သၞံၚ်တိုၚ်၊ ဂိတုဖေဖဝ်ဝါရဳ ၁၄၊ သၞာံ ၂၀၂၀
ပ္ဍဲကဵုပွိုၚ်ဍုၚ်ကျာ်မြဟ် ကွာန်မွဲဂြဝ် အရှာံကျာ်သမ္မာသမ္ဗုဒ္ဓစေတဳ နွံမံၚ်ဇိုၚ်ၜဳကဍတ် သဝ်စှေ်မံၚ်ဂှ် ဟိုတ်နူကဵုက္ၜၚ်ဖ္ဍိုက်ကပေါတ် တိတ်နူကဵုရုၚ်စက် MCL တံရောၚ် ညးဒေသတံ ဟီုဂးမံၚ်အိုတ်ရ။
ရုၚ်စက်တိဗုတ် MCL ဂှ် မွဲတ္ၚဲမ္ဂး ပ္တိတ်မံၚ်တိဗုတ် (တိဗိလာတ်) လျိုၚ် (၅၀၀၀) တာန်တုဲ ဟိုတ်နူကဵုက္ၜၚ်ဖ္ဍိုက်ကပေါတ်ညးတံ အာကၠုၚ်မံၚ် ပ္ဍဲကဵုၜဳကဍတ်ဂှ် သ္ၚိမနွံဇိုၚ်ၜဳတံကဵု အရှာံကျာ်စေတဳဂှ် ကရောန်မံၚ်ကီု သီုကဵုတိသဝ်စှေ်အာဂှ် ဂွံဆဵုကေတ်ကီုရ။
“ဗီုဏံဂှ် နူကဵုသၞာံအာတေံရ စဒှ်ကၠုၚ်လဝ်၊ မွဲဒမြိပ်ၜဳဏံ တိကရောန်တုဲ ထကးကၠုၚ်မံၚ်၊ ပိုဲတံလေဝ် ဒးမံၚ်သီုသတိရ။ တိစလာ်မံၚ်ဂှ်လေဝ် ပိုဲတီမံၚ်ရ။ သၞာံဏံဂှ် ဂၠိုၚ်တိုန်မံၚ်၊ မွဲဂိတုကဵုမွဲဂိတု ညာတ်ကၠးမံၚ်ဟဂှ်ရ” သာ်ဝွံ ရဲကွာန်မွဲဂြဝ် နာဲယှိုဲဝေန် ဂးရ။
စပ်ကဵုကိစ္စဏံတုဲ ပ္ဍဲကဵုဂိတုဂျာန္နဝါရဳ (၂၇) ဂှ် ညးဒေသတံ ပ္တိုန်လဝ်လိက်ဒုၚ်စဳရေၚ် ဇရေၚ်သ္ကိုပ်ဝန်ဇၞော် တွဵုရးဍုၚ်မန်ကဵု ဥက္ကဋ္ဌကၠတ်ထဝ် တွဵုရးဍုၚ်မန်တံတုဲ ဂိတုဖေဖဝ်ဝါရဳ (၂) ဂှ် ညးစၞးကၠတ်ထဝ် ဒဝ်ခေန်မျဵုမျေအ် ကၠုၚ်ရံၚ်လဝ်ကီု ဂိတုဖေဖဝ်ဝါရဳ (၁၃) ဂှ်လေဝ် ညးက္ဍိုက်ပ်ဌာနပရေၚ်သာသနာ ပွိုၚ်ဍုၚ်ကျာ်မြဟ်ကဵု ညးတာလျိုၚ်ရုၚ်စက် MCL တံ ကၠုၚ်ရံၚ်လဝ် ပ္ဍဲကဵုကုန်ကျာ်ဂှ်ကီုရ။
ညးတာလျိုၚ် ရုၚ်စက် MCL တံဂှ် ပ္ဍဲကဵုဂိတုဖေဖဝ်ဝါရဳဖါအိုတ်ဏံ သွက်ဂွံကၠောန်ကဵု ကၟာၚ်စဵုဍာ် (မြေထိန်းနံရံ) မွဲဂှ် ဟီုဂးလဝ်ကဵု ညးဒေသတံရောၚ် နာဲယှိုဲဝေန် ဂးရ။
“ပိုဲအာတ်ၚုဟ်လေဲဂှ် ဟွံသေၚ်ပုဟ်။ ဂွံမၚ်မွဲအာ ကျာ်စေတဳဏံ ဍာ်ဇမၠိၚ်မာန်ကီု ပြၚ်ညံၚ်ဟွံဂွံလာ်ကီုဂှ် ဍေံကၠောန်ကဵု ကၟိုန်ဒၞာဍာ်မွဲဏောၚ်။ ဟိုတ်ဂှ်ရ မာန်နေဂျာ နူကဵု MCL ကၠုၚ်ၜတ်လဝ်တိလေဝ်။ ဍေံတံကၠောန် ကဵုကၟိုန် (ကၟာၚ်) ဒၞာဍာ်မွဲဏောၚ်” သာ်ဝွံ နာဲယှိုဲဝေန် ဟီုရ။
ကျာ်စေတဳဏံသၟးဟွံက သ္ၚိဇိုၚ်ၜဳ မွဲဒမြိပ်ကွာန်ၚာၚ်ကဵု ကွာန်သၞေဟ်ဍုၚ်တံလေဝ် သ္ၚိကရောန်ကီု သုတ်သဝ်စှေ်ကီု ညးဒေသတံ ဟီုရ။
ရုၚ်စက်တိဗုတ် MCL ဏံဂှ် နူကဵုသၞာံ (၂၀၁၃) ဂိတုမေ (၇) ဂှ် ဂွံနၚ်အခေါၚ် နူကဵုကဝ်မယှေန်ဓလိုက်တမ်ရိုဟ် ကၟိန်ဍုၚ်တုဲ ပ္ဍဲသၞာံ (၂၀၁၄) ဂှ် စဓမံက်ကၠုၚ်ရုပ်ရဴဂှ်တုဲ လၟုဟ်ဝွံ မွဲတ္ၚဲမ္ဂး တိဗုတ်လျိုၚ် (၅၀၀၀) တာန် ကၠောန်ပ္တိတ် မံၚ်ရောၚ် ဂွံတီကေတ်ရ။
