ဟိုတ်နူသ္ၚိတူအာပၟတ်တုဲ မၞိဟ်သှေ်မံၚ်တံ ဂွံမံၚ်စံၚ်တန်တဴအာမာန်ဂှ် မှာဇန်ညးဍုၚ်ကွာန်တံ ကဵုမံၚ်အရီုဗၚ်ထံက်ပၚ် ကပေါတ်နာနာ သီုကဵုသြန် ဗၞတ်ထေက်ကြိုက်နွံရောၚ် သာ်ဝွံ ဥက္ကဌ ဂကောံသၟတ်ကွာန်သၞေဟ်ဗ္ဒဝ် နာဲနာၚ် ဟီုကဵုဌာန်ပရိုၚ်ဗၠးၜးမန် (IMNA) ရ။

ဂိတုဂျာန်နဝါရဳ ၃ အခိၚ်ဗ္တံ ၜိုတ် ရ နာဍဳ ပြၚ်ၚ်ဂှ် ဟိုတ်နူပၟတ်ၜံက် ပြဟ်စှေ်အာလ္တူဖုန်ဂှ် ကၠောံအာသီုသ္ၚိတုဲ ဒၞာဲကွာန်သၞေဟ်ဗ္ဒဝ် အရာပ်ပလိုတ် သ္ၚိတူအာပၟတ် ၜိုတ် ၁၂ မ ဂွံတီကေတ်ရ။

နာဲနာၚ် ဂှ်＂ပိုယ်တံဂှ်တှေ် တၠဒါန်နူတၞဟ်ဟ်တံကၠုၚ်မ္ဂး ပိုယ်တံဘိုၚ်ရေၚ်တၠုၚ်ကဵုညးတံ၊ လၟုဟ်ပြဟ်ဟ်ဏံ သွက်မၞိဟ်သ္ၚိဟွံမွဲတံဂှ် ပိုယ်တံ တက်လဝ်ကဵုသ္ၚိတာဲ၊ တော်ကဵုအလန်ကၠာကၠတေံတှေ် လၟုဟ်မၞိဟ်ကဵုဒါန်ဂၠိုၚ်ကၠုၚ်လေဝ်၊ မၞိဟ်မွဲဒှ်ဒဒိုက် ကောန်ဂကူဇကုဒှ်ဒဒိုက်တှေ် ဘိုၚ်ရီုဗၚ်ထံက်ပၚ်ကဵုညိ＂သာ်ဝွံ ညးဟီုရ။

ပ္ဍဲအရာဏံဂှ်တှေ် နူတဏေံတေံ ဂကောံသၚ်သၟတ်အနာဂတ်မန် ကၠုၚ်ကဵုဒါန် ထံက်ပၚ်သြန်၊ လၟုဟ်ပြဟ်ဟ်ဏံ ဂကောံကၠုၚ်ကဵု လဝ်စရၚ်ဂှ်တှေ် ဂကောံမိစဴဗု ညးတံကဵုဒါန်သ္ၚုဏောၚ်၊ ဂကောံပွိုၚ်ဍုၚ်တေံလေဝ် ညးတံ ကဵုဒါန်ဂၠိက်ယာတ် ထၟာဲပုၚ် သြန်တံဏောၚ်၊ တော်ကဵုကၠာကၠာ တေံတှေ် လၟုဟ်ဂှ် မၞိဟ်ဒှ်ဓဝ်ဆာန်ဍူတံဂၠိုၚ်ကၠုၚ်၊ တၠဒါန်တံ ဂၠိုၚ်တိုန်ရဂှ် နာဲနာၚ် ဆက်ဟီုရ။

နူကဵုဂကောံကၠုၚ်ကဵုဒါန် ကုညးဒှ်ဒဒိုက်သ္ၚိတူပၟတ် ဂကောံသၚ်သၟတ်မန်မွဲဇကု တၠဂုဏ်ချေတ်ဂှ်＂ဂကောံသၚ်သၟတ် အနာဂတ်မန်ပိုယ်တံကီု၊ သီုပူဂိုလ်လေဝ်ပါ ၜိုတ်ထေက်ကြိုက် ၜိုတ်ပိုယ်ရီုဗၚ်မာန်ဂှ် ပိုယ်ရီုဗၚ်ကဵု၊ ဆဂး မၞိဟ်တၠဒါန်တံ အောန်မံၚ်ဏီ၊ ပိုယ်တံဂှ်တှေ် မိက်ဂွံဆဝ်မ္ၚုဟ်ကဵု ညးတၠဒါန်တံလေဝ်၊ ပိုယ်မိက်ဂွံဟီုဂှ် လ္ပရုဲဂကူ လ္ပရုဲဒကာညိ၊ မၞိဟ်မွဲဒှ်ဒဒိုက်တှေ် ဒးရီုဗၚ်ထေက်ဏောၚ်＂ သာ်ဝွံ မြော်ဟီုရ။

ဒြပ်ရတ်လေၚ်အာတံဂှ် တော်ကဵုဗွဲယေဘုယျတှေ် ၜိုတ် အကြာ ၅ လ္ၚီကိုဋ်ကဵု ၆ လ္ၚီကိုဋ်ဒှ်ဏောၚ်၊ ညးတံဂှ် ဒှ်မံၚ်မၞိဟ်ဇၞော်ဇၞော်ဖအိုတ်တှေ် အာယုက်လေဝ် ၅၀ လ္ပာ်လ္တူသၟးဂၠိုၚ်၊ တော်ကဵုအကာဲ အရာတ္ၚဲဏံ ကၠောန်ကေတ်တၟိလေဝ် ဂွံစိုပ်သၞောတ်တြေံဂှ် ဍေံဟွံဒှ်၊ ၜိုတ်ပမာန်ကဵုမာန် ဒးဘိုၚ်ရီုဗၚ်ထေက်ဏောၚ်ဂှ် ကျာ်ဇၞော်အ္စာဆက်မြော်ဟီုရ။

နူဂိတုတုဲဒဳဇြေမ်ဗာ ၃၀၊ သၞာံ ၂၀၁၄ လောန်ကၠုၚ်ဏံ လ္တူဍုၚ်မတ်မလီု အရာပ်ဇြေဂျဵုဂှ် ဆေၚ်ကၠေၚ် KS ကေၚ်တူလဝ်ပၟတ်နွံတုဲ လၟုဟ်ဒၞာဲကွာန်သၞေဟ်ဗ္ဒဝ် ပွိုၚ်ဍုၚ်မုဟ်ဍုၚ်ဏံ သ္ၚိကလေၚ်တူအာ ၁၂ မပၠန်ရောၚ် ဂွံတီကေတ်ရ။