သွက်ဂွံကၠောန်သၞေဟ်ကွဳစက်ဖ္ဍိုက်အပေါတ်ဗၞိက် ပ္ဍဲဍုၚ်မတ်မလီုဂှ် ပ္တိုန်ထ္ၜးလဝ် ကုအလဵုအသဳတွဵုရးဍုၚ်မန်နွံ

by | Sep 22, 2016 | ပရိုၚ် | 0 comments

သွက်ဂွံကၠောန်ဗ္ဒိုပ်သၞေဟ်ကွဳစက် ဖ္ဍိုက်အပေါတ်ဗၞိက်တံ ဂွံဇူဒီု ပ္ဍဲဍုၚ်မတ်မလီု တွဵုရးဍုၚ်မန်မွဲမာန်ဂှ် ကမ္မတဳကောပ်ကာဲထိၚ်ဒဝ် ကွဳစက်ယာန်တွဵုရးတံ ပ္တိုန်ထ္ၜးလဝ် ကုဂကောံအလဵုအသဳတွဵုရးဍုၚ်မန် နစၟတ်တ္ၚဲ (၇)၊ ဂိတုသေပ်တေမ်ဗါဂှ်နွံရောၚ် ဂွံတီကေတ်ရ။

ပ္ဍဲသၞေဟ်ကွဳစက် ဇြေဂျဵု ဒၞါဲကွဳစက်ဇၞော် ဖ္ဍိုက်ဗၞိက်တံ ဂွံဒေါံဂှ် ဟိုတ်နူလုပ်သိုၚ်စုတ် ရုၚ်ခြိုၚ်စွံကပေါတ်ဗၞိက် နာနာတံဂှ်ရ ကွဳစက်ဖ္ဍိုက်ဗၞိဟ်တံ ဒးလုပ်ဒေါံ ပ္ဍဲအကြာအရာပ် ကေုာံ မွဲဒမြိပ်သ္ကဲသ္ကဲဂၠံၚ်တံဂှ်တုဲ ပရေၚ်ကယျာန်ဓဝါန် ဒှ်ပြသၞာ ကဵုရဲ အရာပ် ရဲသ္ၚိမုက်ဂၠံၚ်တံနွံကၠုၚ်ရောၚ် ဥူကျဝ်ဝေန်မိုၚ် ညးအုပ်ကာ ကမ္မတဳကောပ်ကာဲထိၚ်ဒဝ်ကွဳယာန်တွဵုရးဍုၚ်မန် ဂးရ။

ကွဳစက်ဇၞော်ဖ္ဍိုက်ဗၞိက်တံ အဃောဒေါံဇူမံၚ် အပ္ဍဲသၞေဟ်ကွဳစက်ဇြေဂျဵု (MNA)

ကွဳစက်ဇၞော်ဖ္ဍိုက်ဗၞိက်တံ အဃောဒေါံဇူမံၚ် အပ္ဍဲသၞေဟ်ကွဳစက်ဇြေဂျဵု (MNA)

“ဒၞါဲနွံဒၟံၚ် အပ္ဍဲသၞေဟ်ကွဳစက်ဂှ် ကွဳစက်ဖ္ဍိုက်ဗၞိက်တံ လုပ်ဒေါံ ဟွံရုံရ၊ ဒၟါနူဂှ်ရ ဒးဒေါံပ္ဍဲသ္ကဲဂၠံၚ် ပ္ဍဲဂတမုက်သ္ၚိညးတၞဟ်ရ၊ ကွဳစက်တှေ် ကွဳစက်လဵုဟွံဟီု မၞိဟ်ဒဳ မၞိဟ်ဗက်ဍုတ်နွံဏောၚ်၊ ရဲကွဳစက်တံဏံ သွက်ဂွံခပဝ်ဇိုၚ်တဲဂှ် ရဲအရာပ်တံ ဟွံဒုၚ်တဲ၊ ကၠုၚ်တေၚ်ဒၟံၚ် မွဲဏှေံမွဲဏှေံ” ဥူကျဝ်ဝေန်မိုၚ် ဂးရ။

ကွဳစက်ဖ္ဍိုက်ဗၞိက် နူတွဵုရး ကေုာံ ရးဒေသဇၞော် တၞဟ်ဟ်တံ လုပ်စိုပ်ဒၟံၚ်ပ္ဍဲဍုၚ်မတ်မလီုဂှ် အခိၚ်ကသီုတှေ် မွဲမွဲတ္ၚဲ ကွဳစက် ဗၞိက် နွံၜိုတ် ဒ္စါံကၠံဖ္ဍိုက်တုဲ လိုက်ဝှ်တိကှ်မ္ဂး မွဲမွဲတ္ၚဲ မွဲလ္ၚီမပြၚ် ဥူကျဝ်ဝေန်မိုၚ် ဆက်ဟီုထ္ၜးရ။

“ကွဳစက်ဂွံဒေါံဂှ် ဒၞါဲသၠဲသၠဲလးလး ဟွံမွဲ၊ ၜိုတ်ၜေတ်ဂွံကဵုဂွံ ဒးလုပ်ထ္ပက်ဒေါံ ပ္ဍဲပွဳဗွိုၚ် ဇြေကျိုဝ်ဂှ်ရတှေ် လ္ၚဵုဂှ် ဒေါံဒၞါဒး ဂတမုက်ဆေၚ်ဍေံတံတှေ် ဍေံတံညာန်ကၠုၚ်၊ ဟလဵုဂွံပ ဒးဂၠာဲဒၞါဲသၠးသၠးတုဲတှေ် ဒးဒေါံ” ူညာဏ်ထောန်ဥူ ညးဒဳကွဳစက် လ္ဂုၚ်ကဵုမတ်မလီု ဟီုရ။

ယဝ်ထပ်ကၠောန် သၞေဟ်တၟိ သွက်ကွဳစက်ဗၞိက်တှေ် ဂွံဇူဒေါံၜိုဟ်ဟ်သြိုဟ်ဟ်မာန်၊ လုပ်တိတ်လေဝ်လောဲသွာ၊ ဒေါံဒး ဂတမုက်သ္ၚိညးတၞဟ် ဆေၚ်ဖျာညးတၞဟ်တှေ် ဒးဟီုဂးညးသ္ကံ၊ မှက်ဇကုကဵုဇကု ဂွံလုပ်ဇူဗၠးဗၠးၜးၜးတှေ် မူပြသၞာလေဝ် ဟွံဒးဆဵုကၠုၚ်မွဲလှေ် ဥူညာဏ်ထောန် ဂးရ။

“အကာဲအရာလၟုဟ်ဂှ် လၟိဟ်ကွဳစက်ကဵု အယျဲသၞေဟ်ကွဳစက်ဂှ် ကရိုက်ဍေံဟွံကြိုက်ရ၊ ကွဳစက်ဂှ် ဂၠိုၚ်တိုန်ကၠုၚ်တှေ် ခဠာတ်ဂှ် က္ဍန်အာ၊ ယဝ်ပြံၚ်ဗဒှ်ကဵုဒၞါဲတှေ် ပြေပြံၚ်မာန်ဏောၚ်၊လၟုဟ်ဂှ် ခဠာတ်သၞေဟ်ဏံမွဲရနွံတှေ် ဒးၜေတ်ဒေါံ ကြေပ်ပ် ပ္ဍဲဏံဖအိုတ်” သာ်ဝွံ ကိုဝ်အံၚ်ဠာတ် မဒဳဒၟံၚ်ကွဳ မတ်မလီု-မုံယဲ၊ အံၚ်ပါန်ဂှ် ဟီုရ။

လုပ်ဒေါံပ္ဍဲသၞေဟ်ကွဳစက် ဟွံရုံဂှ်ရ ဒးတိတ်ဒေါံ ပ္ဍဲသ္ကဲဂၠံၚ်၊ ညးဂှ်ဒှ်ဒှ်လေဝ် ကၠုၚ်ဒေါံကၟာတ်လဝ် ပ္ဍဲဂတမုက်သ္ၚိဇကုတှေ် ဟွံဒးစိုတ်ဂှ် ဓမ္မတာရ၊ ပိုဲလေဝ် ဒၞါဲဏံဗၠးမံၚ် လုပ်ထ္ပက်ဂွံဏောၚ်ထေၚ်တှေ် လုပ်ဒေါံ၊ လ္ၚဵုဂှ် ဟွံဒးစိုတ် ကဵုပါဲတိတ်တှေ် ပိုဲပါဲကဵုနွံ၊ သွက်ကွဳစက်ဇၞော် ဖ္ဍိုက်ဗၞိက်တံဏံ ကၠောန်ကဵုဒၞါဲတၟိမာန်တှေ် ခိုဟ်သ္ဇက်ဟီုဟွံမွဲ ညးဆက်ဟီုရ။

ကပေါတ်ဗၞိက်တံအာကၠုၚ်ဂၠိုၚ်တှေ် ကွဳစက်ဖ္ဍိုက်ဗၞိဟ် လုပ်စိုပ်မတ်မလီုလေဝ် ဂၠိုၚ်ကၠုၚ်ကီုဂှ်ရ ညံၚ်ဂွံစှေ်ကဵု လက်သန်ဍုၚ်ဇၞော်မွဲကီုဂှ် ကွဳစက်ဂမၠိုၚ် ဇူ လုပ်တိတ် ညံၚ်ဂွံနွံကဵုသၞောတ်ဗ္ၜတ်ချိုတ်တ်ပၠိုတ်တ်ဂှ် ထေက်ကဵုဒးကၠောန် သၞေဟ်ကွဳစက်ဗၞိက် မွဲရောၚ် သာ်ဝွံ အတိုၚ်ကောံဓရီုပ္ညဳကမၠောန် လၟေၚ်ဂၞန် (၉/၂၀၁၆) နူကမ္မတဳကေၚ်ကာ ဂကောံကမ္မတဳကောပ်ကာဲထိၚ်ဒဝ်ကွဳယာန်တွဵုရးမန် မကၠောန်ကၠုၚ်လဝ် ပ္ဍဲတ္ၚဲ (၂၉/၈/၂၀၁၆) တေံဂှ်ဟေၚ် ဖျေံသ္ဂုတ်သွာတ် သွက်ဂွံပ္တိုန်ထ္ၜးကဵု ဂကောံအလဵုအသဳ တွဵုရးဍုၚ်မန်ရ။

Written by

Related Posts

ပရေင်တြးပၟတ်ဓာတ်လလဳ ပ္ဍဲဒေသရေဝ်သၟဝ်ကျာ ဖအောန်ဖျေံလဝ်အခိင်

ပရေင်တြးပၟတ်ဓာတ်လလဳ ပ္ဍဲဒေသရေဝ်သၟဝ်ကျာ ဖအောန်ဖျေံလဝ်အခိင်

ဟိုတ်နူပရေင်ခက်ခုဲကၠေင်စက်တုဲ ဓာတ်လလဳဒေသရေဝ်သၟဝ်ကျာ ဖအောန်ဖျေံအခိင် ဗလးပၟတ်ရောင် နူကဵုတၠကမၠောန် ဗလးဓာတ်လလဳ ပတိတ်လလောင်လဝ်ရ။

သွက်ဂွံလိင်မၞိဟ်ယိုက်ဝန်ပၞာန်ဗၟာ စၞးကွာန်ဂှ် အုပ်ဓုပ်ကွာန်တံ ကၠတ်ဗက်မံင်ဩန် နဲညးကဵုညးနွံ

သွက်ဂွံလိင်မၞိဟ်ယိုက်ဝန်ပၞာန်ဗၟာ စၞးကွာန်ဂှ် အုပ်ဓုပ်ကွာန်တံ ကၠတ်ဗက်မံင်ဩန် နဲညးကဵုညးနွံ

လဂွံကဵုသၞောဝ်ဥပဒေ ညးဍုင်ကွာန်တံ ဇၟာပ်အာယုက်စိုပ် ဒးလုပ်ယိုက်ဂၠေင်သ္ပကောန်ပၞာန်ဗၟာဂှ် အုပ်ဓုပ်ကွာန်တံ နဲကဲညးကဵုညး ကၠတ်ဗက်မံင်ဩန်တုဲ ဂၠာဲလိင်ဗပေၚ်စုတ်လဝ်မၞိဟ် စၞးကွာန်နွံ ရောင် ညးလုပ်ဂကောံအုပ်ဓုပ်ကွာန် ပွိုင်ဍုင်ရေဝ်သၟဝ်ကျာ မွဲတၠ ဟီုလဴထ္ၜးရ။

ပ္ဍဲတ္ရဲကောန်ဂကူမန်ဂှ် ဟွံကၟာတ်ဘာလေဝ် ကွးဘာတိုန် ဟွံမွဲ

ပ္ဍဲတ္ရဲကောန်ဂကူမန်ဂှ် ဟွံကၟာတ်ဘာလေဝ် ကွးဘာတိုန် ဟွံမွဲ

ပ္ဍဲတ္ၚဲကောန်ဂကူမန် မာ် (၁) စွေက်ဂှ် ၜိုန်ရဘာဟွံကၟာတ်ကၠာလေဝ် နကဵုဓဝ်သမ္တီဇကုကဵုဇကု ကွးဘာတံ ဟွံတိုန်ဘာအိုတ်ရောင် မိမတံကဵု ကွးဘာတံ ဟီုရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.