သၞံၚ်တိုၚ် – ပ္ဍဲကဵုကွာန်သ္ၚိကျာ(ပ္ဍဲ)၊ ပွိုၚ်ဍုၚ်ပါ်ခေါဇာ၊ ပွိုၚ်ဍုၚ်ရေဝ်သၠုၚ်ကျာဂှ် ပၞာန်မၚ်ကွာန်ကဵုက္ဍိုပ်ဒမၠ “မန်ဆာန်” တံ ဒှ်ပေဲါဗ္တိုက်ညးသ္ကံတုဲ လ္ပာ်ဒပ်ပၞာန်မၚ်ကွာန် ဒး

အာဝပ် မၞိဟ် (၂) တၠရောၚ် ဂွံတီကေတ်ရ။

ပ္ဍဲဂိတုအဝ်ဂေတ် (၂၅) အခိၚ်ပယျဵုယး ၜိုတ် (၃) နာဍဳဗ္တံဂှ် က္ဍိုပ်ဒမၠ “မန်ဆာန်” တံ လုပ်စိုပ်ကၠုၚ် ဒၞဲါဒပ် ပၞာန်မၚ်ကွာန်ဖျေံလဝ်သ္ဇိုၚ် သ္ၚိဒၟံၚ်နာဲထောန်သိုၚ် ကွာန်သ္ၚိကျာဂှ်တုဲ ဒှ်ပေဲါဗ္တိုက်ပန်ညးသ္ကံရောၚ် ညးဒေ သ ဟွံမိက်ဓမံက်ယၟုမွဲတၠ ဟီုလဴကဵုသၞံၚ်တိုၚ်ရ။

“လ္ပာ်က္ဍိုပ်မန်ဆာန်တံဂှှ်တှေ် မၞိဟ်ဍေံ (၅) ဟွံသေၚ်တှေ် (၇) တၠဒှ်ဏောၚ်၊ တၠသ္ၚိနာဲထောန်သိုၚ်ဂှ် တိက် မံၚ်လ္တူသ္ၚိ၊ ကောန်ရဲတံဂှှ် တိက်မံၚ်ကဵုခရေၚ် ပ္ဍဲတိရ၊ အခိၚ်နူဂယး ၜိုတ် (၃) နာဍဳဂှ် ဒှ်ပေဲါဗ္တိုက်တုဲ ဒပ်ပၞာန်မၚ်ကွာန် ၝတိက်မံၚ်ပ္ဍဲတိတံဂှ်ရ ဒးအာဝပ်၊ ပရိုၚ်မိၚ်မံၚ်ဂှ် (၃) တၠလေဝ်၊ ဆဂး ကာလဆဵု ဍေံ ဓရိပ်ပ္တိုန်ဏာရုၚ်ဂဥုဲဂှ် (၂) တၠရ ဒးအာလွဟ်” သာ်ဝွံ ဟီုထ်ၜးရ။

ညးမဒှ်တၠသ္ၚိနာဲထောန်သိုၚ်ဂှ်လေဝ် ဒှ်ညးလုပ်မံၚ်ဂကောံပ္ဍဲဒပ်ပၞာန်မၚ်ကွာန်ဂှ်မွဲကီုတုဲ အခိၚ်ဒှ်ပေဲါဗ္တိုက်ဂှှ် လ္ပာ်က္ဍိုပ်ဒမၠ “မန်ဆာန်” ဒးဝပ် ဟွံမိၚ်ပရိုၚ်မွဲသာ်ရောၚ် ညးဆက်ဟီုရ။

ညးမဒးအာဝပ် (၂) တၠ လ္ပာ်ဒပ်ပၞာန်မၚ်ကွာန်ဂှ် မၞုံယၟုအကြက်ကဵုအဍောတ်တုဲ အဍောတ်ဂှ် ဟိုတ်နူဒး လဝ်ဝပ်ဂၠိုၚ်မံၚ်ဂှ်ရ ဒးပ္တိုန်ဏာရုၚ်ဂဥုဲမတ်မလီုရောၚ် ပ္ဍဲမုက်လိက်လပှ်ကျာ ပရေၚ်မၞိဟ် အံၚ်နာၚ်ဝေန် ဍုၚ် ရေဝ် ပ္တိုန်လဝ်ဂှ် ဂွံတီကေတ်ရ။

“မုဟိုတ်ဍေံဂွံလုပ်ပန်ဂှ် ဟွံတီလေဝ်၊ ဆဂး သွက်သၞာံ ၂၀၁၅ ဏံ ပိုဲဂွံတိတ်ကၠောန်စကၠအ်ဇကုဂွံဂှ် ဒးကဵု လဝ်ဍေံ (က္ဍိုပ်ဒမၠမန်ဆာန်) တံ သြန်အကံက်တုဲယျ” သာ်ဝွံ ညးဒေသလ္ပာ်မၚ်ဂၠန်၊ သ္ၚိကျာမွဲတၠ ဟီုရ။

ပ္ဍဲကဵုဒေသဂတှေ်ကွာန်မၚ်ဂၠန်၊ သ္ၚိကျာ၊ မိထဝ်လှာတံဂှ်ဝွံ သ်အာၚ်နူက္ဍိုပ်ဒမၠ “မန်ဆာန်” ဏံဂှ် နကဵုယၟု “အလောန်” လေဝ်နွံမံၚ်မွဲက္ဍိုပ်ဏီတုဲ ပြဟ်ဟ်ဏံ ပရေၚ်ချဳဒရာၚ် က္ဍိုပ်ဒမၠ “အလောန်” တံဂှ် ညိၚ်ဝတ် မံၚ်ဏီရ။

ဒုၚ်သ္ဇိုၚ်ကဵုပရောက္ဍိုပ်ဒမၠတံဂှ်တုဲ ကွာန်လုပ်မၞုံဒၟံၚ်အပ္ဍဲဂကောံကွာန်မၚ်ဂၠန်၊ ဂကောံကွာန်ကြုၚ်ကညာ ပွိုၚ်ဍုၚ်ပါ်ခေါဇာတံ သွက်ဂွံဂီုကၠီုမၚ်မွဲကဵုကွာန်မာန်ဂးတုဲ ဒပ်ပၞာန်မၚ်ကွာန်ဂှ် မံက်ဒှ်ကၠုၚ် ပ္ဍဲအခိၚ်လ္ဒောဝ် သၞာံ ၂၀၁၅ ဏံရ။

က္ဍိုပ်သ္ကိုပ် ဂကောံဒပ်ပၞာန်မၚ်ကွာန်ဂှ် နာဲလေန်ဥူ မဒှ်ညးကေၚ်ယိုက်ဂၠေၚ်ကေတ်လဝ်တာလျိုၚ် ပ္ဍဲဒပ် ပၞာန် ခမရ ၃၄၃ နဒဒှ်ဗိုလ်ဇၞော်တြေံမွဲတၠတုဲ အခိၚ်ဒှ်ပေဲါဗ္တိုက်ပ္ဍဲကွာန်သ္ၚိကျာဂှ် နာဲလေန်ဥူ ဗက်ချဳဒရာၚ် စိုပ်မံၚ်လ္ပာ်ဂကောံကွာန်ကြုၚ်ကညာရောၚ် အတိုၚ်ညးဒေသ မစုက်လုက်ကဵုပရောဒဒှ်တံ ဟီုထ်ၜးကဵုဂှ် ဂွံ တီကေတ်ရ။