ဗညာပိုၚ်၊ ဂျောန် ၁၁၊ ၂၀၂၀
ညးစၞးအလံၚ်အမာတ် ဗော်ညဳသၟဟ်မန် သွက်ဂွံလုပ်ပြိုၚ်ပ္ဍဲပေဲါရုဲမာဲ ၂၀၂၀ ဏံဂှ် ဂိတုဂျူလာၚ် ၃၁ ဏံမ္ဂး ကမ္မတဳရုဲစှ်ဗဟဵုတံ ရုဲစှ်သ္ပဒတန်အာရောၚ်တုဲ ပ္ဍဲအကြာပွိုၚ်ဍုၚ်ဂမၠိုၚ်တံလေဝ် စချဳဓရာၚ်ကၠုၚ် ပရေၚ်ရုဲစှ်ညးစၞး အလံၚ်အမာတ်နွံရ။
ပ္ဍဲပွိုၚ်ဍုၚ်ရေဝ်ဂှ် ကော်လဝ်ကောံဓရီု ဥက္ကဌ ညးအုပ်ကာတံတုဲ သဳကၠဳဒၟံၚ်ကိစ္စ ညးစၞးအလံၚ်အမာတ်တုဲ ချပ်စလဝ် ၃ တၚ်ရဂှ် ဖက်ဆောညးအုပ်ကာ ဗော်ညဳသၟဟ်မန် ပွိုၚ်ဍုၚ်ရေဝ် မိဝၚ်ပ္ကဴ ဟီုသာ်ဝွံရ။
“တၚ်ကၠာအိုတ်ဂှ်တှေ် သဳကၠဳပရေၚ်အလံၚ်အမာတ်ဏံ မွဲတၚ်ပၠန်ဂှ် စရာဲဍာ်ဒကေဝ်ရုဲအလံၚ်အမာတ်တံ မွဲတၚ်ပၠန်ဂှ်တှေ် ပြဟ်ပြဟ်ဏံဂှ် ပိုဲလလောၚ် စနူကဵုပွိုၚ်လၟုဟ်တုဲ စဵုကဵုစိုပ် ဂိတုဂျောန်ဏံအိုတ် ညးစိုတ်မလုပ်စကဵု အလံၚ်အမာတ်ဂှ် ပိုဲဒုၚ်တဲရောၚ်” သာ်ဏံ မိဝၚ်ပ္ကဴ ဂးရ။
ပ္ဍဲပွိုၚ်ဍုၚ်မုဟ်ဍုၚ်လေဝ် စပ်ကဵုပရေၚ်ရုဲစှ် ညးစၞးအလံၚ်အမာတ်ဂှ် အတိုၚ်မူဗဟဵုတံ ဖျေံလဝ်သ္ဂုတ်သွာတ် သ္ဂောံဂွံကော်အာ ကမ္မတဳပွိုၚ်ဍုၚ်တံတုဲ စချဳဓရာၚ် လလောၚ်အာ ပရေၚ်ရုဲစှ်ညးစၞးအလံၚ်အမာတ်ရောၚ်ဂှ် ဖက်ဆောညးအုပ်ကာ ဗော်ညဳသၟဟ်မန် ပွိုၚ်ဍုၚ်မုဟ်ဍုၚ် နာဲဆာန်လၟိုန် (နာဲတေန်ဥု) ဟီုဗီုဏံရ။
“ညးတံဖျေံလဝ် သ္ဂုတ်သွာတ်ဂှ် ဂျူလာၚ် ၁၅ လေဝ် ပိုဲဂ္ဇံကောပ်ကာဲတုဲ ကော်ကမ္မတဳပွိုၚ်ဍုၚ်တုဲတှေ် ပိုဲစလလောၚ်အာ အလံၚ်အမာတ်တံရ။ ပိုဲလလောၚ်ဂှ်တှေ် ညံၚ်ဂွံဒှ်ကောန်ဗော်ဍာံ လုပ်သ္ပအလံၚ်အမာတ် ဂွံအိုတ်ဂှ် စလလောၚ်အာကၠာဏောၚ်။ လ္တူလလောၚ်လဝ်ဂှ် လိက်တၞး (လျှောက်လႊာ) တိုန်ကၠုၚ်ဂှ်တှေ် အတိုၚ်မူဗဟဵုတေံရ ပိုဲဖန်အာ ဗီုဂှ်ရ” သာ်ဏံ နာဲဆာန်လၟိုန် (နာဲတေန်ဥု) ဂးရ။
ပရေၚ်ရုဲစှ်ညးစၞးအလံၚ်အမာတ်ဂှ် ဂိတုဂျူလာၚ် (၁၅) စွံလက္ကရဴအိုတ်တုဲ နူကဵုပွိုၚ်ဍုၚ်ညးကဵုညးတံ ဒးရုဲစှ်ပတိုန်စရၚ်ကဵု ဗဟဵုတုဲ ဂျူလာၚ်အိုတ် (၃၁) ဂှ်မ္ဂး ကမ္မတဳဗဟဵုရုဲစှ်ညးစၞးအလံၚ်အမာတ်တံ သ္ၚဳဂၠိပ်သ္ပ အာဒတန်ရ။
ပ္ဍဲကဵုစရာဲဍာ်ဒကေဝ် ညးစၞးအလံၚ်အမာတ် ဗော်ညဳသၟဟ်မန် ဖအိုတ် (၁၉) တၚ်ဂှ် ဒးဒှ်ကောန်ဗော်ရောၚ်၊ ဒးဒှ်မၞိဟ်မံၚ် ပ္ဍဲပွိုၚ်ဍုၚ်ဒုၚ်ရုဲစှ်ဂှ်ရောၚ်၊ ဒးဒှ်မၞိဟ်တိုပ်သုက် ပ္ဍဲပွိုၚ်ဍုၚ်ဂှ်ရောၚ်၊ ဒးဒှ်မၞိဟ်ကမ္မတဳပွိုၚ်ဍုၚ်တံ ပတိုန်နၚ်ဂလာန်ကုဗဟဵု ဒးဒှ်ရောၚ်တုဲ စပ်ကဵုခၞံဗဒှ် သၞောဝ်ဥပဒေကီု စပ်ကဵုပရေၚ်ပတိုန်ဂလာန်တံဂှ်ကီု စရာဲဍာ်ဒကေဝ် ဒးဍိုက်ပေၚ်ရောၚ် အဓိက (၄) တၚ် ပါလုပ်ဒၟံၚ်ရ။
ပရေၚ်ရုဲစှ်ညးစၞးအလံၚ်အမာတ်ကီု၊ ပရေၚ်မဟာဗျူဟာ သွက်ဂွံဇၞးမာဲနူဗော်ညဳသၟဟ်မန်ကီုဂှ် ပ္ဍဲဂိတုဂျောန် (၇) ဂှ် ကမ္မတဳကေၚ်ကာတံ သ္ပစၞးကောံဓရီု စၞးကမ္မတဳဗဟဵု ပ္ဍဲၝောံခန်ပိုၚ်ခေတ်၊ ဍုၚ်မတ်မလီုတုဲ ဖျေံစၟတ်ပိုၚ်ခြာကၠုၚ်တ္ၚဲ ပရေၚ်ရုဲစှ် သွက်ဂွံသ္ပဒတန် စရၚ်အလံၚ်အမာတ်ဂမၠိုၚ်ရ။
