ခတ္တာနန် – အခိၚ်ကာလကၠောန်မံၚ်ပေါဲသဳကၠဳ သွက်ပရေၚ်ဒေါအ်ပန်ပှော်အလုံဍုၚ်လၟုဟ်ဏံ ဒပ်ပၞာန်အလဵုအသဳတအ် အာထပက်ဝေၚ်ဒၟံၚ်ပၞာန် ဒၞာဲဒေသကချေၚ်တေံဂှ် ဒးဒှ်သံသယဇၞော်ကွေံရောၚ် သာ်ဝွံ ညးအုပ်ကာဂကောံ UNFC နာဲဟံသာ လဴထ္ၜးဏာကုဌာန်ပရိုၚ်ဗၠးၜမန် IMNA ရ။

ကောံဓရီုကာမံက်တိုန် ကံၚ်ဇြဳဖေဝ်ဒရေဝ်ကောန်ဂကူကောန်ဍုၚ်အရၚ်ညဳသၟဟ် UNFC တုဲကၠုၚ် ဂိတုအေဗရဴ ၂၂ ဏံဂှ် စပ်ကဵုပေဲါဗ္တိုက် ပ္ဍဲဒေသကချေၚ်က္တဵုဒှ်မံၚ်ဂှ်တုဲ ပ္တိတ်ဏာလိက်လေလေၚ်တြး မွဲရောၚ် ညးသ္ဂးရ။

နာဲဟံသာဂှ် “ အခိၚ်အခါသဳကၠဳမံၚ် ဒေါအ်ပန်ပှော်ဏအ်ဂှ် ပ္ဍဲဒေသကချေၚ် ဒပ်ပၞာန်အလဵုအသဳတအ် ထပက်ဒၟံၚ်ပၞာန်ဗီုဏံဂှ်တှေ် မွဲလ္ပာ်ကဵုမွဲလ္ပာ် ဒှ်သံသယဇၞော်တိုန်ဏောၚ်၊ အခိၚ်ကၠောန်သ္ပမံၚ် ပေါဲသဳကၠဳအလုံဍုၚ်ဂှ်တှေ် ပရေၚ်ဗီုဗီုတံဏအ် ကၠောန်ဟွံထေက်ပုဟ်” သာ်ဝွံ ညးဟီုရ။

ဂကောံပ္ညဳပ္ညပ်ပရေၚ်ဒေါအ်ပန်ပှော်အလုံဍုၚ် NCCT ကဵု ဂကောံဓမံက်ကမၠောန်ပရေၚ်ၜိုဟ်လလမ်ကၟိန်ဍုၚ် UPWC တံ ကေတ်ဂွံလဝ်တၚ်တုပ်စိုတ် မူအပြောံဒေါအ်ပန်ပှော်တံကီု တၚ်တုပ်စိုတ်ဟွံမာန်ဏီတံဂှ်ကီု
ပ္ဍဲပေါဲသဳကၠဳ UNFC ဏံ ကလေၚ်သ္ၚဳဂၠိပ်သဳကၠဳလဝ်ရောၚ် ဂွံတီကေတ်ရ။

ဂကောံရပ်လွဟ်ကောန်ဍုၚ်အရၚ်တံ အဓိကဒုၚ်တဲဟွံမာန် လတူလစွံစိုတ်ဒပ်ပၞာန်အလဵုအသဳ ၆ တၚ်ဂှ်မ္ဂး “သ္ဒးဒုၚ်တဲဒဂေတ်ဗက်အာအတိုၚ်သၞောဝ်ဥပဒေတန်ကြန်ဒၟံၚ်လၟုဟ်” “ အတိုၚ်သၞောဝ်ဥပဒေ ၂၀၀၈ ကဵုလဝ်အခေါၚ်တံဂှ် နကဵုဆန္ဒကောန်ညးဍုၚ်ကွာန်တံ ဆက်တုဲပလေဝ်ပလေတ်သၞောဝ်သ္ဇိုၚ်အုပ်ဓုပ်ဏံ” သာ်ဝွံ နာဲဟံသာ ထံက်ထ္ၜးဏာရ။

ပ္ဍဲဂိတုအေဗရဴ စနူစၟတ်တ္ၚဲ (၅) စဵု (၈) တေံ သွက်ဂွံဓဇက်မူအပြောံဒေါအ်ပန်ပှော်ဂှ် NCCT ကဵု UPWC ဆဵုဂဗသဳကၠဳလဝ် ဒၞာဲဍုၚ်လ္ဂုၚ်တေံတုဲ ပ္ဍဲအေဗရဴ ၂၁ -၂၂ ဏအ်ဂှ် UNFC ဆက်ကၠောန်သ္ပကောံဓရီုကာမံက်တိုန် ဒၞာဲဍုၚ်ဇၚ်မာဲပၠန် ဂးရ။

ဒု-သ္ကိုပ်ပၞာန် KIA သ္ကိုပ်ပၞာန်ဂေါန်မဝ်ဂှ် “ ပ္ဍဲဂိတုအံက်တဝ်ပါတုဲကၠုၚ်တေံ ဒၞာဲဍုၚ်မျေတ်ကျဳဏာ ညးစၞးအလဵုအသဳကဵု ညးစၞး KIO ၜါလပါ်တံ သွက်ဂွံယှအ်ဖျေံပေါဲဗ္တိုက် ကေၚ်ကဵုကၠုၚ်လဝ် ဂတိပါၚ်ညးသ္ကံနွံရ။ ဟိုတ်ဂှ်ရ ကဵုလဝ်ဂတိပါၚ်နွံမံၚ်ဖိုဟ် ပေါဲဗ္တိုက်ဆက်ကတဵုဒှ်မံၚ်သာ်ဏံဂှ် သွက်ပရေၚ်သဳကၠဳအလုံဍုၚ် အဓါန်ဂတတေံ ဒှ်ကၠုၚ်အခက်အခုဲမာန်ဏောၚ်” သာ်ဝွံ ဟီုရ။

သွက်ဂွံချူဓဇက်သၞောဝ်ဒေါအ်ပန်ပှော် မူအပြောံအလုံဍုၚ်မာန်ဂှ် NCCT ကဵု UPWC တံ ဂိတုမေမံက်ဏံမ္ဂး သွက်ဂွံကလေၚ်ဆဵုဂဗသဳကၠဳအာနွံပၠန်ရောၚ် သာ်ဝွံ နူဌာန်ဗဟဵု ကလေၚ်ဒက်ပ္တန်ပရေၚ်ၜိုဟ်လလမ်ဍုၚ်ဗၟာ MPC လဴထ္ၜးတုဲ ဂွံတီရ။