ပေါဲသောၚ်က္လး လၟေၚ်ကမၠောန် NCA ဗော်ဍုၚ်မန်တၟိ လ္ဂာံဒုတိယဂှ် တ္ၚဲဏံ (အေဗရဴ ၂၆) ကၠောန်သ္ပ ပ္ဍဲဗ္ဒိုပ်ဝါဇြေန် ဒေသတိဍာ်ဗော်ဍုၚ်မန်တၟိ နွံဗၟံက်ဍုၚ်ရေဝ် ခရာၜိုတ် ၁၀ တိုၚ်ဂှ်တုဲ ညးစၞးဂကူမန် နူဒေသနာနာတံ တိုန်စိုပ် ၂၇၃ တၠရောၚ် သာ်ဝွံ ဂွံတီကေတ် နူကမ္မတဳကၠောန်ဗဒှ်အသေအဟာန်ရ။

နာဲဟံသာ ဒုဥက္ကဌဗော်ဍုၚ်မန်တၟိဂှ် ကေတ်တာလျိုၚ် နဒဒှ်သဘာပတိတုဲ ပ္ဍဲဂကောံသဘာပတိဂှ် က္ဍိုပ်သ္ကိုပ် ဗော်ကောန်ဂကူမန် MNP၊ ဗော်ဒဳမဝ်ကရေဇြဳ အလုံရးမန် AMDP ကေုာံ ခမဳသၚ်မန်တံ ပါလုပ်ရ။

သဘာပတိ နာဲဟံသာ အဃောမြော်ဒၟံၚ်ဂလာန် (ပရိုၚ်ဗော်ဍုၚ်မန်တၟိ)

ပ္ဍဲပေါဲသောၚ်က္လးဏံ ဟိုတ်ဗော်ဍုၚ်မန်တၟိ ဒးထ္ပက်စၟတ်တဲ NCA ဂှ်ကီု၊ ထ္ပက်စၟတ်တဲတုဲ လၟေၚ်ကမၠောန် ဒးဆက်ကၠောန်ဂှ်ကီု ညးစၞးတံ သ္ဂောံတီကေတ်မာန် ပ္တိုန်ထ္ၜးသောၚ်က္လးဏာကီုရ။

ပ္ဍဲပေါဲသဳကၠဳပရေၚ်ဍုၚ်ကွာန် သွက်ဂကူမန် ကၠောန်သ္ပပ္ဍဲဍုၚ်ရေဝ် ပ္ဍဲမေ ပထမသတ္တဟတေံဂှ် သ္ဂောံပ္တိုန်လိက်စံၚ်မာန် ရန်သာ်ဂှ်တုဲ သဳကၠဳအာ ပရူပရာ နကဵုက္ဍိုပ်လိက် ၁-ပရေၚ်ဍုၚ်ကွာန် ၂-ပရေၚ်ပိုန်ဂြပ် ၃-ပရေၚ်မၞိဟ် ၄-ပရေၚ်တိကေုာံပရေၚ်သယံဇာတတံရောၚ်တုဲ သၟာၚ်နူဂှ် ကဏ္ဍပရေၚ်ဂီုကၠီု သ္ဂောံဒှ်အထံက်ကဵု သ္ဘၚ်သဳကၠဳပရေၚ်ၜိုဟ်လလမ်ဍုၚ်တေံဂှ်လေဝ် သဳကၠဳအာကီုရောၚ် သာ်ဝွံဂွံတီလဝ် အတိုၚ်လၟေၚ်အစဳဇန်ရ။

ပေါဲသောၚ်က္လး လၟေၚ်ကမၠောန် NCA ပ္ဍဲဗ္ဒိုပ်ဝါဇြေန် (MNA)

ဗီုဏံကီု ပ္ဍဲဂိတုအေဗရဴ ၉ ဒဵုစိုပ် ၁၁ တုဲကၠုၚ်ဂှ်လေဝ် ကၠောန်ကၠုၚ်လဝ် ပေါဲသောၚ်က္လး လၟေၚ်ကမၠောန် NCA ပ္ဍဲဗ္ဒိုပ်ညဳသာ ဌာနပညာဗဟဵုတေံကီုရ။