ရုၚ်စက်တိဗဳလာတ် MCL ကၠောန်ပ္တိတ်စမ္ၜတ်ဒၟံၚ်ဇြဟတ်ပၟတ် နူကဵုချးတၟအ်ဂှ် ညးဒေသတံ ချဳဒရာၚ်ကၠုၚ်မံၚ် ပ ရေၚ်ဒစဵုဒစးနာနာကီုလေဝ် နူကဵုကမ္ပဏဳ MCL ဂှ် ဆက်ဓမံက်ဒၟံၚ်ရုပ်ရဴအတိုၚ်တြေံဂှ်ရ စိုပ်အခိၚ်က်ညၚ်မ္ဂး ညးဒေသ ပွိုၚ်ဍုၚ်ကျာ်မြဟ်တံ ဓမံက်ထ္ၜးအာဆန္ဒ ဟွံမွဲပၟိက်ရုၚ်စက်ချးတၟအ်ဂှ်ရောၚ် ညးဒေသတံ ဟီုဂးလဝ် ပ္ဍဲကဵုပေဲါ သောၚ်က္လးပရိုၚ် ဟွံမွဲပၟိက်ချးတၟအ်ရ။

ပေဲါသောၚ်က္လးပရိုၚ် ဟွံမွဲပၟိက်ရုၚ်စက်ချးတၟအ်ဒေသဒဵုသာဲဂှ် ကၠောန်သ္ပဏာဒၞဲါဗ္ဒမ်ဇၞူရာမည ဍုၚ်မတ်မလီု ပ္ဍဲဂိတု သေပ်တေမ်ဗါ (၁၈) တုဲ ကျာ်ဇၞော်အ္စာ ပွိုၚ်ဍုၚ်ကျာ်မြဟ်ဂမၠိုၚ်၊ ညးစိုတ်လုပ်စကဵု ပရေၚ်ဒစဵုဒစး ပ္တိတ်ဇြဟတ် ပၟတ် နူကဵုချးတၟံကဵု ဂကောံ မှာဇန်ဇန်နာနာတံ ဗၞတ် (၁၀၀) တၠပြၚ်ၚ် တိုန်စိုပ်အိုတ်ရ။

ညးဒၟံၚ်ကွာန်ကျာ်ပရၚ်၊ ပွိုၚ်ဍုၚ်ကျာ်မြဟ် နာဲရာၚ်ဆာဲဂှ် “ပိုဲတံစဳဇန်မံၚ် သွက်ဂွံဓမံက်ထ္ၜးဆန္ဒ ဟွံမွဲပၟိက် ဗီုကဵု ကၠောန်လဝ် ပ္ဍဲကဵုကွာန်အၚ်ဒၚ်တေံ နွံမံၚ်။ လၟုဟ်ဂှ် ဒှ်မံၚ်အခိၚ်ဗြဲတုဲတှေ် ပိုဲတံဟွံဒှ်ကၠောန်ဏီ။ ပိုဲတံ ကၠောန်အာ ဒၞဲါ ကွာန်ကြပ်ကဵုရုၚ်စက်တုဲ ညးဂမၠိုၚ်ညံၚ်ဂွံပါလုပ်၊ ကၠောန်အာ ညံၚ်ဂွံဒှ်ပရေၚ်ချဳဓရာၚ်ဇြဟတ်ဇၞော်ဇၞော်ဏောၚ်” သာ်ဝွံ ဟီုရ။

အခိၚ်လၟုဟ်ဝွံ အလုံမွဲဂၠးတိဂှ် ဒစဵုဒစးမံၚ် ပရေၚ်ကၠောန်ပ္တိတ်ဇြဟတ်ပၟတ် နူကဵုချးတၟအ်တုဲ ရုၚ်စက်ကၠောန်ပ္တိတ်ဇြ ဟတ်ပၟတ် MCL ဝွံ ကြပ်မံၚ်ကဵုဒၞဲါမၞိဟ်တံမံၚ်ကီု၊ စၟတ်တဲ ပရေၚ်ဒစဵုဒစးရုၚ်စက်ချးတၟံ ညးဒေသတံ (၁၀၀၀၀) ပြၚ်ၚ် ဂှ်လေဝ် ဆက်ပ္တိုန်ထ္ၜးအာကဵု သမ္မတကၟိန်ဍုၚ်တုဲ ပရေၚ်ချဳဓရာၚ် ဒစဵုဒစး ရုၚ်စက်ချးတၟအ် ကၠောန်အဆက်က် ဏောၚ်ဂှ် ညးဆက်ဟီုရ။

နာဲမေတ် ရဲကွာန်ခဒုၚ်ဂစေပ်ဂှ် “ပိုဲတံဂွံတီလဝ်ဂှ် ကၠောန်ရုၚ်စက်တိဗဳလာတ်ဏောၚ်။ ပွိုၚ်မွဲတ္ၚဲကၠောန် ပ္တိတ်တိဗဳ လာတ် တာန် (၅၀၀၀) ဏောၚ်။ ပရေၚ်ဓလိုက်တမ်ရိုဟ်ဍေံဂှ် ဒဝ်လာ တာန် (၄) လက်ဏောၚ်တှေ် ဒှ်ပရေၚ် ဓလိုက်တမ်ဇၞော်ဇၞော်ဏောၚ်။ ဟိုတ်ဂှ်ရ ပရေၚ်ဇီုကပိုက်ပွဳပွူသဘာဝလေဝ် ဍေံဒှ်ဇၞော်ဇၞော်ဏောၚ်” သာ်ဝွံ ဟီုရ။

ပ္ဍဲကဵုသၞာံ (၂၀၁၅) ဂှ် ကော်ကေတ်သၟာကေမၠာန်ဗွဲဂၠိုၚ်တုဲ ကၠောန်မံၚ်ရုၚ်စက်တိဗဳလာတ် MCL ဂှ် လၟုဟ်တုဲကၠုၚ် ဗၞတ် (၈၀%) ကီု၊ စပ်ကဵုသုၚ်စောဲဇြဟတ်ပၟတ် ကေတ်နူအလဵုအသဳဂှ် သောၚ်ကၠးလဝ်ကဵု ညးဍုၚ်ကွာန်တံဟွံမွဲကီု၊ ချးတၟအ်ဝွံ ဟိုတ်နူပရေၚ်ဇီုကပိုက်ပွဳပွူသဘာဝ ကေုာံ ပရေၚ်ထေက်ယုတ်မၞိဟ်တံနွံမံၚ်ဂှ်ရ အလုံဂၠးတိစဵုဒစးမံၚ် ဏောၚ်ဂှ် နာဲမေတ် ဆက်ဟီုရ။

ပ္ဍဲကဵုပွိုၚ်ဍုၚ်ကျာ်မြဟ်၊ ပွဳပွူဒေသဒဵုသာဲဝွံ ရုၚ်စက်တိဗုတ်မတ်မလီု MCL ဂှ် သွက်ကၠောန်တိဗဳလာတ်ဂးတုဲ နွံပၟိက် မံၚ် ဇြဟတ်ပၟိတ်လလဳ (၄၉) မဂ္ဂါဝါတ်ဂှ် ကၠောန်ပ္တိတ်ကေတ်ဇြဟတ်ပၟတ်လလဳ နူကဵုတၟံချး (၄၀) မဂ္ဂါဝါတ်ရောၚ် ဂွံ တီကေတ် နူကဵုညးဒေသ တံ ဟီုရ။

စပ်ကဵုရုၚ်စက်တိဗုတ်မတ်မလီု (MCL) သုၚ်စောဲဇြဟတ်ပၟတ်လလဳ ကၠောန်ပ္တိတ်နူကဵုချးတၟအ် သွက်ဂွံဒေံါဇူကဵုဂှ် ညးဒေသဒဵုသာဲ (၃၇၈၀) တၠတံ ထပက်စၟတ်တဲတုဲ ပ္တိုန်လဝ်လိက် ကုသမ္မတကၟိန်ဍုၚ်ကေုာံ ဝန်ဇၞော်တွဵုရးဍုၚ်မန် ပ္ဍဲကဵုဂိတုအေဗရဴ (၂၅) တေံ နွံရ။