ကိစ္စသၞာဲဒါဂၠေၚ်ဝန် သၟဟ်ကဵုအဆံၚ်သ္ကိုပ်က္ဍိုက်ပ် နူဌာနက္ဍိုက်ပ်ပရေၚ်အုပ်ဓုပ်နာနာ မကေတ်ဒၟံၚ်တာလျိုၚ် အပ္ဍဲကၠတ်ထဝ် အာတ်လဝ်သြန် ပ္ဍဲဇခဳတန်ဍောတ် ခါန်လဝ်တၟိ သွက်ရုၚ်ကၠတ်ထဝ်ဂှ်တုဲ နူဌာနက္ဍိုက်ပ် ပရေၚ်အုပ်ဓုပ်နာနာ ရပ်စပ်စၟဳစၟတ်ဒၟံၚ် အတိုၚ်ဥပဒေသ ညးဂၠေၚ်ဝန်ဒုၚ်ကာဂှ်ဣရရောၚ် ဂွံတီကေတ် နူဂကောံအလဵုအသဳ တွဵုရးဍုၚ်မန်ရ။

စပ်ကဵုပရေၚ်ဏံ အတိုၚ်နူကၠတ်ထဝ်တွဵုရး စၟဳစၟတ်ဂွံလဝ်ဂှ် ပလံၚ်ဗ္စိုပ်နၚ်တုဲ နူဌာနက္ဍိုက်ပ် ပရေၚ်အုပ်ဓုပ်နာနာ တွဵုရး စၟဳစၟတ်လဝ်တုဲဣရ။

“ကၠတ်ထဝ်ကဵုနၚ်ပရိုၚ်တုဲ နူဌာနက္ဍိုက်ပ်ပရေၚ်အုပ်ဓုပ်နာနာ ပံက်ဂကောံဂၠိုက်ဂၠာဲစၟဳစၟတ်မွဲတုဲ အတိုၚ်လၟေၚ်သၞောတ်ဝ်ရဲဂၠေၚ်ဝန်တံဂှ်ရ စၟဳစၟတ်လဝ် လၟုဟ်စၟဳစၟတ်တုဲဣရ၊ ဣဏံတုဲမ္ဂး ဍေံတံဂှ် ဟိုတ်နူဒှ် ရဲဂၠေၚ်ဝန် ဌာနက္ဍိုက်ပ်ပရေၚ်အုပ်ဓုပ်နာနာဂှ်ရ တၚ်စၟဳစၟတ်လဝ်တံဏံ ဒးပ္တိုန်ကဵု ရုၚ်ဇၞော်ဌာနက္ဍိုက်ပ် ပရေၚ်အုပ်ဓုပ်နာနာတေံဏောၚ်” သာ်ဝွံ ဥူမျေအ်တာန်ဝေန် သ္ကိုပ်စၞောန်ပ္ညုၚ် ဂကောံအလဵုအသဳ တွဵုရးဍုၚ်မန် ဂးရ။

မၞိဟ်ဂၠေၚ်ဝန်ဒုၚ်ကာကၟိန်ဍုၚ် ဒးဒုၚ်တေၚ်လဝ်ဂှ် အတိုၚ်စၟဳစၟတ်လဝ် ဒုဟ်ယဝ်နွံပြာကတ်မ္ဂး နကဵုဒုဟ်ဒဏ် ဥပဒေညးဂၠေၚ်ဝန်ဒုၚ်ကာကၟိန်ဍုၚ်ဂှ်ဟေၚ် ကေတ်အရေဝ် ရပ်စပ်အာဏောၚ် ညးတေံဆက်ဟီုရ။

“ဒုဟ်ဒဏ်ဂှ် နွံၜိုတ် ၉ ဂကူ၊ ဥပမာ ကဵုသတိ နကဵုလိက်၊ ဗဒေံါထောံနူတာလျိုၚ်၊ တုဲတှေ်နုက်ပ္တိတ်ထောံ၊ ပ္တိတ်ထောံနကဵုဂလာန်ဂရိုဟ်ဒုဟ်၊ ပ္တိတ်ထောံ နူအခေါၚ်ဒုၚ်စသိုၚ် ပေန်ဇြေန် အေဗီုဗီုတံဏံ ဂကူဒုဟ် နွံမံၚ်အဆံၚ်အဆံၚ်တုဲ ရံၚ်လ္တူပွဒုဟ်ဍေံက္လိလောန်ဂှ်တုဲ ကေတ်အရေဝ် နကဵုလၟေၚ်ဒုဟ် ၉ သာ်ဏံဏောၚ်” သာ်ဝွံ ဥူမျေအ်တာန်ဝေန် ဂးရ။

သွက်ဂွံကဠအ်စ ဥက္ကဌ ကေုာံ ဒုဥက္ကဌကၠတ်ထဝ် သီုကဵုသ္ကိုပ်စၞောန်ပ္ညုၚ်ဏောၚ်ဂးတုဲ သၞာဲဒါဂၠေၚ်ဝန်ပရေၚ်အုပ်ဓုပ် ကၠတ်ထဝ် ၃ တၠ မၞုံအဆံၚ်သ္ကိုပ်က္ဍိုက်ပ်တံ အာတ်လဝ်သြန် ပ္ဍဲဇခဳတန်ဍောတ် မခါန်လဝ်တၟိ မွဲတၠတှေ် ၃ ကိုဋ် မသၟဟ်ကဵုအကွက်ခရိတ်ဂိတု ၜါဂိတု နွံကၠုၚ်ဒၟံၚ်ရောၚ်၊ ဟိုတ်ဂှ်ရ ရပ်စပ်ကေတ်ကဵုအရေဝ်ညိ သာ်ဝွံ အဃောဂိတုဂျူလာၚ် ၄ တေံ နူဇခဳတန်ဍောတ်မွဲတၠ တေၚ်ဗ္စိုပ်လဝ် ရုၚ်ကၠတ်ထဝ်ရ။

လ္တူလိက်တေၚ်စိုပ်ကၠုၚ်ဂှ် နူကမ္မတဳသ္ၚဳဂၠိပ်စၟဳစၟတ် လိက်တေၚ်ကေုာံလိက်ဒုၚ်ကရုဏာ အပ္ဍဲကၠတ်ထဝ်တွဵုရးဍုၚ်မန် ဂၠိုက်ဂၠာဲစၟဳစၟတ် ဆဵုကေတ် ဒဒှ်ဍာံဍာံတုဲ လိက်ဒုၚ်စဳရေၚ်စၟဳစၟတ်ဂှ် နူဥက္ကဌကၠတ်ထဝ် မွဲတဆံၚ် ပလံၚ်ဗ္စိုပ်လဝ် ကုအလဵုအသဳတွဵုရး ကေုာံဌာနက္ဍိုက်ပ်ပရေၚ်အုပ်ဓုပ်တွဵုရး ပ္ဍဲဂိတုဂျူလာၚ် ၁၇ တေံရ။

ညးဂၠေၚ်ဝန် ဒုၚ်ကာကၟိန်ဍုၚ်မ္ဂးဂှ် ဒးယိုက်ဂၠေၚ် ရေၚ်တၠုၚ်ကမၠောန် အတိုၚ်စေဝ်ပၞောန် ဥပဒေညးဂၠေၚ်ဝန်ဒုၚ်ကာ ကၟိန်ဍုၚ်ရောၚ်ဒှ်တုဲ ယဝ်လုလောန်ၜက်အာနူဥပဒေဂှ်မ္ဂး ဒးဒုၚ်ကေတ်အရေဝ် ဗွဲမဗဗွဲကဵုပွဇကုဂှ်ဏောၚ် သ္ကိုပ်စၞောန်ပ္ညုၚ် နူဂကောံအလဵုအသဳ ဂးရ။