သွက်ရာသဳရပ်က သၞာံဂတဏံ နူဌာနက္ဍိုက်က္ဍိုပ်ကမၠောန်ရပ်က တွဵုရးဍုၚ်မန် သ္ဂောံကော်သွံတေန်ဍ Tender ဒၞါဲကမၠောန်ရပ်ကဂှ် ဟိုတ်နူကဵု ယဲကပ်ဏံ ပရေၚ်ပိုန်ဒြပ်ဇီုကပိုက်ဒၟံၚ်တုဲ ညးတၠကမၠောန်ရပ်ကတံဂှ်လေဝ် သ္ဂောံရာန် Tender အောန်ဒၟံၚ်ရောၚ် ဂွံတီကေတ်ရ။
ဂိတုအဝ်ဂါတ် ၁၃ ဂှ် သ္ဂောံသွံလဝ်ဒၞါဲကမၠောန်ရပ်က Tender တၟေၚ် အလန်ဒုတိယဂှ် သ္ဂောံကၠောန်လဝ်တုဲ ဒၞါဲကမၠောန်ရပ်က (၄) ဒၞါဲ သွံတိတ်အာရရောၚ် ဌာနက္ဍိုက်က္ဍိုပ်ကမၠောန်က တွဵုရးဍုၚ်မန် ညးက္ဍိုက်က္ဍိုပ် နာဲအံၚ်တိုဝ် ဟီုရ။
“ဟွံတုပ်ကဵု ဗီုသၞာံကၠာဂှ် ပိုဲတံဂွံဆဵုကေတ်ကိစ္စ ကၠးကၠးဖ္ဍးဖ္ဍးမွဲလေဝ်။ မုဟိုတ်ရောတှ်ေ သၞာံကၠာတေံဂှ်တှ်ေ အလန်ပထမ ပိုဲတံဖျေံဏာဗက်ဂှ် မၞိဟ်ကဵုကၠံလေဝ်ကေတ်မံၚ် မွဲဒၞါဲတှ်ေ မၞိဟ် ၈၊ ၉ တၠ ပြိုၚ်ကေတ်မံၚ်လေဝ်။ လၟုဟ်ဟိုတ်နူ ယဲကပ်ဏံတုဲ ပရေၚ်ပိုန်ဒြပ်လေဝ်ဇီုကပိုက်ကၠုၚ် ၚုဟ်မးရာန်လဝ်သၞာံကၠာတေံဂှ်လေဝ် ကဵုဟွံမာန်ဂှ် ဒှ်ကၠုၚ်ရ” သာ်ဏံ ညးဆက်ဟီုရ။

ဂိတုအဝ်ဂါတ် ၁၁ ဂှ် သ္ဂောံသွံလဝ်ဒၞါဲကမၠောန်ရပ်က Tender တၟေၚ် အလန်ပထမဂှ် သ္ဂောံကၠောန်လဝ်တုဲ ဒၞါဲကမၠောန်ရပ်က (၁၉) ဒၞါဲ သွံတိတ်တုဲ သ္ဂောံဂွံလဝ် အကြာ ၆၀၀ ကိုဋ္ဋ်ကဵု ရ၀၀ ကိုဋ္ဋ်ရရောၚ် ညးဟီုရ။
ညးတၠကမၠောန်ရပ်က နာဲဝေန်အံၚ်ဂှ် “လၟုဟ်အကာဲအရာကမၠောန်ကဂှ် ဗွဝ်ဖျာဟွံမွဲပုဟ်လေဝ်၊ Tender ကၠာတေံဂှ်တှ်ေ စွံအဓိကကဵု က (ၚါးပုတ်သၚ်ၚါး) တုဲတှ်ေ ပိုဲတံရပ်မံၚ်ရ၊ ကတဏံဂှ်တှ်ေ လၟုဟ်ဗွဝ်ဖျာဍုၚ်ကြုက်လီုအာတုဲတှ်ေ ဟွံရာန်ရပုဟ်၊ ကုမ္ပဏဳကအပ္ဍဲဍုၚ်ဂှ် သၞာံကၠာတေံ ရာန်ကတှ်ေ ညးတံပ္တိတ်ကဵု လှဲဒ္စးဒုၚ်ရ လၟုဟ်ဂှ်ဟွံရာန်ရပုဟ်” သာ်ဝွံ ညးဂးရ။
ဟိုတ်နူကဵု အကာဲအရာယဲကပ်ဏံတုဲ ဂိတု ဂျူလာၚ် ၂၁ ဂှ် အလဵုသဳတံ ဟွံကဵုအခေါၚ်ကၠောန်ရာန်တံတုဲ ဒၞါဲကၠောန်လဝ် သၞာံကၠာတေံဂှ် မိက်သ္ဂောံကဵု ပၠုပ်အခေါန် Tender ၃၀ တၟံကၠံဂှ်ရရောၚ် ညးတၠကမၠောန်က (၅) တၠ ပ္တိုန်ထ္ၜးလဝ်ကဵု ဂကောံအလဵုသဳ တွဵုရးဍုၚ်မန် နကဵုလိက်ဒုၚ်ဂုဏ်ရ။
သၟာကမၠောန်ဍာ်တံဂှ် စွံအဓိကရပ်မံၚ် က (ၚါးပုတ်သၚ်ၚါး) တံတုဲ လၟုဟ်ဝွံ ဗွဝ်ဖျာဍုၚ်ကြုက်တံ သ္ဂောံရာန်ဟွံမွဲဂှ်ကီု၊ ကုမ္ပဏဳသွံရာန်ကတံဂှ်လေဝ် ဒေါံဇူလဝ် ရာန်ကတံတုဲ ၚုဟ်မးက (ၚါးပုတ်သၚ်ၚါး) ဂှ် ကၠာတေံ မွဲပိဿာမ္ဂး ၅ ဠက်ဒကေဝ်၊ လၟုဟ်နွံဒၟံၚ် ၜိုတ် ၂ ဠက်ဒကေဝ်ရရောၚ် ဂွံတီကေတ်ရ။
“ပိုဲတံ စွံလဝ်အဓိကကဵု ဗွဝ်ဖျာဍုၚ်ကြုက်တံရလေဝ် လၟုဟ်ဟိုတ်နူ ဗွဝ်ဖျာဍုၚ်ကြုက်တံ ကၟာတ်အာတုဲတှ်ေ က (ၚါးပုတ်သၚ်ၚါး) ဂှ် အပ္ဍဲဍုၚ်ဏံတှ်ေ ကၠောန်ကကဟ်ကဟ်ရဂွံလေဝ်။ ဒၞါဲၚုဟ်မးဂၠိုၚ်မံၚ်တံဂှ် ကၠောန်ဟွံမာန်ရ၊ ပ္ဍဲၜဳအတ္ထရံဂှ် ဒၞါဲၚုဟ်ဂၠိုၚ်ဂှ် နွံမံၚ် ၜိုတ် ၅ ဒၞါဲရ၊ အဵုတဂှ်လေဝ် မွဲလေဝ်ဟွံတိတ်ဏီပုဟ်၊ အကြာ ၁၅၀၀ ကိုဋ္ဋ်ကဵု ၂၀၀၀ ကိုဋ္ဋ်နွံရ” သာ်ဏံ ညးတၠကမၠောန်ရပ်က နာဲတေန်ယှိုဲ ဟီုရ။
အပ္ဍဲတွဵုရးဍုၚ်မန် သ္ဂောံသွံလဝ် Tender ဒၞါဲကမၠောန်ရပ်က ပွိုၚ်ဍုၚ်မတ်မလီုဂှ် (၅၃) ဒၞါဲ၊ ပွိုၚ်ဍုၚ်ပံၚ်ဂှ် (၅) ဒၞါဲ၊ ပွိုၚ်ဍုၚ်မုဟ်ဍုၚ်ဂှ် (၆) ဒၞါဲ၊ ပွိုၚ်ဍုၚ်ၜါသွာၚ်ဂှ် (၁၆) ဒၞါဲ နွံရောၚ် ဂွံတီကေတ်ရ။