သၟဟ်သၟန် – ပ္ဍဲကဵုဂိတုနဝ်ဝေန်ဗာ (၄) သၞာံ (၂၀၁၅) အခိၚ်နူဂယး (၈) နာဍဳဂှ် နူကဵုသကိုပ်ဝန်ဇၞော်တွဵုရးဍုၚ်မန် ဥူအုမ်မျေအ် တိုန်စိုပ်အခန်ကၞာ ဖါပ်ဗ္စပုၚ်စတုဒ္ဒိသာသဘၚ်ကျာ်တၟအ်ကီုရောၚ် ဂွံတီကေတ်ရ။

စၟတ်သမ္တီဖါပ်ပုၚ်စတုဒ္ဒိသာ မရနုက်ကဵု(၁၂၄) ဝါဂှ် သကိုပ်ဝန်ဇၞော်တွဵုရးဍုၚ်မန်ကီု ဝန်ဇၞော်နာဲနဲသဵု ကေုာံ ဝန်ဇၞော်တွဵုရးဍုၚ်မန်ဂမၠိုၚ် တိုန်စိုပ်ကုတ်ထပိုတ်ဇုက်ဗၠဲတုဲ ဒုၚ်ဒါန်ပုၚ်ကၞာထးဂှ်ကီုရောၚ်။

“သဘၚ်ကျာ် ဟီုဂှ် အခိုက်ကၞာကောန်ဂကူမန်တံရ။ သဘၚ်ကျာ်တၟအ်ဏံ ညံၚ်ဂွံကၠောန်ဗဒှ် မိပ်ပ်ဇြိပ်ပ်မာန်ဂှ် ထ်ၜးမံၚ်ပရေၚ်ညဳသာ ကောန်ဍုၚ်ကၟာဝက်တံရ။ ကျာ်ဇၞော်အ္စာတံ က္ဍိုက်ပ်တုဲ သိုၚ်ခၞံပတန်လဝ်ဇြပ်စတုဒ္ဒိသာဏံ တုဲဒှ်အာဂှ် ထေက်ကဵုဒးမြဟ်မြဴစိုတ်ရ” သာ်ဝွံ သကိုပ်ဝန်ဇၞော်တွဵုရးဍုၚ်မန် ဥူအုမ်မျေအ် ဟီုရ။

နူကဵုသၞာံတုဲကၠုၚ်တေံ သကိုပ်ဝန်ဇၞော်တွဵုရးဍုၚ်မန်ကဵု ဥက္ကဋ္ဌဇၞော် ဗော်ဍုၚ်မန်တၟိ နာဲထဝ်မန်တံ အာပတိုန်လဝ် က္ဍိုၚ်ကျာ်သဘၚ်ကျာ်တၟအ် နွံလဝ်ကီုရောၚ်။

ဇြပ်စတုဒ္ဒိသာကျာ်တၟအ်ဍုၚ်ကၟာဝက်ဂှ် ဇၠိၚ် (၁၀၀) ဟတ်၊ အနာမ် (၄၀) ဟတ် စတမ်နူသက္ကရာဇ်ဍုၚ် (၁၃၇၄) သၞာံတုဲ လၟုဟ်တုဲဒှ်အာ (၉၀) က္ဍိုပ်ကၠံ ၚ္ၚုဟ်မးသိုၚ်ခၞံလဝ် ဗၞတ် (၂၀၀၀) ကိုတ်ပြၚ်ကီုရောၚ်။ ပ္ဍဲကဵုသၞာံဏံ စၟတ်သမ္တီဖါပ်ဗ္စပုၚ်စတုဒ္ဒိသာ ပေၚ် (၁၂၄) သၞာံဂှ် ဒၞာဲဇြပ်တၟိဏံ ဒုၚ်တၠုၚ်ဗ္စဖျုၚ်ကၟုဲမာန်ကၠုၚ်ရောၚ်။

“ကိစ္စဖါပ်ဗ္စဏံဂှ် ပ္ဍဲဍုၚ်ကၟာဝက် သ္ပလဝ်ပန်ကွာန်၊ ပန်အရာပ်ရ။ ပ္ဍဲမွဲသၞာံတှေ် မွဲအရာပ်ဒးက္ဍိုက်ပ်ဏောၚ်။ သှေ်ပိအ ရာပ်ဂှ်တှေ် ဒးဘိုၚ်ရီုဗၚ်ညးသ္ကအ်ဏောၚ်။ သၞာံဏံ ရဲထံၚ်ကှေ်ဖါပ်ဗ္စပုၚ်၊ ရဲစိၚ်တံၚ်ဂှ်တှေ် တာလျိုၚ်ဍာ်လဖက်၊ ရဲကၠအ်သတ်ဂှ် အရိုဟ်ဟ်သၞာံရ ညးတံဖါပ်စပုၚ်ၜိုဟ်ရ” သာ်ဝွံ တၠဂုဏ်အ္စာနာဲအတုလ နူဍုၚ်ကၟာဝက် ဟီုမြော်ရ။

ပ္ဍဲကဵုဇြပ်စတုဒ္ဒိသာသဘၚ်ကျာ်တၟအ်ဂှ် ဖါပ်ဗ္စမံၚ်ပုၚ်သွကီု ဍာ်လက်ဖက်ကီု ပုၚ်ၜိုဟ်တံ သွက်ကၟုဲကၠုၚ်စိုပ်တံရောၚ်။ ပ္ဍဲသဘၚ်ကျာ်တၟအ်ဂှ် ပေဲါဇာတ် (၄) ဇာတ်လှေ်ထ်ၜးမံၚ်တုဲ ပ္ဍဲသဘၚ်ဂှ် ကၟုဲပုရိသာတ် ဗၞတ်ကဵုကိုတ် ကၠုၚ်စိုပ်ဝေၚ်သ ဘၚ်ရောၚ် ညးဒေသတံ ချိၚ်ဆလဝ်ရ။

သဘၚ်ကျာ်တၟအ်သၞာံတုဲတုဲကၠုၚ်တေံဂှ် သကိုပ်ဝန်ဇၞော်တွဵုရးဍုၚ်မန် ကေၚ်ကၠုၚ်စိုပ်သဘၚ်ကျာ်တၟအ် ဟွံမွဲလဝ် ကီုလေဝ် အခိၚ်ကြပ်ကၠုၚ်ကဵုပေဲါရုဲမာဲဏံ ကၠုၚ်စိုပ်ပံက်အခန်ကၞာဖါပ်ဗ္စပုၚ်စတုဒ္ဒိသာလၟုဟ်ဏံဂှ် ပတိတ်မံၚ်ပရဲ ပရေၚ်ဍုၚ်ကွာန်ရောၚ် သၟာပရေၚ်ဍုၚ်ကွာန် ရဲဍုၚ်ကၟာဝက်မွဲတၠ ဟီုရ။

စေတဳကျာ်တၟအ်ဂှ် နွံမံၚ်လ္တူဒဵုဗၟံက်ဍုၚ်ကၟာဝက် ဗၞတ် (၈) တိုၚ်ပြၚ်ဂှ် နကဵုဓာတ်သော်ကျာ်တြဲဂမျိုၚ် ဌာပနာလဝ်တုဲ အခိၚ်ဂိတုဝှ် (၇-၈) စွေက်မ္ဂး ကၠောန်ဗဒှ်မံၚ်သဘၚ်ဇၟာပ်သၞာံဂှ် ဒှ်သဘၚ်ပြာကတ်ပ္ဍဲတွဵုရးဍုၚ်မန်ကီုရောၚ်။