သွက်ဂွံပံက်ကမ္မတဳပံက်တောဲ မၚ်ရံၚ်ပရေၚ်ဒေါံပန်ပှော် အဆံၚ်ဒေသ (JMC-L) ပ္ဍဲဒေသဂကောံရပ်လွဟ် ကေါန်ဍုၚ်အရၚ် ထ္ပက်စၟတ်တဲလိက်ကသုက် တုပ်စိုတ်ပရေၚ်ဒေါံပန်ပှော်အလုံဍုၚ် NCA တုဲတံဂှ် သြန် (ဗာတ်ဂျေတ်) ဟိုတ်နူဟွံမွဲဏီဂှ်ရ ဒဵုလၟုဟ်ပံက်ဟွံမာန်ဏီဖိုဟ် သာ်ဝွံ ဒံက်တာမေန်ဇြဝ်ဥူ သ္ကိုပ်စၞောန်ပ္ညုၚ် ကေၚ်ကာ ကမ္မတဳပံက်တောဲ မၚ်ရံၚ်ပရေၚ်ဒေါံပန်ပှော်အလုံဍုၚ် JMC ဟီုရ။

“မွဲပၠန်ဂှ် သွက်ဂွံပံၚ်တောဲ ဂေတ်စၟဳစၟတ်ဒေသ (သ္ပ Monitoring) မွဲဒၞါဲကဵု မွဲဒၞါဲဂှ်လေဝ် ချူလဝ်အစဳဇန် တုဲမံၚ်ကီုရ၊ ဆ္ဂး ဗာတ်ဂျေတ် ဟွံမွဲတှေ် ကၠောန်ဟွံမာန်ဏီ” ညးတေံ ဂးရ။

ဒံက်တာမေန်ဇြဝ်ဥူ အဃောပ္တိုန်ဂလာန် ပ္ဍဲကောံဓရီု JCB (Min Zaw Oo Facebook)

အတိုၚ်လိက်ကသုက် NCA မ္ဂး ဒးဆက်ပံက် ကမ္မတဳပံၚ်တောဲမၚ်ရံၚ်ပရေၚ်ဒေါံပန်ပှော် အဆံၚ်ကၟိန်ဍုၚ် (JMC-U)၊ ကမ္မတဳပံၚ်တောဲ မၚ်ရံၚ်ပရေၚ်ဒေါံပန်ပှော် အဆံၚ်တွဵုရး (JNC-S) ကေုာံ ကမ္မတဳပံၚ်တောဲ မၚ်ရံၚ်ပရေၚ်ဒေါံပန်ပှော် အဆံၚ်ဒေသ (JMC-L) တံ ဏီရောၚ်။

“ဗာတ်ဂျေတ်ပိုဲ ဟွံတန်ကြန်ဏီတှေ် လၟိဟ်ၜိုတ်လဵုရောဟီုဂှ် ပြဟ်ဟ်ဏံ ဟီုဟွံမာန်ဏီ၊ ဂကောံဓရီု JCB ဏံ ဖျေံသ္ဂုတ်သွာတ်မှ ပိုဲတီချိုတ်ပၠိုတ်မာန်ဏောၚ်” ဒံက်တာဇြဝ်ဥူ ဂးရ။

ကောံဓရီု JCB (ဂကောံပံၚ်ကောံပ္ညဳပ္ညပ်ပရေၚ်သြန်ဂအုံ ကမၠောန်ၜိုဟ်လလံ) ဂှ် ကၠောန်ဒၟံၚ် ပ္ဍဲနေပျဳဒဝ် ပ္ဍဲတ္ၚဲဖေဖဝ်ဝါရဳ ၂၃ ရ။ပ္ဍဲကောံဓရီုဏံ ဒဝ်အံၚ်သာန်သုကျဳကီု သီုဂကောံကမ္မယှေန် ပရေၚ်ၜိုဟ်လလံ အလဵုအသဳ၊ ညးစၞးဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ NCA တုဲ ကေုာံညးစၞးဂကောံ ဒပ်ပံၚ်ကောံ UNFC တံတိုန်စိုပ်လဝ်တုဲ သဳကၠဳပ္တိုန်ထ္ၜးလဝ် ကိစ္စဗာတ်ဂျေတ် သွက်ကမၠောန် JMC ဏံကီုရ ဒံက်တာမေန်ဇြဝ်ဥူ ဂး။

တုဲကၠုၚ်ဏံ ပ္ဍဲဒေသကရေၚ်၊ ဒေသမန်၊ ဒေသသေံ၊ ဒေသရးတနၚ်သဳ ကေုာံရးဒေသဇၞော်ဗဂေါ ဆ ၅ ဒၞါဲတံဂှ်ရ ပံက်ဂွံလဝ် ကမ္မတဳပံၚ်တောဲမၚ်ရံၚ်ပရေၚ်ဒေါံပန်ပှော်တုဲ ပ္ဍဲလ္ပာ်တွဵုရးရခေၚ်၊ တွဵုရးကချေၚ် မဒှ်ဒေသ ဗော်ပရေၚ်ဗၠးၜးကောန်ဂကူရခေၚ် ALP ကေုာံ ဒေသမုက်ဒပ်ကောန်ဂကူချေၚ် CNF ထ္ပက်စၟတ်တဲ NCA တုဲတံဂှ်မ္ဂး ပံက်ကမ္မတဳပံၚ်တောဲ ဟွံမာန်ဏီဖိုဟ်ရ။

“ရဲဒဴဘဲပၞာန် နူမျာၚ်ဂျဳၚူတေံ ကၠုၚ်ဒၟံၚ်ယျ၊ ပြသၞာ စဒှ်ယျ မိၚ်ဗက်ဟွံဂတာပ် နူကဵုအဏံ ပိုဲတံအာ၊ ပိုဲအာဂှ် နကဵု JMC နကဵုညးစၞးလ္ပာ်အရာပ်ရ၊ ဆ္ဂး ဒှ်ကၠုၚ်အခက်ကဵု သြန်ဗာတ်ဂျေတ်ဟွံမွဲ” သာ်ဝွံ နာန်သေအဲ ဒုဥက္ကဌ (၂) ကမ္မတဳပံၚ်တောဲမၚ်ရံၚ်ပရေၚ်ဒေါံပန်ပှော် တွဵုရးကရေၚ် (JMC-Karen State) ဂးရ။

ကမ္မတဳပံၚ်တောဲမၚ်ရံၚ်ပရေၚ်ဒေါံပန်ပှော်တွဵုရးကရေၚ်ဝွံ ပ္ဍဲဒေသမျာၚ်ဂျဳၚူဂှ် ဗၞတ်ၜါဝါ၊ လ္ပာ်ပွိုၚ်ဍုၚ် မာၚ်ကာန်တေံဂှ် ဗၞတ်မွဲဝါ အာစိုပ်လ္ၚတ်ကၠုၚ်လဝ်တုဲရ။

သွက်ဂွံဓမံက်ရုပ်ရဴ ကမၠောန်ပံၚ်တောဲ မၚ်ရံၚ်ပရေၚ်ဒေါံပန်ပှော် ပ္ဍဲသၞာံ ၂၀၁၇ ဏံ သြန်ဒဝ်ဠာအမေရိကာန် ၆.၅ ဗဳလျာန် ပ္တိုန်ထ္ၜးလဝ် ကု JCB တုဲဣရ ဂွံတီ။