ပ္ဍဲကဵုအခိၚ်ကာလလၟုဟ်ဝွံ မၞိဟ်ယဲကဝ်ဝေဒ်ဂၠိုၚ်တိုန်မံၚ်လၟေၚ်တ္ၚဲတုဲ သွက်ဂွံလွဳလွတ်အာ ပ္ဍဲကဵုရုၚ်ဂဥုဲဇၞော် ဍုၚ်မတ်မလီုဂှ် ဒၞာဲဍန်ဂြက်ကၠုၚ်မာန်ဂှ်ရ အလဵုအသဳတွဵုရးဍုၚ်မန် ထပ်ရန်လဝ် ဒၞာဲတၟိပၠန်ရောၚ် ဂွံတီကေတ်ရ။
ပ္ဍဲကဵုရုၚ်ဂဥုဲဇၞော် ဍုၚ်မတ်မလီု ဟဒမ်ပန်ထပ်တၟိ စကာမံၚ်ဒၞာဲလွဳလွတ်ယဲကဝ်ဝေဒ်လၟုဟ်ဝွံ မၞိဟ်ယဲ (၁၀၀) တၠဟေၚ် ဒၟံၚ်ဂွံမံၚ်တုဲ အကာဲအရာလၟုဟ်ဝွံ ဖန်ဖက်ပလေဝ်လဝ်ဒၞာဲတၟိ နွံမံၚ်ရောၚ် ဂကောံအလဵုအသဳတွဵုရးဍုၚ်မန် ဝန်ဇၞော်ပရေၚ်မၞိဟ် ဒံက်တာထုၚ်လေန် လလောၚ်တြးလဝ် ပ္ဍဲကဵုမုက်လိက်ပရေၚ်မၞိဟ်ရ။
ဒၞာဲဟဒမ်သၞာဲဒဴဒၟံၚ် ဌာနက္ဍိုက်ပ်ပရေၚ်ထတ်ယုက် သိုၚ်ခၞံလဝ်တၟိ ဟဒမ်ပန်ထပ်ဂှ်ကီု ဒၞာဲဘာကွတ်ဗ္တောန် လွဳလွတ် (သူနာပြုသၚ်တန်းကျောၚ်း) ကီုဂှ် ထပ်ဗပေၚ်စုတ်လဝ် ကပေါတ်နွံပၟိက်တံတုဲ သွက်ဂွံလွဳလွတ်အာ မၞိဟ်ယဲကဝ်ဝေဒ်တံရောၚ် ဂးရ။
မၞိဟ်ယဲကဝ်ဝေဒ် ဒှ်မံၚ် Positive ကီုလေဝ် ဟွံထ္ၜးလက်သန်ယဲတံဂှ် စွံပ္တန်လွဳပရာအာ ပ္ဍဲကဵုဟဒမ်တၟိဏံတုဲ မၞိဟ်လက်သန်ယဲမံက်တံကဵု မၞိဟ်ဒးလွဳပရာဗွဲတၟေၚ်တံဂှ် လွဳပရာအာ ပ္ဍဲကဵုဟဒမ်ရုၚ်ဂဥုဲဇၞော်တေံရောၚ် ဝန်ဇၞော်ဂှ် ဂးလဝ်ရ။
ပြဟ်ဟ်ဏံ ပ္ဍဲကဵုတွဵုရးဍုၚ်မန်ဂှ် မၞိဟ်ယဲကဝ်ဝေဒ် နွံမံၚ် (၉၅) တၠတုဲ မၞိဟ်ဂွံစှ်ေအာနူကဵုရုၚ်ဂဥုဲ ပ္ဍဲကဵုသတ္တာဟဏံဂှ် နွံမံၚ် (၁၄) တၠရောၚ် ဂွံတီကေတ်ရ။
ဟိုတ်နူကဵုဆဵုဂဗမံၚ်မၞိဟ်ယဲကဝ်ဝေဒ်ဂၠိုၚ်တိုန်ဂှ်ရ ပ္ဍဲကဵုဍုၚ်မတ်မလီု အရာပ်မုပေါန်၊ ကုန်စက္ကာဲ၊ ယှိုဲဒံၚ်၊ ဖေက်တာန်တံကီု ပ္ဍဲကဵုပွိုၚ်ဍုၚ်သဓီု အရာပ်အံက်ကျေန်ကီု ပ္ဍဲကဵုပွိုၚ်ဍုၚ်ၜဳကလေၚ် ရုၚ်စက်တာယာ (သၠာကွဳစက်) လၟိဟ် ၂၂ တံဂှ်လေဝ် ကၟာတ်လဝ်အခေါၚ်အာကၠုၚ်ကီု ဂွံတီကေတ်ရ။
အလုံကၟိန်ဍုၚ်ဝွံ မၞိဟ်ယဲကဝ်ဝေဒ်သ္ပဒတန် (၄၂၉၉) တၠနွံတုဲ မၞိဟ်ချိုတ်အာဂှ် (၆၁) တၠရောၚ်။ မၞိဟ်ဗၠးသက်သာ ဂွံစှ်ေအာနူကဵုရုၚ်ဂဥုဲဂှ် (၉၄၄) တၠတုဲ မွဲတ္ၚဲမ္ဂး (၂၅၀) တၠပြၚ် ကေၚ်ပဵုတိုန်လဝ် နွံကၠုၚ်လဝ်ရောၚ် ဂွံတီကေတ်ရ။
