ရန်ကဵုမိက်ဂွံစဵုဒၞါ ဝါဲရာတ် ယဲ H1 N1 က္တဵုဒှ်ဒၟံၚ်လၟုဟ်ဏံတုဲ စာၚ်နူဍုၚ်ထဝါဲ ညံၚ်ဂွိုအ်စိုပ်ပ္ဍဲတွဵုရးဍုၚ်မန် ပပ္တံနူဂျူလာၚ် (၂၈) တုဲ နူကမ္မတဳစဵုဒၞါဲဂစေံကၞေမ်စာၚ်အဒါ ပွိုၚ်ဍုၚ်ရေဝ် မၚ်ဒၞါဒၟံၚ် ပ္ဍဲသၞေဟ်ကၚ်ဒဒန်ဇၞော် ပါၚ်လုပ်ဍုၚ်ရေဝ်တေံရောၚ် ဂွံတီကေတ်ရ။
“ပ္ဍဲထဝါဲတေံလေဝ် ကၟာတ်လဝ်ကီုရ။ ဆ္ဂး ယဝ်ၜက်တိတ်ကၠုၚ်နူဂှ် ဟွံသေၚ်သာ်ဂှ် ယဝ်ကၠတ်ပၠောပ်နၚ်နွံမ္ဂး ညံၚ်ဂွိုအ်ၜက်လုပ် ဒးမၚ်ဒၞါ ပ္ဍဲက္ဍိုပ်ဒဒန်ရေဝ်ရ။ ယဝ်ရပ်ဂွံတှေ် ပလီုကမၠက်ထောံလဝါဲဂှ်ဏောၚ်” သာ်ဝွံ ဒံက်တာတာန်ထောန်အံၚ် ညးအုပ်ကာ ကမ္မတဳစဵုဒၞါဂစေမ်ကၞေမ်စာၚ်အဒါပွိုၚ်ဍုၚ်၊ သ္ကိုပ်က္ဍိုက်ပ် ဌာနက္ဍိုက်ပ်ဝဳယဲ ကေုာံဝဳဝတ်တိရစ္ဆာန်ပွိုၚ်ဍုၚ်ရေဝ် ဟီုကဵုဌာန်ပရိုၚ်မန်ရ။
ခရိုၚ်ဝဳစာၚ် (MNA)
သွက်ဂွံပရဟ်ဒုၚ် စဵုဒၞါယဲဇှ်ချာံဂစေမ်ကၞေမ် H5 N1 အပ္ဍဲတွဵုရးဍုၚ်မန်ဂှ် အလဵုအသဳတွဵုရးမန် ပလံၚ်လဝ်လိက်စၞောန် ကုညးမၞုံတာလျိုၚ် (၁၀) ပွိုၚ်ဍုၚ်တံ နစၟတ်တ္ၚဲ ဂိတုဂျူလာၚ် ၂၆ ရောၚ် ဂွံတီလဝ် နူဌာနက္ဍိုက်ပ်ဝဳယဲ ကေုာံဝဳဝတ်တိရစ္ဆာန် တွဵုရးဍုၚ်မန်ရ။
“သွက်စာၚ်ကၠုၚ်နူလ္ပာ်ထဝါဲတေံဂှ်တှေ် ကၟာတ်လဝ်ပိုတ်တ်ရ။ ယဝ်ကၠုၚ်နူ တွဵုရး/ရးတၞဟ်မ္ဂး ကၠုၚ်နူလဵု ဒဒှ်ရယဲတိရစ္ဆာန် အးမံၚ်ဏောၚ်ဂှ် လိက်ထံက်ဂလာန် ဟွံပါကၠုၚ်မ္ဂး ဟွံကဵုအခေါၚ်တတ်ပုဟ်။ က္လေၚ်တှေ်က္လေၚ်။ ဟွံက္လေၚ်တှေ် ပိုဲပလီုကမၠက်ထောံဒၞါဲဂှ်ဏောၚ်” သာ်ဏံ ဥူအံၚ်တိုၚ်ဝေန် သ္ကိုပ်က္ဍိုက်ပ်တွဵုရးဍုၚ်မန် နူဌာနက္ဍိုက်ပ်ဝဳယဲကေုာံဝဳဝတ်တိရစ္ဆာန် တွဵုရးဍုၚ်မန် ဟီုရ။
ရန်ကဵုသ္ဂောံဒုၚ်စဵုဒၞါလဝ် ဇှ်ချာံဂစေံကၞေမ် မကြမ်သ္ကာတ်ကၠောံထၞာန်လောဲသွာဂှ်တုဲ ပ္ဍဲဇၟာပ်ခရိုၚ်စာၚ် အပ္ဍဲတွဵုရးဍုၚ်မန် ဗက်ဂၟဟ်ဒၟံၚ် ဂဥုဲဂစိုတ်ဝါဲရာတ်ဇှ်ချာံဂစေမ်ကၞေမ်တံဖိုဟ်ရဂှ်လေဝ် ဒံက်တာဥူအံၚ်တိုၚ်ဝေန် ဆက်ဟီုထ္ၜးရ။
ပ္ဍဲခရိုၚ်ဝဳစာၚ်စခၟာဲ ဒံက်တာမိုၚ်နဳ အရာပ်(ဝဲကျွန်းထိန်သစ်) ပွိုၚ်ဍုၚ်ထဝါဲ၊ခရိုၚ်ထဝါဲ၊ ရးဇၞော်တနၚ်သဳဂှ် စာၚ်ချိုတ်ဂၠိုၚ်တုဲ သွက်ဂွံတီဟိုတ်ဖဵုမာန် ပ္တိုန်ဏာစာၚ်ချိုတ်မွဲၜါ ပလံၚ်ကဵုဗ္ဒမ်ပါ်ဓါတ် စံၜတ်ယဲတိရစ္ဆာန် ဍုၚ်လ္ဂုၚ်တေံဂှ် စံၜတ်ဆဵုဒး H5 N1 Positive ယဲဂစေမ်ကၞေမ်သ္ကာတ်တ်မြဟ်ဟ်ရ။ ဒၟါနူဂှ်ရ စာၚ်နူထဝါဲ ညံၚ်ဂွိုအ်ၜက်လုပ်ကၠုၚ် ပ္ဍဲတွဵုရးမန်ဂှ် ဒးမၚ်ဒၞါတာဏောၚ် ဂွံတီကေတ် နူဌာနက္ဍိုက်ပ်ဝဳယဲကေုာံဝဳဝတ်တိရစ္ဆာန် တွဵုရးဍုၚ်မန် ရ။
ပ္ဍဲတွဵုရးမန် (၁၀) ပွိုၚ်ဍုၚ် သီုဖအိုတ်ခရိုၚ်ဝဳစာၚ် နွံ (၆၅၀) ခရိုၚ်ရဂှ်လေဝ် ဂွံတီကေတ် နူဌာနက္ဍိုက်ပ်ဝဳယဲကေုာံဝဳဝတ်တိရစ္ဆာန် တွဵုရးဍုၚ်မန်ကီုရ။
မၞိဟ်ဗြဴပလုၚ်ယဲဒၟံၚ်မွဲတၠ ပ္ဍဲဗ္ဒမ်ဝဳယဲ (ဇာနည်အောၚ်) ဍုၚ်မတ်မလီုဂှ် ဓဝိၚ်သံသယ H1N1 လုပ်ကၠုၚ်တုဲ ပ္ဍဲဂိတုဂျူလာၚ် (၂၈) ပလံၚ်ပ္တိုန်ဏာ ရုၚ်ဂဥုဲဇၞော် ဍုၚ်လ္ဂုၚ်တေံရောၚ် ဂွံဆဵုကေတ်ပ္ဍဲပရိုၚ်ကီုရ။
