ခြဟွံလအ် ပံက်အလဵုအသဳတၟိရဒှ်တုဲ လၟိဟ်ဌာနဝန်ဇၞော် ထေက်ကဵုသ္ဒးစွံကီု၊ စရၚ်ဝန်ဇၞော်ကီု နူသမ္မတ ဥူထေန်ကျဝ် ပ္တိုန်ထ္ၜး ပ္ဍဲကၠတ်ထဝ်ကၟိန်ဍုၚ် ပ္ဍဲဂိတုမာတ် (၁၇) ဂှ်တုဲ အပ္ဍဲစရၚ်ဂှ်ဝွံ ဌာနတၟိမွဲ မတွံဂး ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ်လေဝ် ပါကၠုၚ်ကီု ဂွံဆဵုကေတ်ရ။
ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ် ပါကၠုၚ်ပ္ဍဲစရၚ် နယၟုတၞဟ်ခြာဗီုဏံဂှ် ဒှ်အရာ မဓမံက်ကဵုရုပ်ရဴ ကုဥပဒေ မၚ်မွဲစဵုဒၞါ အခေါၚ်အဝဵု ကောန်ဍုၚ်အရၚ် မပ္ညပ်သ္ပလဝ်ဒ္တန် ပ္ဍဲလက်ထက် ကၠတ်ထဝ်ကၟိန်ဍုၚ် အလန်ပထမ တုဲကၠုၚ်တေံကီုရ။
နကဵုစၞောန်ပ္ညုၚ် သမ္မတဂှ်ဟေၚ် ရန်ကဵု သ္ဂောံရၚ်တၠုၚ် သ္ပဇြိုဟ်နက် ကုကိစ္စပရေၚ်ကောန်ဍုၚ်အရၚ်တုဲ နတၚ်တုပ်စိုတ် ကၠတ်ထဝ်ကၟိန်ဍုၚ် သ္ဒးပံက် ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ်ဏောၚ် ရဴဝွံ ဓမံက်ထ္ၜးလဝ် ပ္ဍဲဥပဒေ မၚ်မွဲစဵုဒၞါ အခေါၚ် ကောန်ဍုၚ်အရၚ် မသ္ပလဝ်ဒ္တန် ပ္ဍဲဂိတုဖေဖဝ်ဝါရဳ သၞာံ ၂၀၁၅ တေံရ။
စရၚ်ဌာနဝန်ဇၞော် နူသမ္မတတၟိ ပလံၚ်နၚ်လဝ် (Copy)
စိုပ်လက်ထက် အလဵုအသဳတၟိ NLD မအာက္ဍိုပ်ဝွံ စွံပ္တန်အာ ဆဌာနဝန်ဇၞော် (၂၁) ဌာန ကဵု ဝန်ဇၞော် (၁၈) တၠရတုဲ ပၞောဝ်ကဵုဌာနဝန်ဇၞော် (၃၆) ဌာန နွံမံၚ် ပ္ဍဲလက်ထက်အလဵုအသဳ သမ္မတတိၚ်သိၚ်တေံဂှ် ရုပ်ပလီုထောံ (၁၀) ဌာန ဂွံတီကေတ်ရ။
ဌာနဝန်ဇၞော်သမဝါယမ၊ ဌာနဝန်ဇၞော် က္တိုၚ်ဒကောဝ်လှာ်၊ ဌာနဝန်ဇၞော် ပရေၚ်ပလံၚ်ဗ္စိုပ်ကဵုကွဳပၟတ်၊ ဌာနဝန်ဇၞော် ပရေၚ်ဝေၚ်ဒြဟတ်၊ ဌာနဝန်ဇၞော်ပရေၚ်သိပ္ပံကေုာံ နဲပညာ၊ ဌာနဝန်ဇၞော်ရုၚ်သမ္မတ (၅) ဌာနဏံဂှ် ပလီုထောံဣရ။
ပ္ဍဲလက်ထက် သမ္မတတၟိ ဥူထေန်ကျဝ်ဏံ ပံၚ်ပ္စပ်ထောံ ဌာနဝန်ဇၞော်လေဝ် နွံရ၊ယၚ်တံဂှ်တုန် ပရေၚ်တဵုလွဳ၊ ဌာနဝန်ဇၞော် ပရေၚ်ဖ္ဍတ်လွဳ ကဵု စြာၚ်မြံၚ်၊ ဌာနဝန်ဇၞော် ပရေၚ်ပလံၚ်ဗ္စိုပ်ကဵု ကေုာံ ပရေၚ်ဆက်စၠောံ၊ ဌာနပရေၚ်ယေန်သၞာၚ် ကေုာံ ပရေၚ်သာသနာ၊ ဌာနဝန်ဇၞော် ပရေၚ်သယံဇာတ ကေုာံ ပရေၚ်ထိၚ်ဒဝ်မၚ်မွဲ သဘာဝပွဳပွူ၊ ဌာန်ဝန်ဇၞော် ပရေၚ်ဓါတ်လလဳ ကေုာံ အစောံဒြဟတ်၊ ဌာနဝန်ဇၞော် သၟာကမၠောန် သီုကဵု ပရေၚ်သ္ကိုပ်သ္က မၞိဟ်လုပ်တိတ် ကေုာံ ထိၚ်ဒဝ်ဒြဟတ်မၞိဟ်၊ ဌာနဝန်ဇၞော် ကိုန်အစဳဇန် ကေုာံ ပရေၚ်ဘဏ္ဍာ ရဴဝွံ ပံၚ်ပ္စပ်လဝ်ရ။
သၟာၚ်နူဂှ်ပၠန် ဌာနဝန်ဇၞော် ရုၚ်သမ္မတ (၆) ဌာန လက်ထက် သမ္မတ တိၚ်သိၚ်ဂှ်လေဝ် စွံလဝ်မွဲဓဝ်ဂှ် ဂွံဆဵုကေတ်ရ။
စရၚ်ယၟု ဌာနဝန်ဇၞော်ဂမၠိုၚ်ကဵု ယၟုဝန်ဇၞော်ဂမၠိုၚ် အဆံၚ်ကၟိန်ဍုၚ် တံဏံဂှ် ဆက်သဳကၠဳအာ ပ္ဍဲကောံဓရီု ကၠတ်ထဝ်ကၟိန်ဍုၚ် မသ္ပပ္ဍဲစၟတ်တ္ၚဲ ဂိတုမာတ် (၁၈) တေံပၠန်ဏောၚ်ဂှ် ဓမံက်ထ္ၜးလဝ် ပ္ဍဲမုက်လိက်အေန်တာနေတ် ဌာနဝန်ဇၞော် ပရေၚ်လလောၚ်ပရိုၚ်တေံရ။
