နူကၠတ်ထဝ်ကၟိန်ဍုၚ် ရုဲပ္တိုန်ဏာ သမ္မတဍုၚ် ကုဥူထေန်ကျဝ်ဂှ် ဗော်ကောန်ဂကူမန် MNP လေဝ် ဒဒှ်ရ ဒုၚ်တၠုၚ် အိုဟ်တၟိုဟ်တဴကီုရဂှ် ဓမံက်ထ္ၜး လလောၚ်ပ္တိတ်ဏာ ပရေၚ်လစွံစိုတ် နကဵုလိက် ပ္ဍဲဂိတုမာတ် ၃၀ ဂှ်ရ။
နာဲလျးတၟး ညးအုပ်ကာနာနာ ဗော်ကောန်ဂကူမန်ဂှ် “သွက်ဂွံ လလောၚ်ပ္တိတ် လိက်လစွံစိုတ်ဏံဂှ် ပိုဲရန်လဝ်နွံမံၚ်ရ၊ ဆ္ဂး ဂွိုအ်ပံက် အလဵုအသဳတၟိဏီတုဲ ပိုဲမၚ်မံၚ်၊ လၟုဟ်ပံက်အလဵုအသဳတၟိလေဝ်တုဲယျ ဒုၚ်ယဵုသစာလေဝ် တုဲယျတှေ် ပိုဲလလောၚ်ပ္တိတ် ပရေၚ်လစွံစိုတ် ပိုဲဏံ” ဂးရ။
ဂကောံအလဵုအသဳတၟိ မဒက်ပ္တန်လဝ် နကဵုပရေၚ်ပၠတရဴ သမ္မတဥူထေန်ကျဝ်ဏံဂှ် ဟိုတ်နူသ္ပလဝ်ဒ္တန် နူကၠတ်ထဝ်ကၟိန်ဍုၚ် မပစၞး အလုံကောန်ဍုၚ်တံကီုဂှ်ရ ဗော်ကောန်ဂကူမန်လေဝ် သၟဟ်စိုတ် မွဲကရောံကဵုသမ္မတဇၞော်တုဲ ဒုၚ်တၠုၚ် သ္ပဏာဂုဏ်စရာဲ ကုဂကောံအလဵုအသဳတၟိကီုရ၊ ဂကောံအလဵုအသဳ သမ္မတ ဥူထေန်ကျဝ်ဝွံ ဟိုတ်နူ ဒှ်အလဵုအသဳ စၞးညးဍုၚ်ကွာန်တံဍာံဍာံ မတိုန်ကၠုၚ် နူပေါဲရုဲမာဲ နဝ်ဝေမ်ဗာ (၈) ၂၀၁၅ ဂှ်ရ နကဵုသဘဴပဠေဝ် ခိုဟ်ဟ်ဆာဲဆာဲဂှ်ဟေၚ် ဗော်ကောန်ဂကူမန် ဒုၚ်တၠုၚ်တဴ ကုဂကောံ အလဵုအသဳတၟိကီုရဂှ်လေဝ် ဂးလဝ် ပ္ဍဲလိက်လလောၚ်ဂှ်ရ။
လိက်လလောၚ် လစွံစိုတ် ဗော်ကောန်ဂကူမန် (copy)
“နကဵုပေါဲရုဲမာဲ ၂၀၁၅ တုဲကၠုၚ်ဏံ အလဵုအသဳတၟိ မံက်တိုန်ဗီုဏံဂှ် ဒုၚ်တၠုၚ်မံၚ်ရ၊ ဂွံအဝဵုအလဵုအသဳတုဲ အခက်ခုဲပ္ဍဲဍုၚ်နွံကၠုၚ်မံၚ် မပ္တံ ကိစ္စကောန်ဍုၚ်အရၚ်၊ ကိစ္စပရေၚ်ဒဳမဝ်ကရေဇြဳ၊ ပရေၚ်အုပ်လ္ဒံသၞောဝ်၊ ပရေၚ်ညးဍုၚ်ကွာန်တံ ဒးဒုၚ်သီလဝ် တိဗ္ၚကၠအ်သွဝ် တံဂှ် အလဵုအသဳတၟိဏံ ဗီုလဵုရပ်စပ် ပသောၚ်အာရောဂှ် ဒးမၚ်ရံၚ်ဏီ” နာဲလျးတၟး ဂးရ။
ပ္ဍဲဂကောံ အလဵုအသဳတၟိဏံ ပံက်ပ္တန်ဏာတၟိ ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ်တုဲ ရုဲစှ်ခါန်ပ္တိုန်ဏာ နာဲတိတ်လွေန် (ဒုဥက္ကဌ-၁ -ဗော်ကောန်ဂကူမန်) နဒဒှ်ဝန်ဇၞော်ဂှ် နကဵုဗော်ကောန်ဂကူမန် သ္ဇက်ဒးစာန်စးဟွံမွဲရဂှ်လေဝ် ဂးလဝ် ပ္ဍဲလိက်လလောၚ်ဂှ်ကီုရ။
ပ္ဍဲပေါဲရုဲမာဲ သၞာံ ၂၀၁၅ မတုဲကၠုၚ်ဂှ်ဝွံ ညးစၞး နူဗော်ကောန်ဂကူမန် လုပ်ပြိုၚ် ၅၃ တလတုဲ က္လိဂွံ အမာတ်ကၠတ်ထဝ် ကောန်ဂကူ (၁) တလ၊ အမာတ်ကၠတ်ထဝ်တွဵုရး (၂) တလဓဝ် ကီုရ။
0 Comments