အခိၚ်ကာလလၟုဟ်ဝွံ ဟိုတ်နူကဵု ယဲကိုဝ်ဝေဒ်လပှ်ဒုတိယဏံ ကၠောံထၞာန်မြက်ကၠုၚ်တုဲ ဂကောံမဟာဇန်ဂမၠိုၚ် CBO, CSO, NGO, INGO တံ ပါဲနူကဵုကမၠောန်ပရေၚ်ထတ်ယုက်တုဲ အပ္ဍဲတိဍာ်သၟဝ်တဲ ဗော်ဍုၚ်မန်တၟိဂှ် ဟွံကဵုအခေါၚ်လုပ်ရရောၚ် ကမ္မတဳစဵုဒၞါထိၚ်ဒဝ်ယဲ Covid-19 ဗော်ဍုၚ်မန်တၟိ (ဗဟဵု)တံ ဂိတုသေပ်တေမ်ဗာ ၁၁ ဂှ် လလောၚ်တြးလဝ်ရရောၚ်။
“ပ္ဍဲတိဍာ်ပိုဲတံဂှ် ဂကောံမဟာဇန် CBO, CSO, NGO တံဂှ်တှ်ေ ကၠုၚ်ရေၚ်တၠုၚ်မံၚ် ကမၠောန်ဖောအ်ဗြေဝ်တံ နွံမံၚ်လေဝ်၊ လၟုဟ်ဂှ်တှ်ေ ယဲဏံလေဝ် ကၠောံထၞာန်မြက်တိုန်မံၚ်တုဲ ကၠုၚ်ကဵုတန်ဗ္တောန်ကီု၊ ပ္ကောံမၞိဟ်ကီုတံဂှ် ဟွံကဵုအခေါၚ်ရပုဟ်” သာ်ဝွံ ဥက္ကဌ မ္မတဳစဵုဒၞါဲထိၚ်ဒဝ်ယဲ Covid 19 ဗော်ဍုၚ်မန်တၟိ (ဗဟဵု) နာဲဗညာလဴ ဟီုရ။
ဆက်စပ်ကဵုထိၚ်ဒဝ်စဵုဒၞါယဲ Covid 19 ဂှ် ကမၠောန်ပရေၚ်ထတ်ယုက်မွဲရရောၚ် သ္ဂောံကဵုလဝ်အခေါၚ်ရရောၚ် ညးဟီုရ။
“အပ္ဍဲတိဍာ်သၟဝ်တဲ ပိုဲဂှ်တှ်ေ မၞိဟ်နူကဵုပိုဲတံ သၟးလေဝ်ဟွံသေၚ် နွံမံၚ်လေဝ်၊ ရဲကၠုၚ်ကၠောန်မံၚ် ကမၠောန်တဵုလွဳ ကၠအ်တံဂှ်လေဝ် နွံမံၚ်တၟာဟလိုၚ်ရ။ ညးတံဂှ် ကၠုၚ်နူဒေသ ဒၞါဲယဲကၠောံထၞာန်ဟွံသေၚ် လိက်ထံက်ဂလာန် သ္ကိုပ်အုပ်ဓုပ်ကွာန် ပါကၠုၚ်မှ ပိုဲတံကဵုတတ်ကၠောံတုဲ သ္ဂောံကဵုအာ ဒၞါဲကၠအ်ညးတံရရောၚ်” သာ်ဏံ နာဲဗညာလဴ ဆက်ဟီုရ။
ပ္ဍဲတိဍာ်သၟဝ်တဲ ဗော်ဍုၚ်မန်တၟိ အပ္ဍဲကွာန်ဂမၠိုၚ်ဂှ် နူဒေသတၞဟ်တၞဟ်တံ သ္ဂောံကၠုၚ်စိုပ်ဇူဒီုအာတံဂှ် ဟွံကဵုအခေါၚ်ရရောၚ် ဂွံတီကေတ်ရ။
အပ္ဍဲတိဍာ်သၟဝ်တဲ ဗော်ဍုၚ်မန်တၟိ ကွဳစက်ဂြိပ်လာၚ်ကီု၊ ကွဳစက်အပိုၚ်တံဂှ် ကပေါတ်ကညောတ်ကဵု ဖ္ဍိုက်မၞိဟ်မ္ဂး လ္တူမၞိဟ် ၅ တၠ ဟွံဂွံပဵုတုဲ ကွဳလိုန်ဓါတ်မွဲဖ္ဍိုက်မ္ဂး သ္ဂောံဍိုက်ဂွံ မၞိဟ် ၂ တၠရရောၚ် ဂွံတီကေတ်ရ။
ပ္ဍဲတိဍာ်သၟဝ်တဲဗော်ဍုၚ်မန်တၟိကဵု တိဍာ်ဆက်စပ်ဂမၠိုၚ်တံဂှ် ဗၟံက်ဍုၚ်ရေဝ် ဒေသကၞောတ်ၜဳရေဝ် အတိုၚ်ဂၠံၚ်ကွဳစက် ဍုၚ်ရေဝ်- ဍုၚ်ကျာ်ပိဂှ် ကြုၚ်လံၚ်၊ ဝါဇြေန်၊ ဖဠာန်ပါၚ်ကြုၚ်၊ ဂနဳ၊ ချေံဍာ်၊ စဵုစိုပ်ပယျဵုသေံတံကီုတုဲ ပ္ဍဲရးတနၚ်သြဳ ပွိုၚ်ဍုၚ်ဍာ်ဗု ဗၟံက်ဂၠံၚ်ကွဳစက် ရေဝ်- ထဝါဲ ပ္ဍဲဒပ်ခရိုၚ်ထဝါဲတံကီုဂှ် ညးနူဒေသတၞဟ်တၞဟ်တံ သ္ဂောံကၠုၚ်ကၠောန်ဒၟံၚ် ကမၠောန်တဵုလွဳကၠအ်တံရရောၚ် ဂွံတီကေတ်ရ။
ပ္ဍဲဗဒိုပ်ဒပ်ဗော်ဍုၚ်မန်တၟိ တွဵုရးကရေၚ် ဒေသကျာ်ပိဂှ် ကွာန်ပလိုၚ်ဂျပါန်၊ ကွာန်ဗလးဒုန်ဖါ်၊ ကွာန်ကလေၚ်စဴ၊ ပွိုၚ်ဍုၚ်လှာဒကှ် ကရပ်ကွာန်ကွိက်ခွိ၊ ဌာနခရိုၚ်မတ်မလီုကီု၊ ပွိုၚ်ဍုၚ်ကအ်ကြိက် ဒၞါဲဌာနခရိုၚ်သဓီု ကအ်ဗိန်- ကအ်ကြိက်ဂှ် အတိုၚ်စေဝ်ပၞောန် ကမ္မတဳပရေၚ်စဵုဒၞါထိၚ်ဒဝ်ယဲ Covid-19 ဗော်ဍုၚ်မန်တၟိတံ သ္ဂောံကၠောန်ထ္ၜးဒၟံၚ်ရုပ်ရဴရရောၚ် ဂွံတီကေတ်ရ။
