ပ္ဍဲတွဵုရးဍုၚ်မန် ကွးဘာ ၃ လက်ပြၚ် ဗ္တောန်မံၚ်လိက်ကောန်ဍုၚ်အရၚ်

by | Dec 12, 2014 | ပရိုၚ် | 0 comments

ပ္ဍဲတွဵုရးဍုၚ်မန် သၞာံပညာဗ္တောန်လိက်ဏံဂှ် ကွးဘာ ၃ လက်ပြၚ် ဗ္တောန်မံၚ်လိက် ကောန်ဍုၚ်အရၚ်နွံရောၚ် သာ်ဝွံ ဂကောံအလဵုအသဳတွဵုရး၊ ညးဒုၚ်လျိုၚ်ပရေၚ်ယေန်သၞာၚ်၊ ဝန်ဇၞော်ပရေၚ်ပိုန်ဒြပ်ကဵု ကိုန်စဳမာန် ဒံက်တာ မေန်နဲသဵု ဟီုရ။

“မွဲအလုံတွဵုရး နူသၞာံတုဲကၠုၚ်တေံ မၞိဟ်ဗ္တောန်လိက် ကရေၚ် “သကော်” (၄၅၀၅) တၠ၊ သၞာံဏံ (၉၂၂၂)တၠ၊ လိက်ကရေၚ် “ပိုး” ဗၟံက် နူ (၃၆၃) တၠဂှ် သၞာံဏံ (၃၀၅၀) တၠ၊ နူသၞာံတုဲကၠုၚ်တေံ လိက်ပအိုဝ်ဂှ် (၁၆၆၅) တၠ၊ သၞာံဏံ (၁၃၇၀)တၠ၊ နူသၞာံတုဲကၠုၚ်တေံ မၞိဟ်ဗ္တောန်လိက်မန်ဂှ် (၂၀၀၉၅)တၠ၊ သၞာံဏံ (၁၉၃၆၉)တၠ၊ ဗ္တောန်ကဵုမံၚ်ဖိုဟ်ရ” သာ်ဝွံ ဝန်ဇၞော် ဟီုရ။

ပ္ဍဲဂိတုဒဳဇြေန်ဗာ ၂၊ ၃၊ ၅၊ ကၠောန်သ္ပလဝ်ပေဲါကောံဓရီု ကၠတ်ထဝ်တွဵုရး (အလန်ပထမ)၊ ကောံဓရီုလၟိုန် ဒဿမ၊ တ္ၚဲပထမဂှ် ဆေၚ်စပ်ကဵုသ္ဇိုၚ်ဗ္တောန်လိက် ကောန်ဍုၚ်အရၚ်ဏံ နူကဵုညးစၞး စၠတ်ထဝ် ပွိုၚ်ဍုၚ်ၜါသွာၚ် ဒံက်တာအံၚ်နာၚ်ဥူ သၟာန်လဝ်တုဲ ဝန်ဇၞော်ကလေၚ်သှ် ကဵုရ။

ၜိုန်ဂှ်လေဝ် ၜိုတ်လၟိဟ်ကွးဘာဂၠိုၚ်မံၚ်တံဂှ် အ္စာဘာဗ္တောန်မံၚ်ကဵုလိက် ဘာသာကောန်ဍုၚ်အရၚ်တံ နူကဵုအလဵုအသဳ ထံက်ပၚ်ကဵုလဝ် ဟွံသေၚ်၊ နကဵုအစဳဇန်ကောန်ဍုၚ်အရၚ် မၞုံဗ္ဒာဲဗ္ဒာဲတံဂှ်ရ ဗ္တောန်မံၚ်ကဵုရောၚ် ဂွံတီကေတ်ရ။

အလုံတွဵုရးဍုၚ်မန်မွဲ သၞာံဗ္တောန်ပညာ ၂၀၁၃-၂၀၁၄ တုဲကၠုၚ်တေံ အ္စာဘာဗ္တောန်ကဵု လိက်ကောန်ဍုၚ်အရၚ်ဂှ် နူကဵုအလဵုအသဳ ကဵုကၠုၚ်အထံက်အပၚ် အ္စာဘာ (၃၂) တၠ ဟေၚ်နွံတုဲ၊ ပ္ဍဲသၞာံ ၂၀၁၄-၂၀၁၅ ဏံ အ္စာဘာဗ္တောန်လိက်တံ ဗၞတ် (၈၂) နွံရောၚ်၊ ဝန်ဇၞော် ဟီုရ၊ ၜိုန်ဂှ်လေဝ် အ္စာဘာတံ ဗ္တောန်မံၚ်လိက်သၞာံဏံဂှ် အထံက်ပၚ်ဟွံမွဲဏီရောၚ် ဂွံတီကေတ်ရ။

“လၟုဟ်ဘာဗ္တောန်လိက် နွံမံၚ်ပ္ဍဲပွိုၚ်ဍုၚ်ၜါသွာၚ် ဗၞတ် ၃၇ ဘာ၊ အ္စာၝောံ ၈၀ တၠပြၚ်တံဂှ် ဒဵုကဵုတ္ၚဲဏံ ဟွံဂွံကၠုၚ် အထံက်ပၚ်ဏီပုဟ်’’ သာဝွံ ဒံက်တာအံၚ်နာၚ်ဥူ ဟီုရ။

သွက်အစာဘာ ၈၂ တၠ၊ ဗ္တောန်မံၚ်လိက် ဘာသာကောန်ဍုၚ်အရၚ် လ္တူတေံ ဂွံဒုၚ်စသိုၚ် အလဵုအသဳထံက်ပၚ်တံ သြန်ထံက်ပၚ် (၁၇,၃၈၂,၀၀၀) ဂှ် ညံၚ်ဂွံပါ်ပရအ်ကဵုမာန် ပ္ဍဲဂိတုအံက်တဝ်ဗာ ၃၀ တေံ ပတိုန်ထ္ၜးအာတ်မိက်လဝ် ဒၞာဲဌာနအာက္ဍိုပ် သ္ဇိုၚ်ပညာ စၟတ် (၁) တုဲ၊ ယဝ်ရ ပါ်ပရအ်ကဵုတှေ် ထံက်ပၚ်အာမွဲပလိုဟ်ဓဝ်ဏောၚ် သာ်ဝွံ ဝန်ဇၞော်ဟီုရ။

ပ္ဍဲသၞာံဗ္တောန်ပညာ ၂၀၁၄-၂၀၁၅ ဏံ၊ ဌာနပရေၚ်ပညာ ကောန်ဂကူမန် မၞုံသၟဝ်တဲ ဗော်ဍုၚ်မန်တၟိ၊ နွံမံၚ် ပ္ဍဲတွဵုရးမန်၊ တွဵုရးကရေၚ်၊ ရးတနၚ်သဳ ဘာကောန်ဂကူမန် နွံဗၞတ် (၁၄၂) ဘာ၊ ဘာပံၚ်နှဴကဵု ဘာအလဵုအသဳ နွံဗၞတ် ၁၀၇ ဘာ၊ အ္စာဘာပံၚ် ၈၀၀ ပြၚ်ကဵု ကွးဘာဗၞတ် ၃ လက်ပြၚ်နွံတုဲ၊ လ္တူနူဂှ် ၜိုတ်ကဝက်ပြၚ်ဂှ် နွံမံၚ်ပ္ဍဲတွဵုရးဍုၚ်မန်ရောၚ် သာ်ဝွံ အတိုၚ်နွံပ္ဍဲစရၚ်အၚ် စၟတ်သမ္တီ ဂွံတီကေတ်ရ။

ဗီုဂှ်ကီု ဘာဗ္တောန်လိက်ပတ် ကရေၚ် “သကော်”၊ လိက်ပတ်ကရေၚ် “ပိုး” ဗၟံက်ကဵု ဘာဗ္တောန်လိက်ပအိုဝ် လ္ၚဵုဂှ်လေဝ် နကဵုအစဳဇန်ဇကုဇကုဟေၚ် ဗ္တောန်မံၚ်ကဵုရ။

ပ္ဍဲတွဵုရးဍုၚ်မန် ဘာဗ္တောန်လိက် ကရေၚ် “သကော်” ဂှ် မၞုံဒၞာဲပွိုၚ်ဍုၚ်ၜဳက္လေၚ်၊ ၜါသွာၚ်၊ ဇြပ်ဗုကဵု ပွိုၚ်ဍုၚ်ရေဝ်တံကီု၊ လိက်ကရေၚ် “ပိုး” ဗၟံက်ဂှ် ပွိုၚ်ဍုၚ်ၜဳကလေၚ်၊ ပံၚ် ကဵု ကျာ်မြဟ်တံကီု၊ လိက်ပအိုဝ်ဂှ် ပွိုၚ်ဍုၚ်ၜဳကလေၚ်၊ သဓီု ကဵု ပံၚ် တံဂှ်ကီု၊ လိက်မန်ဂှ် ပွိုၚ်ဍုၚ်ပံၚ်၊ မတ်မလီု၊ ၜါသွာၚ်၊ ကျာ်မြဟ်၊ မုဟ်ဍုၚ်၊ ဇြပ်ဗုကဵု ပွိုၚ်ဍုၚ်ရေဝ်တံ ဗ္တောန်ကဵုမံၚ်ရ။

လိက်ကောန်ဍုၚ်အရၚ်ဂှ် ဘာသ္ဇိုၚ်ပညာ ဆေၚ်ကဵု ဗ္တောန်မံၚ်အဆံၚ်မူလဂှ် နကဵုဝန်ဇၞော် ဒုၚ်လျိုၚ် ပရေၚ်ယေန်သၞာၚ်မွဲ၊ သၞာံဏံ ပ္ဍဲဂိတုဂျောန်ဂှ် ကမ္ပတဳပညဳပညပ် ပရေၚ်ဗ္တောန်လိက် ဘာသာကောန်ဍုၚ်အရၚ် နွံပ္ဍဲပွိုၚ်ဍုၚ်တံ၊ နူကဵုဘာသ္ဇိုၚ်ပညာ ဂအုပ်ဘာတံ၊ အ္စာဘာတံ၊ ဂအုပ်ပရေၚ်ပညာပွိုၚ်ဍုၚ်တံ ဆဵုဂဗသဳကၠဳအာရောၚ်။

Written by

Related Posts

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

ပ္ဍဲစင်အသေအဟာန်တ္ၚဲကောန်ဂကူမန် လ္ဒောဝ်တပ်တပ်ဂှ် ဒးပစူသၠုင်လဝ်အလာံကၟိန်ဍုင်ရောင် ဂျာန်နဝါရဳ ၃ တုဲ ကၠုင်ဂှ် နူကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင်လိက်စေဝ်ပၞောန် စပ်ကဵုအလာံတုဲ မၞိဟ်လ္ၚဵုဟွံ ပေင်စိုတ်ရ။

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲကဵုသၞာံ ၂၀၂၅ ဏံ ညံၚ်မိမညးဍုၚ်ကွာန် ကေုာံ သၟတ်ကွးဘာမန်တအ် သ္ဂောံစကာအာ လိခ်ပတ်မန် လတူလပှ်ကျာမာန်ဂှ် နကဵုညးတာလျိုၚ်ဌာနကမၠောန်ပတိုန်လိခ်ပတ်မန် လတူဓါတ်လပှ်ကျာ ဘာကဝ်လိက်မန်တအ် ဂစာန်ကၠောန်မံၚ် (Mon E-book project) မွဲနွံဂှ် ဂွံတီကေတ်ရ။

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

ကြဴနူကဵု ကမ္မတဳကၠောန်ဗဒှ်တ္ရဲကောန်ဂကူမန် မရနုက်ကဵု (၇၈)ဝါ ဗဟဵုတံ ပတိတ်ကၠုင်လိက် စေဝ် ပၞောန် အလာံပ္ဍဲတ္ရဲကောန်ဂကူမန်ဂှ်တုဲ ညးဂမၠိုင် ဟီုပါ်ပါဲကၠုင်နွံရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.