မၞိဟ်ယဲသ္ပဒတန်ယဲကဝ်ဝေဒ်နာၚ်တဳ တိုန်မံၚ်ရုၚ်ဂဥုဲဍုၚ်မတ်မလီုမွဲတၠဂှ် အကာဲအရာပရေၚ်ထတ်ယုက် ခိုဟ်မံၚ်ရောၚ် ဂွံတီကေတ်ရ။
မၞိဟ်ယဲဏံဂှ် ၜိုန်ရစွံလဝ် ပ္ဍဲကဵုဟဒမ်တၞဟ်ခြာကီုလေဝ် အကာဲအရာပရေၚ်ထတ်ခိုဟ်မံၚ်တုဲ ပ္ဍဲကဵုဂိတုအဝ်ဂါတ် (၉)ဏံ သွက်ဂွံစၟဳစၟတ်အာစၟယဲ အလန်ဒုတိယကီု ပ္ဍဲကဵုဂိတုအဝ်ဂါတ် (၁၁) တေံ သွက်ဂွံစၟဳစၟတ်အာစၟယဲ အလန်တတိယ နွံပၠန်ရောၚ် ညးက္ဍိုက်ပ်ဌာနပရေၚ်ထတ်ယုက်တွဵုရး ဒံက်တာဝေါတ်မှုၚ် ဟီုလဝ်ကဵုသၞံၚ်တိုၚ်ရ။
မၞိဟ်ယဲလၟိဟ် (၃၅၁) ဂှ် စဴကၠုၚ်နူကဵုဍုၚ်မလေဝ်ယှာတုဲ အဃောနွံမံၚ်ပ္ဍဲကဵုဒၞာဲပါ်စွံလဝ် Quarantine Center ဂှ် ဆဵုညာတ်အာစၟယဲဂှ်ရ နူကဵုပွိုၚ်ဍုၚ်လှာဒကှ်ဂှ် ပြံၚ်နၚ်ရုၚ်ဂဥုဲဍုၚ်မတ်မလီုတုဲ လွဳလွတ်ကဵုမံၚ်ရောၚ် ဂွံတီကေတ်ရ။
တုဲကၠုၚ်ဂိတုဇူလာၚ် ၂၉ ဂှ် ဌာနပရေၚ်ထတ်ယုက်ကၟိန်ဍုၚ်တေံ လလောၚ်တြးကၠုၚ်လဝ် မၞိဟ်ယဲတၟိဂှ် မၞိဟ်ယဲဇာတိပွိုၚ်ဍုၚ်လှာဒကှ် ပါလုပ်ကၠုၚ်လဝ်ရ။ ပ္ဍဲကဵုရုၚ်ဂဥုဲမတ်မလီုဂှ် မၞိဟ်ယဲကဝ်ဝေဒ် သီုဖအိုတ် (၆) တၠ ကေတ်လွဳကၠုၚ်လဝ်တုဲ မၞိဟ် (၅) တၠတံဂှ် ယဲဗၠးအးတုဲ ဂွံအခေါၚ်စှ်ေနူကဵုရုၚ်ဂဥုဲအိုတ်ရ။
တုပ်သာ်ဝွံကီု ပ္ဍဲကဵုဂိတုဂျူလာၚ် (၃၀) ဂှ် သ္ပဒတန်လဝ်မၞိဟ်ယဲ (၂) တၠဂှ် ဇာတိပွိုၚ်ဍုၚ်ကျာ်မြဟ် စဴကၠုၚ်နူကဵုမလေဝ်ယှာဂှ် ပါလုပ်မွဲတၠပၠန်ရ။ မၞိဟ်ယဲဏံဂှ် လွဳလွတ်မံၚ်ပ္ဍဲကဵုရုၚ်ဂဥုဲ ဍုၚ်ကအ်သံၚ်ရောၚ် ဂွံတီကေတ်ရ။
အလုံကၟိန်ဍုၚ်ဗၟာဝွံ စဵုကဵုဂိတုအဝ်ဂါတ် (၇) ဏံ မၞိဟ်ယဲသ္ပဒတန် ဒှ်ကၠုၚ် (၃၅၉) တၠတုဲ မၞိဟ်ဗၠးနူကဵုယဲဂှ် (၃၀၈) တၠကီု မၞိဟ်စုတိအာကဵုယဲဏံဂှ် (၆) တၠရောၚ် ဌာနပရေၚ်ထတ်ယုက်ကၟိန်ဍုၚ်လလောၚ်တြးလဝ်ရ။
