သွက်ဂွံထ္ပက်စၟတ်တဲ NCA ဂှ် ဟဂွံဖျေံသ္ဂုတ်သွာတ်ဏီ ဂကောံ NSCN-K ဟီု

by | Sep 17, 2015 | ပရိုၚ် | 0 comments

UPWC ကေုာံ NSCN-K အဃောသဳကၠဳဒၟံၚ် (MPC)

UPWC ကေုာံ NSCN-K အဃောသဳကၠဳဒၟံၚ် (MPC)

အိုက်သာၚ် – အလဵုအသဳကဵု ဂကောံရပ်လွဟ် ကောန်ဍုၚ်အရၚ်တံ သွက်ဂွံထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် NCA ဂှ် နူအလဵုအသဳ ၜိုန်စဳဇန်လဝ် ပ္ဍဲဂိတု

အံက်တဝ်ဗာ ပထမသတ္တဟ တေံကီုလေဝ် ကိစ္စဏံ နကဵု ဂကောံ ကာပ်ပၠာန် ကံၚ်ဇြဳသဵုယှေဝ်လေတ် ကောန်ဂကူနာဂ NSCN-K ဟဂွံဖျေံသ္ဂုတ်သွာတ်ဏီ ဂွံတီကေတ်ရ။

ကျဝ်ဝါန်သိၚ် မဒှ်ကမ္မတဳဗဟဵု NSCN-K ဂှ် “ ပိုဲဂှ် ထ္ပက်စၟတ်တဲလေဝ် ဟဂွံဖျေံ သ္ဂုတ်သွာတ်ဏီ၊ ဟွံထ္ပက်လေဝ် ဟဂွံဖျေံသ္ဂုတ်သွတ်ဏီ၊ တ္ၚဲဏံ (သေပ်တေမ်ဗာ ၁၆ ) ပိုဲဆဵုကဵု ဥုအံၚ်မေန်။ စပ်ကဵု လိက်ကသုက် NCA ဂှ် ညးတံသောၚ်ထ်ၜး၊ ဆ္ဂး ထ္ပက်စၟတ်တဲကီုဏောၚ်ဂှ် ပိုဲဟွံဟီုလဝ် ကဵုညးတံပုဟ် မုဒှ်ရောဟီုတှေ် ဒးပ္တိုန်ထ်ၜးမံၚ်ကဵု ဥက္ကဌပိုဲဏီ။ ပိုဲစဴအာနူဏံ စိုပ်ဌာန်ဂအုပ်တေံတှေ် သီုဥက္ကဌ ကၠောန်ကောံဓရီုတုဲ ထ္ပက်စၟတ်တဲဟာ ဟွံထ္ပက်ဟာဂှ် သ္ဂုတ်သွာတ်ဏောၚ်။ လၟုဟ်ဟဂွံဖျေံ သ္ဂုတ်သွာတ် မွဲသာ်ဏီ” ညးဟီုလဴကဵု ဌာန်ပရိုၚ်ဗၠးၜးမန်ရ။

ကမ္မတဳဗဟဵု နူဂကောံ NSCN-K ဝွံ ပ္ဍဲသေပ်တေမ်ဗာ ၁၆ ဂှ် ဆဵုဂဗကဵု ဂကောံ ဥုအံၚ်မေန် ဒုဥက္ကဌ UPWC (ကမ္မတဳဓမံက်ရုပ်ရဴ ပရေၚ်ၜိုဟ်လလံကၟိန်ဍုၚ်) ပ္ဍဲရုၚ် MPC (ဌာန်ဂအုပ်ပရေၚ်ၜိုဟ်လလံဗၟာ) ဍုၚ်လ္ဂုၚ်ဂှ်တုဲ သဳကၠဳရၚ်သ္ကအ် စပ်ကဵုပရူ လိက်ကသုက် NCA ရ။

လ္တူကိစ္စ သဳကၠဳလဝ်တံဏံ သေပ်တေမ်ဗာ ၁ရ ဂှ် ဂကောံ ညးစၞး NSCN-K က္လေၚ်စဴ ဌာန်ဂအုပ်ညးတံ မၞုံပ္ဍဲဒေသ နာန်ယန် တေံဏောၚ်တုဲ ညးတံ ဒုၚ်စဳရေၚ် ပ္တိုန်ထ်ၜးကဵု ဂကောံ ကေုာံ ဥက္ကဌ အေဿ် အေဿ် ကာပ်ပၠာန် ညးတံပၠန်ဏောၚ် ဂးရ။

တုဲတှေ် ညးတံ ကၠောန်ကောံဓရီု ပ္ဍဲဌာန်ဂအုပ်ဗဟဵု ညးတံတုဲ ကိစ္စလိက်ကသုက် ဒိုအ်ပန်ပှော် အလုံမွဲဍုၚ် NCA ဂှ် ညးတံထ္ပက်စၟတ်တဲကီုဟာ၊ ဟွံထ္ပက်ဟာဂှ် သဳကၠဳ သ္ဂုတ်သွာတ်အာဏောၚ် ဥုကျဝ်ဝါန်သိၚ် ဂးရ။

ကိစ္စ ထ္ပက်စၟတ်တဲ လိက်ကသုက် NCA ဏံ နူဂကောံနာဂ NSCN-K ဟွံဂွံ ဖျေံသ္ဂုတ်သွာတ်ဏီကီုလေဝ် ပ္ဍဲပေါဲထ္ပက်စၟတ်တဲ NCA မကၠောန်ပ္ဍဲ အံက်တဝ်ဗာ ပထမသတ္တဟတေံမ္ဂး ဂကောံ နာဂ NSCN-K ဏံ ပါလုပ်ကီုဏောၚ်ဂှ် မၞိဟ်တာလျိုၚ် UPWC ကဵု MPC တံ ပတှေ်ကေတ်လဝ်ဏောၚ် ဟီုလဝ်ကဵု ရဲ NSCN-K ကီုရ။

ဂကောံ ကာပ်ပၠာန် ကံၚ်ဇြဳသဵုယှေဝ်လေတ် ကောန်ဂကူနာဂ NSCN-K ဝွံ ဒှ်ဂကောံ ရပ်လွဟ် ထ္ပက်ကၠုၚ်စၟတ်တဲ ဗွဲပဏာမ ကုအလဵုအသဳ နအဆံၚ်တွဵုရး ပ္ဍဲသၞာံ ၂၀၁၂ ၊ ဂိတုဨဗရဴ ၉ တေံရ။

ပ္ဍဲဂကောံ ရပ်လွဟ် ကောန်ဍုၚ်အရၚ် ၁၅ ဂကောံ နူအလဵုအသဳ ကော်ဘိက်လဝ် သွက်ဂွံထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် NCA ဂှ် ဂကောံ NSCN-K ဏံလေဝ် ပါလုပ်လၟိဟ်မွဲကီုရ။

Written by

Related Posts

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

ပ္ဍဲစင်အသေအဟာန်တ္ၚဲကောန်ဂကူမန် လ္ဒောဝ်တပ်တပ်ဂှ် ဒးပစူသၠုင်လဝ်အလာံကၟိန်ဍုင်ရောင် ဂျာန်နဝါရဳ ၃ တုဲ ကၠုင်ဂှ် နူကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင်လိက်စေဝ်ပၞောန် စပ်ကဵုအလာံတုဲ မၞိဟ်လ္ၚဵုဟွံ ပေင်စိုတ်ရ။

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲကဵုသၞာံ ၂၀၂၅ ဏံ ညံၚ်မိမညးဍုၚ်ကွာန် ကေုာံ သၟတ်ကွးဘာမန်တအ် သ္ဂောံစကာအာ လိခ်ပတ်မန် လတူလပှ်ကျာမာန်ဂှ် နကဵုညးတာလျိုၚ်ဌာနကမၠောန်ပတိုန်လိခ်ပတ်မန် လတူဓါတ်လပှ်ကျာ ဘာကဝ်လိက်မန်တအ် ဂစာန်ကၠောန်မံၚ် (Mon E-book project) မွဲနွံဂှ် ဂွံတီကေတ်ရ။

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

ကြဴနူကဵု ကမ္မတဳကၠောန်ဗဒှ်တ္ရဲကောန်ဂကူမန် မရနုက်ကဵု (၇၈)ဝါ ဗဟဵုတံ ပတိတ်ကၠုင်လိက် စေဝ် ပၞောန် အလာံပ္ဍဲတ္ရဲကောန်ဂကူမန်ဂှ်တုဲ ညးဂမၠိုင် ဟီုပါ်ပါဲကၠုင်နွံရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.