သၞံၚ်တိုၚ် – ပ္ဍဲစရၚ်အံၚ် ကလေၚ်ပထမအလဵုအသဳ တန်ဍောတ်၊ တန်ဒေါဝ်၊ တန်ဇၞော်တံဂှ် ပ္ဍဲသၞာံဏံ လၟိဟ်ပရေၚ်အံၚ်ဇၞး သၠုၚ်တိုန်ကၠုၚ်ရောၚ် အ္စာလိက်တံဟီုရ။

စရၚ်အံၚ်“စရၚ်အံၚ်သၞာံဏံ အံၚ်ဂၠိုၚ်တိုန်၊ ၜိုတ်တဲဒေါဝ် ဟီုစဂွံလေဝ်၊ (အောၚ်ချက်) ဗီုဏအ်တှေ် အံၚ်ပကတိ ဓမ္မတာမွဲရ။ တော်ကဵု (၂) သၞာံတုဲကၠုၚ်တေံတှေ် တၞဟ်ခြာကွေံကွေံလေဝ်။ မၞိဟ်ဗှ်မံၚ်လိက်တှေ် အံၚ်မံၚ်ဖအိုတ်ရ။ ဂၠိုၚ်အာနူဏံလေဝ် ဟွံခိုဟ်ပုဟ်။ အောန်အာနူဏံလေဝ် ဟွံခိုဟ်ပုဟ်။ လၟုဟ်ဏံ အံၚ်ၜိုတ်အဃောခိုဟ်ရ” သာ်ဝွံ ကျာ်ဇၞော်အ္စာ ခေမာနန္ဒ ဘာတိုက်လိက်ပရိယတ္တိ နန္ဒဝိုန် ဍုၚ်ဇြပ်ဗု ဟီုမြော်ရ။

စနူကဵုသၞောဝ်သွဟ်လိက်ကဆံၚ်ကၟိန်ဍုၚ် ဒှ်အာမူမွဲတုဲ (၂) သၞာံအဆက်က်တုဲကၠုၚ်ဂှ် ပုစ္ဆာကဆံၚ်သၠုၚ်အာကီု ပရေၚ်မူဝါဒကီု သၚ်ကတ်လိက်တံ ပရေၚ်အံၚ်ဇၞးသဝ်စှေ်အာရောၚ်။ ပ္ဍဲသၞာံဏံ ပရေၚ်အံၚ်ဇၞး ၜိုန်ရသၠုၚ်တိုန်ကီု လေဝ် ညးသ္ပလွဳအောန်တံ ကျအာလၟိဟ်ဟွံအောန်ဏီရောၚ် ညးဆက်ဟီုရ။

ဂိတုဂျောန် (၂၆) သၞာံဏံ ဂှ် နူကဵုဌာနဝန်ဇၞော်ပရေၚ်သာသၞာ လလောၚ်တြးစရၚ်အံၚ် ကလေၚ်ပထမအလဵုအသဳဂှ် ပ္ဍဲတွဵုရးဍုၚ်မန် တန်ဍောတ် လုပ်သွဟ် (၁၉၈၈) ဇကုဂှ် အံၚ် (၄၈၄) ဇကု အံၚ်ဇၞး (၂၄ ဒသမ ၃၅) က္ဍိုပ်ကၠံကီု တန်ဒေါဝ် လုပ်သွဟ် (၈၀၇) ဇကု အံၚ် (၃၂၅) ဇကု အံၚ်ဇၞး (၄၀ ဒသမ ၂၇) က္ဍိုပ်ကၠံကီု တန်ဇၞော် လုပ်သွဟ် (၆၈၉) ဇကု အံၚ်ဇၞး (၁၆၄) ဇကု အံၚ်ဇၞး (၂၃ ဒသမ ၈) က္ဍိုပ်ကၠံတုဲ အလုံတွဵုရးမန်ဂှ် ပရေၚ်အံၚ်ဇၞး (၂၇ ဒသမ ၃၃) က္ဍိုပ်ကၠံရောၚ်။ အလုံကၟိန်ဍုၚ်ဂှ် လုပ်သွဟ် တန်သီုဖအိုတ် (၄၅၉၇၂) ဇကု အံၚ်ဇၞး (၁၂၃၃၄) ဇကု ပရေၚ်အံၚ်ဇၞး (၂၆ ဒသမ ၈၃) က္ဍိုပ်ကၠံရောၚ်။

ဂိတုတုဲကၠုၚ်တေံ ပ္ဍဲကောံဓရီုသၚ်ဗုဒ္ဓဘာသာ အလုံဂၠးကဝ် ကၠောန်ဗဒှ်ပ္ဍဲဍုၚ်သေံဂှ် သၚ်မန်သ္ပစၞးရာမညနိကာယ ဂွံအခေါၚ်တိုန်စိုပ်လဝ် (၃) ဇကုကီုရ။ ပ္ဍဲပေဲါသဳကၠဳဂှ် ဂွံအခေါၚ်ဆဵုဂဗကဵု သံဃရာဇ်ဍုၚ်သေံတုဲ သွက်သၚ်မန် ဂွံဆက်ကတ်အာပညာတက္ကသိုလ် ပ္ဍဲဍုၚ်သေံလေဝ် ဂွံလဝ်အဆက်ကီုရောၚ် ကျာ်ဇၞော်အ္စာသဳလာစာရ ဘာဗ္ဂောပရိယတ္တိ ဟီုလဴစကဵုသၞံၚ်တိုၚ်ရ။

“ဂကောံရာမညဓမ္မစရိယ အလုံဒေသရးမန်ဏံ ယဝ်ရအံၚ်တန်ဇၞော်တှေ် အဆံၚ် (B.A) လုပ်အတေံဂွံ၊ အံၚ်ဓမ္မာစရိယတှေ် လုပ် (M.A) အတေံဂွံ၊ ၜိုတ်ဂှ်တှေ် ပိုဲအာတ်ကေတ် ဍေံတံဒုၚ်လဝ်တဲ” သာ်ဝွံ ကျာ်ဇၞော်အ္စာသဳလာစာရ ဆက်မြော်လဝ်ရ။

သၞာံတုဲကၠုၚ်တေံဂှ် စရၚ်အံၚ်ကလေၚ်ပထမ တွဵုရးဍုၚ်မန်ဂှ် (၁၂ ဒသမ ၈၈) က္ဍိုပ်ကၠံ အံၚ်ဇၞးကၠုၚ်တုဲ အလုံကၟိန် ဍုၚ်ဂှ် (၁၃ ဒသမ ၂၃) က္ဍိုပ်ကၠံ အံၚ်ဇၞးကၠုၚ်လဝ်တုဲ နူကဵုပကောံသွဟ်လဝ်ဗဟဵု ပွိုၚ်ပိသၞာံဂှ် သၞာံဏအ် အံၚ်ဇၞး သၠုၚ်အိုတ်ရောၚ်။