-
- ဗီုဂၠိုက်ဂၠာဲဒၟံၚ်ခၞိၚ်ဓမ္မစေတဳ(internet)
နာဲယျေဝ်ဇြဝ်ဂှ် “ ယဝ်ရ ဆဵုဍာံဍာံတှေ် မိပ်မံၚ်စိုတ်ကွေံကွေံရ၊ ပတိတ်လဝ်ပရိုၚ်ဂှ် ၜိုတ်ဆဵုဓဝ်ရဏောၚ်၊ တ္ၚဲလဵု ဒၞာဲလဵု သၟာဗၠိုပ်ဍာ်လဵု စမ်ၜတ်ဗီုလဵု လုက်စုက်ဒးဗီုလဵုတုဲမှ ဆဵုဏောၚ်ဂှ် ထၟံက်ထ္ၜးလဝ်ဟွံမွဲပုဟ်၊ ဟိုတ်ဂှ် ရ ဟံၚ်ပ္တိုန်တုဲမှ ပတှေ်မာန်ရောၚ်” သာ်ဝွံ ညးဟီုရ။
ခၞိၚ်ဓမ္မစေတဳဏံဂှ် သောန်လဝ် လက်ထက်သၟိၚ်ဟံသာဝတဳ ဍာံ/ဟွံဍာံ လျိုၚ်ဓရိုတ် ဒး/ဟွံဒး မလိက်မန် တြေံတြဟ် ပါ/ဟွံပါ ဗှ်မလိက် ဂွံ/ဟွံဂွံ အတိုၚ်ကၠုၚ်နူဝၚ် စၟဳစၟတ်တုဲမှ သ္ပအာဒတန်ဂွံရောၚ် နာဲယျေဝ်ဇြဝ် ဟီုရ။
ဥူသာန်လေန်ဂှ်လေဝ် “ကမၠောန်ပိုယ်ကၠောန်မံၚ်လၟုဟ်ဂှ် ဒှ်ကိစ္စမၞိဟ်လဵုမွဲ ချပ်ဟွံမာန် ညးလဵုမွဲကၠောန်ဟွံမာန်ဂှ် ပိုယ်တအ်ကၠောန်မံၚ်ဏောၚ်၊ ပိုယ်တအ်ကၠောန်မံၚ်ဂှ် ကပေါတ်ကောန်ၚာ်တအ် ဝေၚ်ဟွံသေၚ်ပုဟ်၊ ဆဵုဍာံရ ပိုယ်တအ်ဂွံလလောၚ်လဝ်ပရိုၚ်ဏံ” သာ်ဝွံ ညးဟီုကဵုဌာန်ပရိုၚ်ဗၠးၜးမန် IMNA ရ။
နကဵုနဲကဲအခိုက်ကၞာ ဟိုတ်နူပညာပၞုက်ဓလုက်တအ်တုဲ ပံက်ပါၚ်ဟီုဟွံဂွံရ ပိုယ်တအ် ဂွံအခေါၚ်နူ အရိ ယာဝိဇ္ဇာတအ်တုဲမှ ဆဵုလဝ်ဏောၚ်ဂှ် ဂွံလလောၚ်တြးရ သာ်ဝွံ ထၟံက်ထ္ၜးလဝ် ပ္ဍဲလိက်လလောၚ်တြး မာံ ဇြာန်လေန်( မြေပုံ ) ကအ်သံၚ် ဂှ်ရ။
“လ္ၚဵုဂှ် ဒးအလိမ်ဏောၚ်ဟီုမံၚ်ဗီုတေံဗီုဏံတုဲ ကၠုၚ်ဟီုမံၚ်ကဵုပိုယ်တအ်ဂှ် ဟလိုၚ်ရ၊ အတိုၚ်သၟာဗၠိုပ်ဍာ်တံ ဟီု ဆဵုယျဏောၚ်ဂှ် ပိုယ်တအ်ဂွံတီကေတ်ရ၊ ပိုယ်တအ်ဂွံအာဆဵုကေတ် ပ္ဍဲဍာ်တေံဟွံသေၚ်ပုဟ်” ဒု-ဥက္ကဌ ဂကောံကမ္မတဳ ဟံၚ်ခၞိၚ်ဓမ္မစေတဳ နာဲဝေအ်(မေန်အံၚ်) ဟီုကဵုဌာန်ပရိုၚ်ဗၠးၜးမန် IMNA ရ။
အခိၚ်လၟုဟ် နူဂကောံဟံၚ်ခၞိၚ်ဂှ် ခၞိၚ်ညံၚ်ဂွံစိုပ်လ္တူုကုန်မာန် ပတိုန်ထ္ၜးကဵု အလဵုအသဳရးဒေသလ္ဂုၚ်တုဲ ကမၠောန် သွက်ဂွံဟံၚ်ပတိုန်ဂှ် ပလေဝ်ပလေတ်မံၚ်ဖိုဟ် သာ်ဝွံ ညးဆက်ဟီုရ။
လက်ထက်သၟိၚ်မန် ဓမ္မစေတဳဂှ် သောန်လဝ်ခၞိၚ်ဓရိုတ် လျိုၚ် (၃၀၀၀) နွံတုဲ ဂွံဗၠိုက်စှေ်အာ ပ္ဍဲကြုၚ်ဏံ ဂွံ ထံက်ထ္ၜးကဵုဂှ် ဝၚ်ဟွံမွဲပုဟ်၊ ယဝ်ရ ညးတအ်ဟီု ဆဵုအာခၞိၚ်ဍောတ်တ်ဏောၚ်တှေ် ဒှ်ကမၠောန်ကၠောန် ကေတ်ရောၚ် သာ်ဝွံ နာဲယျေဝ်ဇြဝ် ဟီုရ။
ပွမဂၠာဲခၞိၚ်သၟိၚ်ဓမ္မစေတဳဂှ် ဂွံအခေါၚ်နူ အလဵုအသဳရးဒေသလ္ဂုၚ်ရ ပ္ဍဲဂိတု ဂျူလာၚ် ၉ ဂှ် စဂၠိုက်ဂၠာဲတုဲ ညးပါလုပ် ဂကောံဟံၚ်ခၞိၚ် ရ၀ တၠ ကဵု သၟာဗၠိုက်ဍာ်ဆလုံ ၁၀ တၠတအ် ပါလုပ်မံၚ်ရ။
