ဝဏ္ဏမာန်၊ ဖေဖဝ်ဝါရဳ ၁၀၊ ၂၀၂၀

ကောံဓရီုဇၞော်ပရေၚ်ဂကူမန်ဂှ် နူကဵုဗော်မန်ၜါတံပညဳပညပ်ဒၟံၚ် သွက်ဂွံကၠောန်အာ နူကၠာဟွံစိုပ်ကဝက်သၞာံဏံ နွံမံၚ်ရောၚ် ဂွံတီကေတ်ရ။
“နူကဵုညးစၞးဗော်ဍုၚ်မန်တၟိကဵု ညးစၞးဗော်ညဳသၟဟ်မန် ဆဵုဂဗလဝ်တုဲကၠုၚ်ဂှ် ပညဳတုပ်လဝ်စိုတ်ညးသ္ကံသွက်ဂွံ ကၠောန်ဂှ်တှေ် ပ္ဍဲဂိတုမေဂှ် တုပ်လဝ်စိုတ်ညးသ္ကံနွံ၊ ဆဂးတှေ် ညးစၞးတံဂှ်တှေ် ဒးပတိုန်ကဵုဗဟဵု သီုၜါလ္ပာ်တုဲ နူဗော်ညး ဗော်ညး သ္ပဒတန်တုဲမှ ဒှ်ဒတန်ဏောၚ်” သာ်ဝွံ နာဲဗညာလဴ ကမ္မတဳကေၚ်ကာ ဗော်ဍုၚ်မန်တၟိ (ဗွိုၚ်ပ္ဍဲဍုၚ်) ဟီုထ္ၜးရ။
ကောံဓရီုဇၞော်ပရေၚ်ဂကူမန်ဂှ် ရန်လဝ်အကြာ ဂိတုမတ်ဏံ နူကဵုသဘၚ်သဳကၠဳဗော်ဍုၚ်မန်တၟိ ရန်လဝ်တုဲ လ္ပာ် ဗော်ညဳသၟဟ်မန်ဂှ် ရန်လဝ်အကြာ ဂိတုမေတေံ သွက်ဂွံကၠောန်အာဂှ်တုဲ ကာလညးစၞးဗော်ၜါလ္ပာ်ဆဵုဂဗညးသ္ကံ လၟေၚ်တုဲကၠုၚ်ဏံဂှ် သဳကၠဳပညဳလဝ် သွက်ဂွံကၠောန်အာ ပ္ဍဲဂိတုမေတေံရ။
“အဓိက ကောံဓရီုဇၞော်ပရေၚ်ဂကူမန်ဏံတှေ် စပ်ကဵုမူဖေဝ်ဒရေဝ် စၞးဂကူမန် နူကဵုကောံဓရီုဇၞော် ကံပှ်လှ် (၂၀၁၆) တေံ ဖျေံလဝ်နွံမံၚ်၊ မူဖေဝ်ဒရေဝ်ဏံဂှ် ဂကောံဂှ်ချူလဝ်တုဲတှေ် ဂကောံဂှ် ပတိုန်ထ္ၜးရောၚ်၊ အဓိကတၚ်ဇၞော်အိုတ် ဂှ်တှေ် ပရေၚ်ညဳသၟဟ်အလုံကောန်ဂကူပိုဲ ပိုဲဒးချပ်ဏောၚ်၊ ဠဂှ်မှ ပရေၚ်ဍုၚ်ကွာန်ကီု၊ ပရေၚ်လိက်ပတ်ယေန်သၞာၚ် ကီု၊ ပရေၚ်နာနာ ဂွံဖျေံအာသ္ဂုတ်သွာတ်မာန်ဂှ်တှေ် ဂကောံပံၚ်ကောံဂကူမန်မွဲ ဒးနွံထေက်ရောၚ်၊ ပ္ဍဲကောံဓရီုဇၞော် ဂှ်တှေ် ဗီုပြၚ်ဒက်ပတန်ဂှ် ချပ်သဳကၠဳအာဏောၚ်” သာ်ဏံ နာဲဗညာလဴ ဆက်ကလးရ။
ကောံဓရီုဇၞော် ကံပှ်လှ် ကၠောန်ကၠုၚ်လဝ် ကာလ သၞာံ (၂၀၁၆) ဂိတုအဝ်ဂါတ် (၂၃-၂၄) ဂှ်တုဲ စပ်ကဵု သ္ဇိုၚ်မူဖေဝ်ဒရေဝ်ကီု၊ စပ်ကဵုသၞောဝ်သ္ဇိုၚ်ဗီုပြၚ် သ္ဂောံဒက်ပတန်အာ ဂကောံပံၚ်ကောံပရေၚ်ဂကူမန် MAU ဗီုပြၚ် တၟိဂှ်ကီု၊ ဒစဵုဒစး ရုၚ်စက်တိဗုတ် MCL ဂှ်ကီု လးဖျေံလဝ်ရ။
ကောံဓရီုဇၞော်ပရေၚ်ဂကူမန် ရန်လဝ် သွက်ဂွံကၠောန်ဂတဏံဂှ် ဖန်ဇန်လဝ် လိက်စံၚ် ဒုၚ်သ္ဇိုၚ်နူကဵု ဗော်ဍုၚ်မန်တၟိ သဳကၠဳဒၟံၚ် ပရေၚ်ဍုၚ်ကွာန် ဆက်စပ်သဘၚ်သဳကၠဳပေန်လုၚ် (၂၁) ဗွဝ်ကၠံဂှ်တုဲ ကဏ္ဍပရေၚ်ဍုၚ်ကွာန်၊ ကဏ္ဍပရေၚ် ဂီုကၠီု၊ ကဏ္ဍပရေၚ်မၞိဟ်၊ ကဏ္ဍပရေၚ်ပိုန်ဒြပ်၊ ကဏ္ဍပရေၚ်ပွဳပွူသဘာဝ ကေုာံ တိဍာ် (၅) ကဏ္ဍဂှ်တုဲ သွာၚ်ညးကု ညးဂှ် ဖန်ဇန်ချူဒၟံၚ်နွံတုဲ သွက်ဂွံပတိုန်ထ္ၜးသဳကၠဳအာ ပ္ဍဲကောံဓရီုဇၞော်ဂှ်နွံရ။
“သွက်ဂွံပံက်ဂကောံပံၚ်ကောံဂှ် နူကဵုကောံဓရီုဇၞော်တုဲကၠုၚ်တေံ ဖျေံလဝ်နွံမံၚ်၊ ဆေၚ်စပ်ကဵု ဂွံပံက်ဂကောံပံၚ် ကောံပရေၚ်ဂကူမန်လေဝ် ဆေၚ်စပ်ကဵုသၞောဝ်တံလေဝ် ချူလဝ်တုဲရ သွက်ဂွံပတိုန်ထ္ၜးရနွံ၊ နူကဵုဗော်ပိုဲဂှ်တှေ် ဟီု လဝ်သွက်ဂွံကၠောန်အာ ဗွိုၚ်ပ္ဍဲဍုၚ်ဇြပ်ဗု-မတ်မလီု-ဒေသခရိုၚ်သဓီု မွဲမွဲဒၞာဲ ပတိုန်ထ္ၜးလဝ်နွံ ဟွံဒှ်ဒတန်ဏီ” သာ်ဏံ နာဲတၠညး (ကမ္မတဳကေၚ်ကာ) ညးအခေါၚ်ဟီုဂး ဗော်ညဳသၟဟ်မန် (ဗဟဵု) ဟီုရ။
ဂကောံပံၚ်ကောံပရေၚ်ဂကူမန် ကော် Mon Affairs Union – MAU ဂှ် နူကဵုကောံဓရီုဇၞော်ပရေၚ်ဂကူမန် အလန် စတုတ္ထ ကၠောန်ပ္ဍဲကွာန်ဗလးဒုန်ဖါ်ဂှ် ဒုၚ်သ္ဇိုၚ်ညးစၞး ဂကူမန် (၄) (ဗော်ဍုၚ်မန်တၟိ၊ ဂကောံမန်ပ္ဍဲဍုၚ်၊ ဂကောံ မန်ပယျဵု ကေုာံ ဍုၚ်သေံ၊ ဂကောံမန်ဍုၚ်သၟာၚ်) ဗွိုၚ်တုဲ ဒက်ပတန်လဝ် ကမ္မတဳ (၃၂) တၠရ။
ဂကောံပံၚ်ကောံပရေၚ်ဂကူမန် သွက်ဂွံပံက်အာ ဗီုပြၚ် MAU တၟိဏံဂှ် ဒုၚ်သ္ဇိုၚ် ဗွိုၚ်ဗော်ဍုၚ်မန်တၟိ၊ ဗွိုၚ် ဗော်ညဳသၟဟ်မန် ကေုာံ ဗွိုၚ်ဂကောံမဟာဇန် (၃) ဗွိုၚ် ပံၚ်ကောံတုဲ ချပ်ဇန်ပညဳပညပ်လဝ် သွက်ဂွံဒက်ပတန်အာ နွံရ။