ဆေၚ်စပ်ကဵုကိစ္စသွက်ဂွံကၠောန်စုတ်ရုပ်ဗိုလ်ဂျုက်အံၚ်သာန် ဒၞဲါကၠအ်ပ္ကဴ (ကန်သာယာ) လ္တူဍုၚ်မုဟ်ဍုၚ်ဂှ်တုဲ ပ္ဍဲဂိတု သေပ်တေမ်ဗါ နစၟတ်တ္ၚဲ (၂၇) ဂှ် ဂကောံသၟတ်မန်ပွိုၚ်ဍုၚ်မုဟ်ဍုၚ်တံ ပ္တိုန်လဝ်လိက်ဒစဵုဒစး ကုသ္ကိုပ်ဝန်ဇၞော် တွဵုရး ဍုၚ်မန် နကဵုတၚ် (၈) တၚ်နွံရောၚ် ဂွံတီကေတ်ရ။

အပ္ဍဲကဵုလိက်ချူပ္တိုန်လဝ် ကုသ္ကိုပ်ဝန်ဇၞော် (၈) တၚ်ဂှ်မ္ဂး ကိစ္စကၠောန်ရုပ်ပတုပ်ဗိုလ်ဂျုက်အံၚ်သာန်ဝွံ ဟွံဒုၚ်ကေတ် လဝ်ဆန္ဒ ညးဍုၚ်ကွာန် မၞုံအပ္ဍဲပွိုၚ်ဍုၚ်တံမွဲသာ် ဓမံက်တဴရုပ်ရဴလၟေၚ်ကမၠောန်တံဂှ် စှေ်စးဒၟံၚ်ကဵုသၞောတ်ဒဳမဝ်ကရေ ဇြဳကီု၊ အပ္ဍဲ ပွိုၚ်ဍုၚ်မုဟ်ဍုၚ်ဂှ်မ္ဂး ဂကူမန်တံ နွံမံၚ်လၟိဟ်လ္တူ (၈၀) တၟံကၠံဂှ်ရ သွက်ဂွံဓမံက်အာအၚ်္ဂလကျန်ဂကူ ကောန်ဍုၚ်အ ရၚ်တံမာန်ဂှ်ဟေၚ် ပၟိက်ဇၞော်ရောၚ် ဂးလဝ်ရ။

ရုပ်ဗိုလ်ဂျုက်အံၚ်သာန်ဂှ် ဒှ်တိုန်ဗက်ဟွံဂတာပ် ဟိုတ်နူလညာတ်ဟွံတုပ်တုဲ ပ္ဍဲအကြာဂကောံမန်ကဵု ဂကောံရဲစှေ် စိုတ်ရုပ်ဗိုလ်ဂျုက် မၞုံအပ္ဍဲပွိုၚ်ဍုၚ်မုဟ်ဍုၚ်တံ ကာလက္တဵုဒှ်ပရေၚ်ကယျာန်ဓဝါတ်ညးသ္ကံလေဝ် ဒှ်မာန်ရောၚ် ဥက္ကဌ ဂကောံသၟတ်မန် ပွိုၚ်ဍုၚ်မုဟ်ဍုၚ် နာဲတဝ်ပၞးအံၚ် ဟီုရ။

“ပဒေါံဟွံဂွံညးတအ်ကၠောန်တွဵုဏောၚ်တှေ် စၞးဒးစွံ ပ္ဍဲကဵုကၠအ်ပ္ကဴ (ကန်သာယာ)ဏအ်ဂှ် လ္ပစွံရ၊ အာစွံပ္ဍဲကဵု ကၠအ်ပ္ကဴ (လွတ်လပ်ရေး) လဒေါဝ်ဍုၚ်တေံညိ၊ ကၠအ်ပ္ကဴ (ကန်သာယာ) ဏအ်ဂှ် ဆေၚ်မံၚ်ကဵုပွိုၚ်ဍုၚ်ပိုယ်ဟီုဂွံ ပ္ဍဲကဵု ကၠအ်ပ္ကဴ (ကန်သာယာ) ဏံ ညးတအ်စုတ် ဂွံဏောၚ်တှေ် မန်ပိုဲလေဝ် စုတ်ကီုဏောၚ်” သာ်ဝွံ ညးဆက်ဟီုပၠန်ရ။

တုဲပၠန် အပ္ဍဲအခိၚ်ကာလဓမံက်ပ္တိုန်ရုပ်ရဴ လိက်ကသုက်ကတိကဝတ်ပေန်လုၚ် ဟွံမာန်ဏီဏံဂှ် လၟေၚ်ကမၠောန်ဝွံ မဒှ်ပရေၚ်ကမၠောန် ဇၞော်ပၟဝ်ပ္တိုန်ကဵု ဝါဒမဟာဂကူမွဲတုဲ ညံၚ်ရဴမသ္ပတဴဥပေက္ခာ ကုပရေၚ်ၜိုဟ်လလမ်အလဵုအသဳ ကၠောန်ဒၟံၚ်တ္ၚဲဏံရောၚ် သာ်ဝွံလေဝ် ပ္ဍဲကဵုလိက်ဒစဵုဒစးပ္တိုန်လဝ်ကဵု သ္ကိုပ်ဝန်ဇၞော်တွဵုရးဍုၚ်မဂှ် ချူဓမံက်လဝ်ရ။

“ညအ်ဂှ် အခေါၚ်အရာဍေံတံရ၊ ပ္ဍဲကဵုခေတ်ဒဳမဝ်ကရေဇြဳဏအ်ဟီုတှေ် နကဵုဆန္ဒဍေံတံ အခေါၚ်ဟီုနွံမံၚ်လေဝ်။ ဍေံတံ ပတိုန်လဝ်လိက်ကဵုပိုဲဟွံသေၚ်ပုဟ်၊ ပတိုန်လဝ်လိက်ကဵုသကိုပ်ဝန်ဇၞော်တွဵုရးဍုၚ်မန်ဏောၚ် နကဵုပိုဲဂှ်လေဝ် ကာလဒးပညဳပညပ်ကဵု သကိုပ်ဝန်ဇၞော်တအ်ကဵု ဌာနမဆေၚ်စပ်တအ်တှေ် ပိုဲတအ်ပါလုပ်ဏောၚ်” သာ်ဝွံ ဥက္ကဌ ကမ္မတဳကၠောန်ဗဒှ်ရုပ်ဗိုလ်ဂျုက်အံၚ်သာန် ဍုၚ်မုဟ်ဍုၚ် ဒံက်တာတာန်ဝေန် ဟီုရ။

စပ်ကဵုကိစ္စဝွံတုဲ ကမ္မတဳကၠောန်ဗဒှ်ရုပ်ဗိုလ်ဂျုက်အံၚ်သာန်ကဵု ဂကောံသၟတ်မန်ပွိုၚ်ဍုၚ်မုဟ်ဍုၚ်တအ် သွက် ဂွံဆဵုဂဗ သဳကၠဳညးသ္ကအ်နွံရောၚ် ဂွံတီကေတ်ရ။

ရုပ်ဗိုလ်ဂျုက်အံၚ်သာန်ဂှ် နကဵုကမ္မတဳကမၠောန်တံ စချဳဒရာၚ်ကၠုၚ်ဒၟံၚ် နူကဵုဂိတုဖေဖဝ်ဝါရဳတေံရတုဲ ပြဟ်ဟ်ဏံ အဃောဂၠာဲပ္ကောံဒၟံၚ်သြန်ဂအုံဖိုဟ်ရ၊ ကာလကၠောန်မ္ဂး ရုပ်ဂှ် ကၠောန်အာနကဵုဗ္ၜတ်သမၠုၚ် ၉ ပေရောၚ်တုဲ အပ္ဍဲသၞာံ ၂၀၁၇ ဂိတုဖေဖဝ်ဝါရဳ ၁၃ (တ္ၚဲဗိုလ်ဂျုက်အံၚ်သာန်ဒှ်မၞိဟ်) တေံ ညံၚ်ဂွံဒှ်ဗ္ဂပ်စုတ်ရုပ်မာန်ဂှ် စဳဇန်လဝ်နွံရောၚ် ဂွံတီ ကေတ်နူကဵုကမ္မတဳကၠောန်ဗဒှ်ရုပ်ဗိုလ်ဂျုက်အံၚ်သာန်တံဟီုရ။