ကျာ်ဇၞော်အာစာတၠမန်ဒယှ်တှ် ကျာ်ဇၞော်အာစာတၠ ဝိၛာန် (ဝါ) ကျာ်ဇၞော်အာစာတၠ ဝိမလဇယဓမ္မ (ဝါ) ဝ္ၚှိာယဓမ္မော မၞုံအာယုက် (၇၆)၊ ဝှ် (၅၆) မဒှ်ကျာ်ဇၞော်ဂဇံဘာဝါတ်ပြော်၊ မၞုံဍုၚ်ၜၚ်ကံက်၊ နိဂီုဍုၚ်သေံဂှ် ပ္ဍဲဂိတုဂျူလာၚ် (၂၇)၊ အခိၚ်ဗ္တံ (၉) နာဍဳ (ဍုၚ်သေံ) ဂှ် စုတိစဴအာသွဝ် ပ္ဍဲရုၚ်ဂဥုဲ စောဖယာ Chaophya Hospital ဍုၚ်ၜၚ်ကံက်ရ။

ကျာ်ဇၞော်အာစာတၠဝွံ မဒးဒုၚ်မံၚ် ယဲဝေဒနာဍာ်ဇမၠိၚ် ပမတံ ယဲခယျာဍာတ်၊ ယဲဆီၜေတ်၊ ယဲကောန်တၟံ (ဆီးချို၊ သွေးတိုး၊ နှလုံးရောဂါ) ဂှ် ညးမဒှ်ကွးကျာ်ဇၞော်အာစာတၠ နာဲဝံသ ဟီုကဵုဌာန်ပရိုၚ်ဗၠးၜးမန် IMNA ရ။

“က္ညအာ အခန်ကၞာဖဍောတ်ပရိုတ် ပ္ဍဲဝၚ်နန်ဨကရာဇ်ဂှ်တုဲ မံၚ်စပရေံအာဂှ်ရ ဒးတိုန်အာရုၚ်ဂဥုဲ” သာ်ဝွံ နာဲဝံသ ဟီုရ။

ပ္ဍဲဘာလကျာ် ဝါတ်ချနသောန်ခရာမ် Watchanasornkram မဒှ်ဘာလကျာ် သၟိၚ်ဨကရာဇ် မရှေ်သှေ် ရဴဂဴဂှ်ဝွံ အတိုၚ်အခိုက်ကၞာနန်ဨကရာဇ်မ္ဂး အခိၚ်ပယျာံနူဂယးပြဟ်ဂှ် ဖဍောတ်ပရိုတ် နကဵုဘာသာ မန်ဂှ်တုဲ ညးဒးပ္တိုန်ဏာရုၚ်ဂဥုဲရောၚ် သ္ဂးရ။

နာဲဝံသဂှ် “ရုပ်ကလာပ်ကျာ်ဇၞော်အာစာ မသှေ်သၟေဟ်တဴမံၚ်ဂှ် ပ္ဍဲဂိတုဂျူလာၚ် (၃၀) ဂှ်တှေ် ကေတ်ဖျဴနၚ် ဘာဝါတ်ပြော်ဏောၚ်။
အတိုၚ်အခိုက်ကၞာအဏံတှေ် သ္ပပူဇဴ ဒဵုကဵုပွိုၚ်(၁၀၀) တ္ၚဲတုဲ ကၠောန်ဗဒှ်အခန်ကၞာ စံၚ်ဇွ ဂြဇုတ်ဏောၚ် ထေၚ်ကေတ်ရ။ လၟုဟ်ပြဟ်ဟ်ဏံဂှ် သ္ဂုတ်သွာတ်ချိုတ်တ်ပၠိုတ်တ် ဟွံဂွံဏီရ” သာ်ဝွံ ညးဆက်ဟီုရ။

ကျာ်ဇၞော်အာစာတၠဝိၛာန်ဝွံ တန်ဒှ်ကျာ်ဇၞော်ဂဇံဘာဝါတ်ပြော် အခိၚ်ယိုက်ဂၠေၚ်မံၚ် လျိုၚ်သာသနာ စဵုကဵုစဴအာသွဝ် ပွိုၚ် (၃၃) သၞာံဂှ်မ္ဂး ဘာဏံဝွံ မဒှ်ဒၞာဲဂကူမန် မစိုပ်ဍုၚ်ၜၚ်ကံက် ဇူဒီုမွဲချိုန်ခဏ၊ ဒှ်ဌာန်ဒၞာဲဂကူမန် ဆဵုဂဗညးသ္ကံမွဲရောၚ်ဂှ် ညးမဒှ်တၞောဝ်ဒေံ ကျာ်ဇၞော်အာစာတၠ နာဲကၠဵု ဟီုတုဲ ဂွံတီကေတ်ရ။

“နကဵုယၟု ကျာ်ဇၞော်အာစာတၠဝိၛာန်ဂှ် ချဳဓရာၚ်မံၚ် ပရေၚ်ကောန်ဂကူမန်၊ ပရေၚ်မၞိဟ်၊ ပရေၚ်သာသနာလၟိုန်တုဲ ဘာဝါတ်ပြော်ဟီုဂှ်တှေ် ဇၟာပ်ညးကေၚ်စိုပ်ဍုၚ်ၜၚ်ကံက်တံ တီမံၚ်ဖအိုတ်ရ။ ဗွဲမဂၠိုၚ်တှေ် လက္ကရဴ (၈၈) ဂှ် ကွးဘာမန်တံ၊ သၟာပၠန်ဂတးမန်တံ ကၠုၚ်စိုပ်ဍုၚ်ၜၚ်ကံက်တှေ် ဒှ်ဒၞာဲသွက်ဂွံဇူဒီုမွဲကီုရ” သာ်ဝွံ ညးဆက်ဟီုရ။

ကျာ်ဇၞော်အာစာတၠဝိၛာန်ဝွံ မဒှ်ကောန်ဗၠာဲရတ် နာဲပူ၊ မိလအ် ဌာန်ဇာတိကွာန်ကၠအ်သတ်၊ ပွိုၚ်ဍုၚ်မုဟ်ဍုၚ်တုဲ ပၞောဝ်ကဵုကောဒေံ (၆) တၠဂှ် မဒှ်ကောန်မရနုက်ကဵုပဉ္စမ ယၟုခရှ် မာံယျိုၚ် ကော်ခဴစဂးရ။

ကျာ်ဇၞော်အာစာတၠဝွံ အဃောဘဝသာမဏဳ ကတ်ဗ္တောန်လိခ်ပရိယတ္တိ ဒၞာဲဘာလကျာ်ကွာန်သၞေဟ်ဗဒဝ်၊ ပွိုၚ်ဍုၚ်မုဟ်ဍုၚ်ဂှ် အံၚ်ပေဲါသွဟ်တန်ဍောတ်တုဲ နူဘဝထပိုဲဂှ် ပြံၚ်လုပ်ဆက်ကတ်လ္ၚတ်အာ ပ္ဍဲဍုၚ်သေံပၠန်ရောၚ်ဂှ် ညးမဒှ်တၞောဝ်ဒေံ ကျာ်ဇၞော်အာစာတၠ ဟီုတုဲ ဂွံတီကေတ်ရ။

ကျာ်ဇၞော်အာစာတၠဝွံ ပ္ဍဲသၞာံ (၁၉၅၈) ဂှ် နူဘဝသာမဏဳ ပြံၚ်လှာဲဒုၚ်ဂိုၚ်ဘဝခမဳ ပ္ဍဲဘာလကျာ်မန် ဝါတ်စေဍဳဓံၚ်(ကျာ်စေတဳထဝ်) ခရိုၚ်ပထုမ်ဌာနဳ၊ နိဂီုဍုၚ်သေံတုဲ အခိၚ်ကာလ ကလိဂွံ (၂) ဝှ်ဂှ်မ္ဂး နကဵုကျာ်ဇၞော်ဘာဝါတ်ပြော် နိမန်ဘိက်ကညနၚ်ကုညးတုဲ ဒှ်ကၠုၚ်ခဒၚ်ဂြဳကျာ်ဇၞော်ဂဇံဘာ၊ စိုပ်သၞာံ ၁၉၈၁ ဂှ် ဒှ်ကၠုၚ်ကျာ်ဇၞော်ဘာဝါတ်ပြော် ဂွံတီရ။