ဂကောံဓရီု ဂကောံ NCA-S EAOs (NCA-S EAOs)
သ္ဘၚ်သဳကၠဳပရေၚ်ၜိုဟ်လလမ်ဍုၚ်-ကောံဓရီုပေန်လုၚ် ၂၁ ဗွဝ်ကၠံ အလန်တတိယ ရန်လဝ်သွက်ကၠောန် ပ္ဍဲဂိတုဂျောန် ၃၀ ဂှ် လ္ပာ်ဂကောံရပ်လွဟ် ကောန်ဍုၚ်အရၚ် NCA-S EAOs တံ ဟွံသၟဟ်ရထဏီတုဲ ညံၚ်ဂွံပဆုဲဏာ ဂိတုဂျူလာၚ် ၁၀ တေံဂှ် ထပ်ပ္ညဳကဵုအလဵုအသဳပၠန်ဏောၚ် ညးစၞးကေါန်ဍုၚ်အရၚ်တံ ဟီုရ။
“ကၠောန်ပ္ဍဲဂိတုဂျူလာၚ် ၁၀ တေံမ္ဂး ပြေပြံၚ်မာန်ဏောၚ် ပိုဲတံဖျေံလဝ်သ္ဂုတ်သွာတ်။ ဒှ်သာ်ဂှ်ရ ဒးကလေၚ်ပ္ညဳကဵု အလဵုအသဳပၠန်ဏောၚ်” ခါၚ်သဵုနာၚ်အံၚ် ဒုဥက္ကဌ ALP ဗော်ဗၠးၜးရခေၚ် ဂးရ။
အတိုၚ်လၟေၚ်ကမၠောန်ပရေၚ်ၜိုဟ်လလမ်မ္ဂး ၜိုန်စိုပ်အခိၚ် ဒးကၠောန်ရကီုလေဝ် မူဟိုတ်ဟွံဒှ်ကၠောန် ပေန်လုၚ် ၂၁ ဗွဝ်ကၠံရောမ္ဂး သွက်ဂွံကၠောန် ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူဂှ် ဟိုတ်နူဟွံပြေပြံၚ်ကီု၊ အကြာဒပ်ပၞာန် ကဵု ဂကောံဒိုအ်ပန်ပှော်တံလေဝ် ဟိုတ်နူဆက်နွံဒၟံၚ်ကဵု ပဋိပက္ခကီုတုဲ ဗီုချိၚ်လဝ်ဂှ် ဍေံဟွံဒှ်ကၠုၚ်- သာ်ဝွံ က္ဍိုပ်သ္ကိုပ်ဂကောံရပ်လွဟ် ကောန်ဍုၚ်အရၚ်တံ ဂးရ။
“ညးတံရန်ကြန်လဝ်ဂှ် ဆဵုမံၚ်ရ။ ကလေၚ်ပ္ညဳကဵုပိုဲဏောၚ်။ ဂတဏံ ၜိုတ်မွဲသတ္တဟတှေ် ဆဵုညးသ္ကံဏောၚ် ချိၚ်လဝ်ဗီုဂှ်” သာ်ဝွံ ဥူဇြဝ်ဌေ ညးနွံကဵုအခေါၚ်ဟီုဂး လ္ပာ်အလဵုအသဳ ဂးရ။
ကောံဓရီုပေန်လုၚ် ၂၁ ဗွဝ်ကၠံဂှ် မွဲသၞာံဒးကၠောန် ဗၞတ် ၂ ဝါရောၚ် ဂးလဝ်သာ်ဂှ်ကီုလေဝ် ကၠောန်ဗဒှ်အလန်ဒုတိယ ပ္ဍဲဂိတုမေ သၞာံ ၂၀၁၇ တေံတုဲဂှ် ပဆုဲကၠုၚ်အခိၚ်ဂၠိုၚ်ကဵုဝါတုဲ အတိုၚ်အလဵုအသဳ ကဵုလဝ်အခိၚ် သွက်ဂွံကၠောန် ပ္ဍဲဂိတုမေအိုတ် တုဲကၠုၚ်ဏံဂှ်လေဝ် ကၠောန်ဟွံမာန်ဏီဖိုဟ်တုဲ တၚ်ဆိုအ်ဗတံ နွံဒၟံၚ်ဖိုဟ်ဏီ။
