နူဗ္တံဏံ မေ ၂၆ အခိၚ် ၈ နာဍဳပြၚ်ညိဂှ် ပၠံၚ်သၟုဟ်ဓါတ်(ကန်ပေါက်-မြိုၚ်ကလေး) ပ္ဍဲကဵုတၞုၚ်ကွာန်ဝါရက်ဂှ် ညးတာလျိုၚ်တံ စံၚ်ပ္တိတ်ထောံသၟုဟ်ဓါတ်မၞုံဒၟံၚ်ပ္ဍဲပၠံၚ်ဂှ်တုဲ နကဵုရမျာၚ်အသိၚ်ထတ်သ္ကာတ်ဗြုတမ္ညဝ်ဒၟံၚ်ဂှ် ညးဒေသတံဖေက်လကိုတ်ဒၟံၚ်အိုတ်ရ။
အဃောစံၚ်ပ္တိတ်မံၚ်သၟုဟ်ဓါတ် (GS)
‘ရမျာၚ်စံၚ်(ပိုက်လိုၚ်း)ဂှ် ကၠေံသ္ၚိတ်မံၚ်တၟာလအ်ရ၊ လၟုဟ်မှဂွံကလေၚ်မိၚ်တိုန်ပၠန် ဍေံဗလးအလန်ဏံ ရမျာၚ်ဗြုထတ်ကွေံကွေံ၊ ပၟတ်လေဝ် တိုန်သၠုၚ်ကွေံကွေံမွဲတဲ၊ ဗြုတမ္ညဝ်မံၚ်တၟာသ္ၚောဲဏောဝ်၊ ရဲကွာန်က ရပ်တဂှ်လေဝ် ကောံကၠုၚ် ခယျမုဒှ်ဟွံတီဖေက်မံၚ်ညာန်၊ လ္ၚဵုဂှ်တှေ် ဗက်ကော်ပကောံကောန်ဇါတ် ရဲအာ မံၚ်ပ္ဍဲဂၠံၚ်ဇၞော်လ္ၚဵုဂှ်တှေ် ဆဵုပၟတ်တိုန်မံၚ်ဂှ် ဟွံဂံၚ်တတ်အာဂၠံၚ်ကွဳစက် ကရပ်ဂှ်ပုဟ်’ သာ်ဏံ နာဲပုတ် နူကဵုကွာန်ဝါရက်ဂှ် ဟီုထ္ၜးရ။
အခိၚ်စံၚ်ပ္တိတ်ထောံသၟုဟ်ဓါတ်ဂှ် ဒှ်ဒၟံၚ်အခိၚ်မၞိဟ်သ္ၚိတ်တုဲ ပၟတ်သၟုဟ်ဓါတ်ဂှ်တိုန်ဒၟံၚ်ၜိုတ်သၠုၚ်တၞံတာ ရောၚ်ဂးရ၊ သ္ၚိတံကီု ကၟဳသောတ်တံကီု အသိၚ်ရမျာၚ်ပၠံၚ် သၟုဟ်ဓါတ်ဂှ် ဗြုချဳတမ္ညဝ်ဒၟံၚ်ကၠိုဟ်ဗ္တံတုဲ ဒုၚ်စ သိုၚ်ဝါတ်ကွေံကွေံဏောဝ် ညးဒေသတံသ္ဂးရ။
ပ္ဍဲကဵုကၞုၚ်ကွာန်ဝါရက် အာလ္ပာ်ဍုၚ်ရေဝ်ဂှ် ပၠံၚ်သၟုဟ်ဓါတ်သွက်ဂွံစံၚ်ပ္တိတ်ထောံသၟုဟ်ဓါတ်ဂှ် ညးတာ လျိုၚ်တံ ကၠောန်လဝ်ပၠံၚ် (မွဲပထောၚ်) နွံတုဲ ပၠံၚ်သၟုဟ်ဓါတ်ဂှ်ကာတၟေၚ်မွဲမွဲသာ်က္တဵုဒှ်မ္ဂး ဟွံလအ်ဟွံလအ် ဒးစံၚ်ပ္တိတ်ထောံဒၟံၚ်သၟုဟ်ဓါတ် နူကဵုပၠံၚ်တောဲဟလောဲတံဂှ် လၟိုန်နွံရ။
နူကဵုသၟုဟ်ဓါတ်ကၠောန်လဝ်ပၠံၚ်ပသဲသွက်ဂွံစံၚ်ပ္တိတ်သၟုဟ်ဓါတ်ဂှ် နူတုဲကၠုၚ်တေံမ္ဂး ဟွံလအ်ဟွံလအ် ညး တာလျိုၚ်သၟုဟ်ဓါတ်တံ ဒးစံၚ်ပ္တိတ်ထောံဒၟံၚ်သၟုဟ်ဓါတ်ဂှ်ရ။
‘ကွာန်မွဲဒမြိပ်ပၠံၚ်သၟုဟ်ဓါတ်တတ်အာတဂှ် အန္တရာဲနွံမံၚ်ဖအိုတ်ရ၊ ဟဂှ်ရ နူသၞာံအာတေံ ညးတံပြံၚ်လှာဲ ထောံတတ်အာအဒေါဝ်ဍုၚ်ဇြပ်ဗုဂှ် ပ္ဍဲကွာန်တှေ် ညးတံဟွံစွံဂရုဗီုကဵုဍုၚ်၊ ညးဂွံဂံၚ်ဟီုဒစဵုဒစးလေဝ်ဟွံမွဲ တှေ် ဒှ်အန္တရာဲတှေ် ညးကွာန်တံရဒးဂိဏောဝ်’ သာ်ဏံ နာဲနာၚ်ဥူ ထံက်ဟီုထ္ၜးရ။
ပၠံၚ်သၟုဟ်ဓါတ်ကာန်ပံက်-မျာၚ်ကလေဝ် မၞုံဇမၠိၚ် ၁၈၀ မိုၚ် (ကန်ဘောက်-မြိုၚ်ကလေး) ဝွံ စတောဲဒလဲ လဝ် နူကဵုသၞာံ ၂၀၁၀ တေံရတုဲ ဗလးကဵုဒၟံၚ်သၟုဟ်ဓါတ် သွက်ရုၚ်စက်တိဗုတ်မျာၚ်ကလေဝ် ပ္ဍဲပွိုၚ်ဍုၚ် ဖာ အၚ် တွဵုရးကရေၚ်ကီု၊ ရုၚ်စက်ပၟတ်ၚာၚ်ဒဵု ဍုၚ်မတ်မလီုကဵု ရုၚ်စက်ပၟတ်သဓီုကီု သီုကဵုပလံၚ်ဗစိုပ်ဒၟံၚ် ဍုၚ် လ္ဂုၚ်နွံရောၚ် ဂွံတီကေတ်ရ။
0 Comments