“လိခ်ဗွဟ်တြေံဂှ် နွံမံၚ်ကီုလေဝ် သွက်ကွးဘာတံ ဝါတ်မံၚ်ဏောၚ်၊ သာသာဍာဍာ ဟွံသေၚ်ပုဟ်၊ လျိုၚ်ဍိုက်မံၚ်ကွေံကွေံဏောၚ်။ လိခ်ဗွဟ်လၟုဟ်ဏံ နွံမံၚ်နူတန်ကောန်ၚာ် စိုပ်ဒဵုတန်ဒုတိယဓဝ်ရ” သာ်ဝွံ ညးပါလုပ်ဂကောံ ချူခၞံဇုတ်ဟရံၚ်ဗတောန်လိခ်မန် အစာ နာဲရတ်ဂကူ ဟီုရ။
အလဵုအသဳ တွဵုရးဍုၚ်မန် ကဵုအခေါၚ်ဗ္တောန်လိက်မန် ကဆံၚ်တန်မူလဒှ်တုဲ သွက်ဂွံချူခၞံဇုတ်ဟရံၚ်ဗတောန် တန်တတိယ ကဵု တန်စတုတ္ထ သှေ်မံၚ်ဏီဂှ် အစာ နာဲရတ်ဂကူ ဆက်ဟီုရ။
သွက်ဂွံ ချူခၞံဇုတ်ဟရံၚ်ဗတောန် ဘာသာလိက်မန်ဂှ် အလဵုအသဳတွဵုရးမန် ဒက်ပတန်ကဵုကမ္မတဳဓဇက်မွဲတုဲ အပ္ဍဲဂှ် ဌာနပရေၚ်ပညာ၊ အ္စာတက္ကသဵုဂမၠိုၚ်၊ သၞာဲဒဴပရေၚ်ပညာဂမၠိုၚ်၊ ပူဂဵုကေၚ်ဆဵုဂဗနွံပရေၚ်ဗ္တောန်လိခ်တံ ပါလုပ်တုဲ လိက်သ္ကေံတဲအ္စာကီု နဲကဲဂွံဗ္တောန်ဂမၠိုၚ်တံကီု ညံၚ်ဂွံဂတာပ် သၞာံဂတးဏံဂှ် ချူခၞံရောၚ် ဟီုလဝ်ရ။
“တၚ်ရန်တၟံပိုဲဂှ် သွက်ဂွံဗှ်လိက်လေပ်ကီု၊ တုဲတှေ် ဗီုကောန်ၚာ်ကတ်လိခ်ဗၟာတံဂှ်ကီု မုဒးစုတ် skills ပရေၚ်စီုသကီု သာ်လဵုရော၊ ညံၚ် skills တံဏံဂွံပါမာန်ဂှ် မဗ္တံ child psychological တံဂှ်လေဝ် ခၞံစုတ်အာဏောၚ်။ ဒုၚ်သ္ဇိုၚ်ကဵုတၚ်တံဏံတုဲ လိက်စၞောန်တံဂှ် တိတ်ကၠုၚ်ဏောၚ်၊ လိက်ဗ္တောန် နူဘာထိၚ်ဒဝ် ဒဵုစိုပ်တန်စတုတ္ထဂှ် တိတ်ကၠုၚ်ဏောၚ်၊ အခါရတိတ်ကၠုၚ်တှေ် သွက်အစာဒးဗ္တောန်တံဂှ် လိက်သ္ကံတဲအ္စာ ပိုယ်တံဒးပတိတ်မံၚ်ဏီ။ နဲကဲ ဂွံဗ္တောန်ဂှ်လေဝ် ပိုယ်တံ ကဵုတန်ဗ္တောန် ဏောၚ်၊ တန်ဗ္တောန်ဂှ် နွံပၟိက်ကွေံကွေံ” သာ်ဝွံ အလဵုအသဳတွဵုရးဍုၚ်မန် ဝန်ဇၞော်ကိုန်အစီအဇန်ကဵု/ပရေၚ်ပိုန်ဒြပ် ဒံက်တာ မာံနဲသဵု ဟီုရ။
“မွဲတ္ၚဲဂှ် အခိၚ်ဗ္တောန်လိက်နွံမံၚ် ၈ အခိၚ်ရဏောၚ်၊ လိက်မန်ဗ္တောန်ကဵုမွဲတ္ၚဲမွဲအခိၚ်တှေ် သွက်ကောန် ၚာ်တံလေဝ် ဂွံခက်ခိုအ်အာကဵု academic subject ဟွံမွဲပုဟ်” သာ်ဝွံ အစာနာဲရတ်ဂကူ ဟီုရ။
ပ္ဍဲတွဵုရးဍုၚ်မန်ဂှ် ပွိုၚ်ဍုၚ်ပံၚ်၊ သဓီု၊ ၜါသွာၚ်၊ ပွိုၚ်ကျာ်မြဟ်၊ ဍုၚ်မတ်မလီု၊ မုဟ်ဍုၚ်၊ ဇြပ်ဗု၊ ရေဝ်တံ ဘာအလဵုအသဳဗ္တောန်လိက်မန်ဂှ် နွံမံၚ် ၃၂၈ ဘာတုဲ ကွးဘာၜိုတ် ၄၈၀၀၀ ပြၚ် ဗ္တောန်အာမာန်ရောၚ် ဂွံတီရ။
