သွက်ဂွံဂၠေံပ္တိတ်သြန်ဒမၠေံမာန် တၠကမၠောန် SME မန် ကဵု တိုက်သြန်ပရေၚ်ပိုန်ဒြပ်ဗၟာတံ ဆဵုဂဗသဳကၠဳ

by | Dec 4, 2017 | ပရိုၚ် | 0 comments

ပ္ဍဲတွဵုရးဍုၚ်မန် တၠကမၠောန် ဂကောံတဵုလွဳပ္တိတ်ထ္ၜိုတ်ဂမၠိုၚ်ကဵု တၠကမၠောန် အဇာဍောတ်/ဒေါဝ် SME ဂမၠိုၚ်တံ သွက်ဂွံဂၠေံပ္တိတ်သြန်ဒမၠေံ ဇရေၚ်ဗာဏ်(တိုက်သြန်)ပရေၚ်ပိုန်ဒြပ်ဗၟာ (မြန်မာ့စီးပွားရေးဘဏ်) မာန်ဂှ် ဆဵုဂဗသဳကၠဳညးသ္ကံ ဒၞာဲၝောံခန်သွံရာန်ဗၞိက်၊ ဍုၚ်မတ်မလီု၊ ပ္ဍဲဂိတုဒဳဇြေမ်ဗာ (၂) ဏံရ။

ပ္ဍဲကဵုပေဲါဆဵုဂဗသဳကၠဳဂှ်ဝွံ အဓိက ဆေၚ်စပ်ကဵု ပရေၚ်ပ္တိုန်ထ္ၜး တၠကမၠောန်ထ္ၜိုတ် (၃၀) တၠ ဂွံဂွံသြန်ဂၠေံ (ဒမၠေံ) သွက်ဂွံသိုၚ်ခၞံ ရုၚ်စက်သၟးဇ္ၚးထ္ၜိုတ်အဆံၚ်သၠုၚ် အပ္ဍဲတွဵုရးဂှ်တုဲ လ္တူတၚ်တၞဟ်ခြာ နူကဵုဗာဏ်(တိုက်သြန်) မဖျေံစၟတ်လဝ်ဂှ် သဳကၠဳညးသ္ကံရ။

ပေဲါဆဵုဂဗသဳကၠဳ တၠကမၠောန်မန်ဂမၠိုၚ်ကဵု ဗာဏ်ပရေၚ်ပိုန်ဒြပ်ဗၟာ(MNA)

“သွက်ဂွံဂၠေံသြန်ဂှ်တှ်ေ စေဝ်ပၞောန်ဖျေံစၟတ်လဝ်တံ နူကဵုဗာဏ် အကာဲအရာ ဂွံဒုၚ်တဲမာန်ဂှ် ဟိုတ်နူတၞဟ်ခြာမံၚ်ညိညနွံတုဲ သွက်ဂွံဂွံသြန်ဂၠေံဂှ် အခက်ခုဲနွံမံၚ်ညိညဂှ်ရ ဗာဏ်ပရေၚ်ပိုန်ဒြပ်ဗၟာကဵု တၠကမၠောန်တံ ဆဵုဂဗသဳကၠဳညးသ္ကံရ” သာ်ဝွံ ဝန်ဇၞော်ကေၚ်ကာကရေၚ် ဂကောံအလဵုအသဳတွဵုရးဍုၚ်မန် ဥုသဝ်အံၚ်မျေအ်ခါၚ် ဟီုရ။

အတိုၚ်သွဟ် ပေဲါဆဵုဂဗသဳကၠဳဂှ်မ္ဂး ပ္ဍဲကဵုတၚ်ဒုၚ်လျိုၚ်(အာမခံ) ပရေၚ်ပိုၚ်ပြဳဂှ် လိက်ဂရာန်ဟွံမွဲကီုလေဝ် နကဵုလိက် (ပုံစံ – ရ) အလဵုအသဳတွဵုရး ကဵုတၚ်ဒုၚ်လျိုၚ်(အာမခံချက်)ဟီုမ္ဂး သွက်ဂွံဂွံသြန်ဒမၠေံဂှ်နွံရောၚ် ညးဆက်ဟီုလဝ်ရ။

ၜိုန်ဂှ်ကီုလေဝ် နကဵုအလဵုအသဳတံဝွံ အတိုၚ်ညးတၠကမၠောန်ဂမၠိုၚ် ပ္တိုန်ထ္ၜးဂလာန်ဂှ် နတဲ ဒှ် / ဟွံဒှ် ကေုာံ အကာဲအရာ ပရေၚ်ပိုၚ်ပြဳဂှ် ဒးကလေၚ်စၟဳစၟတ်နွံရောၚ် ဥုသဝ်မျေအ်ခါၚ် ဆက်ဟီုလဝ်ရ။

ညးတၠကမၠောန်ဗွဲမဂၠိုၚ်တံဝွံ မိက်ဂွံဂၠေံသြန်ကီုလေဝ် ပ္ဍဲကဵုပရေၚ်ဒုၚ်လျိုၚ်ပိုၚ်ပြဳဂှ် ဟိုတ်နူသက်သဳ ပရေၚ်ပိုၚ်ပြဳ ဟွံခိုၚ်ကၠိုက်တုဲ သွက်သ္ဂောံကလိဂွံ သြန်ဒမၠေံဂှ် အခက်ခုဲနွံမံၚ်ရောၚ် ညးတာလျိုၚ် ဗာဏ်ပရေၚ်ပိုန်ဒြပ်ဗၟာကဵု တၠကမၠောန်တံ ဟီုရ။

“တၚ်ဍိုန်လျ သၟာဗ္ၚ(တောၚ်သူ)တံဂှ်တှ်ေ ပိုဲတံကြပ်သီုညးဖအိုတ်ဂှ် (ပုံစံ – ရ) ရနွံ။ နကဵု(ပုံစံ-၇) ညံၚ်ဂွံဂၠေံကဵုမာန်၊ ယဝ်ရ နဲဏံ ဟွံပြေပြံၚ်ဟီုတှ်ေ ပိုဲတံ နူကဵုအလဵုအသဳတွဵုရး သွက်ဂွံဂၠေံကဵုမာန်ဂှ် ဗာဏ်ဂှ် ဂၠေံကဵုအလဵုအသဳတွဵုရး ပိုဲတံဂှ် ဂၠေံနူကဵုအလဵုအသဳတွဵုရး မွဲအဆံၚ်မိက်ဂွံကလေၚ်ဂၠေံကဵုရ” သာ်ဝွံ ဥက္ကဌဂကောံတၠကမၠောန်ကွတ်တဲကွတ်စက် ကေုာံ ဂကောံသၟာဗၞိက်တွဵုရးဍုၚ်မန် ဥုဝေန်ထုၚ် ဟီုရ။

တုပ်သာ်ဂှ်ကီု သွက်ဂွံဂၠေံပ္တိတ်ကဵု အရၚ်တိတဵုထ္ၜိုတ် ပန်ဠက်ဨကပြၚ် အပ္ဍဲတွဵုရးဍုၚ်မန်ဂှ် ပ္တိုန်ထ္ၜးလဝ် ဇရေၚ်အလဵုအသဳတွဵုရးတုဲ ဗာဏ်ပရေၚ်ဖောအ်ဗြေဝ်ဝါဗ္ၚဗၟာ (မြန်မာ့လယ်ယာဖွံ႔ဖြိုးရေးဘဏ်) တံ သွက်သ္ဂောံဂၠေံပ္တိတ်ကဵုမာန်ဂှ် စဳဇန်မံၚ်ရ။

Written by

Related Posts

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

ပ္ဍဲစင်အသေအဟာန်တ္ၚဲကောန်ဂကူမန် လ္ဒောဝ်တပ်တပ်ဂှ် ဒးပစူသၠုင်လဝ်အလာံကၟိန်ဍုင်ရောင် ဂျာန်နဝါရဳ ၃ တုဲ ကၠုင်ဂှ် နူကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင်လိက်စေဝ်ပၞောန် စပ်ကဵုအလာံတုဲ မၞိဟ်လ္ၚဵုဟွံ ပေင်စိုတ်ရ။

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲကဵုသၞာံ ၂၀၂၅ ဏံ ညံၚ်မိမညးဍုၚ်ကွာန် ကေုာံ သၟတ်ကွးဘာမန်တအ် သ္ဂောံစကာအာ လိခ်ပတ်မန် လတူလပှ်ကျာမာန်ဂှ် နကဵုညးတာလျိုၚ်ဌာနကမၠောန်ပတိုန်လိခ်ပတ်မန် လတူဓါတ်လပှ်ကျာ ဘာကဝ်လိက်မန်တအ် ဂစာန်ကၠောန်မံၚ် (Mon E-book project) မွဲနွံဂှ် ဂွံတီကေတ်ရ။

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

ကြဴနူကဵု ကမ္မတဳကၠောန်ဗဒှ်တ္ရဲကောန်ဂကူမန် မရနုက်ကဵု (၇၈)ဝါ ဗဟဵုတံ ပတိတ်ကၠုင်လိက် စေဝ် ပၞောန် အလာံပ္ဍဲတ္ရဲကောန်ဂကူမန်ဂှ်တုဲ ညးဂမၠိုင် ဟီုပါ်ပါဲကၠုင်နွံရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.