၚ်အရၚ် အလန်ဒုတိယဂှ်ဝွံ မကၠောန်ဗဒှ်ဏာ ပ္ဍဲဂိတုဖေဖဝ်ဝါရဳ စၟတ်တ္ၚဲ (၄) စဵုကဵု (၆) မဒှ်တုဲ ပ္ဍဲကဵုအခန်ကၞာဂှ်ဝွံ သ္ကိုပ်ဝန်ဇၞော်တွဵုရးသေံ “စဝ်အောၚ်မြတ်”၊ ဒုဝန်ဇၞော်လလောၚ်ပရိုၚ် နေပျဳဒဝ် “ဥူပိုက်ထိုဲ”၊ ဂကောံအလဵုအသဳတွဵုရးသေံဂမၠိုၚ်၊ “ဥူအံၚ်နိုၚ်ဥူ” နူ MPC ၊ “ဥူဃောန်မျေအ်ထောန်” နူ UNFC / PNLO၊ ဂကောံမဳဒဳယာအပ္ဍဲဍုၚ်မ္ၚးဍုၚ် (၄၀) ဂကောံပြၚ်၊ ဂကောံ CBO (၂၀) ဂကောံပြၚ် ကေုာံ သီုကၟုဲဘိက်ပၟိၚ်လဝ်ဂမၠိုၚ် သီုဖအိုတ် မၞိဟ်ၜိုတ် (၂၀၀) တၠ တိုန်စိုပ်လဝ်ဂှ် ဂွံဆဵုကေတ်ရ။

ပေဲါကောံဓရီု မဳဒဳယာကောန်ဍုၚ်အရၚ် အလန်ပထမ ဂကောံပရိုၚ်ဗၟာဍုၚ်သၟာၚ် BNI သ္ကိုပ်သ္ကကၠောန်ဗဒှ်ဂှ်ဝွံ ပ္ဍဲသၞာံ (၂၀၁၃) ဂိတုအေဗရဴဂှ် ကၠောန်ဗဒှ်လဝ် ပ္ဍဲဍုၚ်မတ်မလီု၊ တွဵုရးဍုၚ်မန်တုဲ ဒၞာဲသွက်ဂွံကၠောန်ဗဒှ်အာ အလန်တတိယဂှ် ပ္ဍဲစၟတ်တ္ၚဲလက္ကရဴအိုတ် ပေဲါကောံဓရီုမဳဒဳယာကောန်ဍုၚ်အရၚ် ဍုၚ်ဇၞော်တံၚ်ဂျဳဏံဂှ် စၟတ်သမ္တီသ္ပဒတန်အာရောၚ် မဒှ်ရ။

ဂကောံ BNI ဝွံ မဒှ်ဇာဖိုၚ်မဳဒဳယာ ကချေၚ်၊ ကရေၚ်ဍာဲ၊ ကရေၚ်၊ ချေၚ်၊ မန်၊ ဗၟာ၊ ရခေၚ် ကေုာံ သေံ မပ္တံမဳဒဳယာကောန်ဍုၚ်အရၚ် (၁၂) ဂကောံ ပံၚ်ကောံပါလုပ်ရ။