ညးကဵုကသပ်ကၟိ်န်ဍုၚ် ဒဝ်အံၚ်သာန်သုကျဳ ဥက္ကဌ ဌာနဗဟဵုပရေၚ်သၟဟ်သၟန်ကောန်ဂကူ ကေုာံပရေၚ်ၜိုဟ်လလမ် (NRPC) ကဵု ဂကောံညးစၞးဗော်ဍုၚ်မန်တၟိ ဒုဥက္ကဌဗဟဵု နာဲဟံသာ က္ဍိုက်ပ်တံ ဂိတုသေပ်တေမ်ဗာ (၁) မံက် ဒေါဝ်တ္ၚဲ ၁၂ နာဍဳဂှ် ဆဵုဂဗညးသ္ကံ ပ္ဍဲရုၚ် NRPC နေပျဳဒဝ်တေံရ။
“ဗီုပြၚ်ဗော်ဍုၚ်မန်တၟိ ကဵု ဒဝ်အံၚ်သာန်သုကျဳတံ ဆဵုဂဗလၟုဟ်ဂှ် ဒှ်လဂါံဇိုၚ် ပဠေဝ်စ အရၚ်ဂွံထ္ပက်စၟတ်တဲ NCA ဏောၚ် ပိုဲညာတ်ကေတ်ဗီုဂှ်” သာ်ဝွံ ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဟီုကဵုဌာန်ပရိုၚ်မန်ရ။
ပေါဲဆဵုဂဗ ညးကဵုကသပ်ကၟိန်ဍုၚ် ကဵု ဗော်ဍုၚ်မန်တၟိ (ရုၚ်ကဵုကသပ်ကၟိန်ဍုၚ်)
မွဲသာ်ပၠန်ဂှ် အပ္ဍဲပွိုၚ် ၃ ဂိတု ဒှ်ထ္ပက်စၟတ်တဲ NCA မာန်ဏောၚ်ဂှ်လေဝ် တုဲကၠုၚ်ခြာဟွံလံဏံ ဗော်ဍုၚ်မန်တၟိ ကဵုလဝ်ကတိပါၚ် ကုသ္ကိုပ်ဝန်ဇၞော်တွဵုရးမန်ကီုရ။
ပ္ဍဲပေါဲဆဵုဂဗလၟုဟ်ဏံ အကာဲအရာ ဗီုဗော်ဍုၚ်မန်တၟိ လုပ်ရေၚ်တၠုၚ်ကၠုၚ် ပ္ဍဲဒဒှ်ပရေၚ်ၜိုဟ်လလမ်ဂှ် ဟီုဂးသဳကၠဳကၠုၚ် ကၠးကၠးမးမး ကေုာံဒဝ်အံၚ်သာန်သုကျဳကီုရ ကမ္မတဳလလောၚ်ပ္တိတ်ပရိုၚ် နူရုၚ်ကဵုကသပ်ကၟိန်ဍုၚ် လလောၚ်ကၠုၚ်လဝ်သာ်ဂှ်ကီုလေဝ် သဳကၠဳလဝ်ပရူလဵုကီုရောဂှ် ဓမံက်ထ္ၜးလဝ်ဟွံမွဲရ။
ဗီုဂှ်ကီု ၜိုန်ကေတ်အဆက် သၟာန်သၟုက်လဝ် နကဵုဖုၚ် ကုဥူဇြဝ်ဌေ သ္ကိုပ်စၞောန်ပ္ညုၚ် နူရုၚ်ကဵုကသပ်ကၟိန်ဍုၚ် ကေုာံညးနွံကဵုအခေါၚ်ဟီုဂး နူဗော်ဍုၚ်မန်တၟိတံကီုလေဝ် ညးတံဟွံဟီု မွဲသာ်ရ။
ပ္ဍဲပေါဲဆဵုဂဗသဳကၠဳဏံ ကရောံ ညးကဵုကသပ်ကၟိန်ဍုၚ် ဒဝ်အံၚ်သာန်သုကျဳ ဥက္ကဌ ဌာနဗဟဵု ပရေၚ်သၟဟ်သၟန်ကောန်ဂကူကေုာံပရေၚ်ၜိုဟ်လလမ်ဂှ် ဝန်ဇၞော်ကၟိန်ဍုၚ် ဥူကျဝ်တေအ်သှိုဲ နူဌာနဝန်ဇၞော် ရုၚ်ကဵုကသပ်ကၟိန်ဍုၚ် သီုမဒှ် ဒုဥက္ကဌ ဌာနဗဟဵုပရေၚ်သၟဟ်သၟန်ကောန်ဂကူကေုာံ ပရေၚ်ၜိုဟ်လလမ်၊ (ဦးသောၚ်းထွန်း) ညးကဵုကသပ် ဆေၚ်ကဵုပရေၚ်ဂီုကၠီုကောန်ဂကူ၊ ဒုဝန်ဇၞော် (ဦးမၚ်းသူ) ဌာနဝန်ဇၞော် ရုၚ်သမ္မတကၟိန်ဍုၚ်၊ ဒုဝန်ဇၞော် ဥူခေန်မိုၚ်တေန် ဌာနဝန်ဇၞော် ရုၚ်ညးကဵုကသပ်ကၟိန်ဍုၚ်၊ ဥူဇြဝ်ဌေ သ္ကိုပ်စၞောန်ပ္ညုၚ် နူရုၚ်ညးကဵုကသပ်ကၟိန်ဍုၚ်၊ နူဗော်ဍုၚ်မန်တၟိဂှ် ဒုဥက္ကဌ နာဲဟံသာ ကေုာံ ဖက်ဆောညးအုပ်ကာဗဟဵု သ္ကိုပ်ပၞာန်ဇဲယ၊သ္ကိုပ်ပၞာန်လျးဂကူ၊နာဲဝေန်လှ၊ နာဲအံၚ်မ္ၚဵု တံတိုန်စိုပ်လဝ် ဂွံတီကေတ်ရ။
0 Comments