သာၚ်ထောန်သာန် (မတ်မလီု၊ ဂိတုသေပ်တေမ်ဗာ ၈)
အပ္ဍဲတ္ၚဲအကြာတံဏံဝွံ ဟိုတ်နူမၞိဟ်ဒှ်ယဲကိုဝ်ဝေဒ်ဂၠိုၚ်ကၠုၚ်ဂှ်ရ အပ္ဍဲတွဵုရးဍုၚ်မန် ကွဳစက် (ယာဉ်) ဓရိပ် (ဂြိပ်) လာၚ်လ္ၚဵု ဒေံါဇူကီု ကေုာံ ဖအောန်ဖျေံ ပရေၚ်ဓရိပ် (ဂြိပ်) အာကၠုၚ်ကီုနွံရောၚ် ဂွံတီကေတ် နူကဵုကမ္မတဳထိၚ်ဒဝ်ကောပ်ကာဲ ကမၠောန်ကွဳစက် (ယာဉ်) တွဵုရးရ။
ကွဳစက်လာၚ်ဖ္ဍိုက်မၞိဟ် သဵုယျတနာ (စိုးရတနာ) မဓရိပ်မံၚ် နူဍုၚ်မတ်မလီု – ပွိုၚ်ဍုၚ်ကျာ်ထဝ်ဂှ်ဝွံ သွက်ဂွံဒေံါဇူ မွဲချိုန်ခဏဂှ် ပ္တိုန်ထ္ၜးလဝ်ရောၚ် ဥက္ကဌကမ္မတဳထိၚ်ဒဝ်ကောပ်ကာဲ ကမၠောန်ကွဳစက် (ယာဉ်) တွဵုရးဍုၚ်မန် ဥုကျဝ်ဝေန်မာၚ် ဟီုရ။
“လၟုဟ် ပြဟ်ဟ်ဏံ ဒေံါဏောၚ် ပ္တိုန်ထ္ၜးလဝ်ဂှ်တှေ် (စိုးရတနာ) မဓရိပ်မံၚ်လာၚ် ကျာ်ထဝ်ကဵု ဍုၚ်မတ်မလီု မွဲလာၚ်ဂှ်ဟေၚ် ဒေံါဇူလဝ်နွံရ။ လာၚ်သှေ်မံၚ်ဖအိုတ်တံဂှ် ဓရိပ် (ဂြိပ်) မံၚ် အတိုၚ်ဗီုတြေံဟေၚ်ရ။ ဆဂး ဖအောန်လၟိဟ်ကွဳစက်(ယာဉ်)တုဲ ဂြိပ်မံၚ်၊ ဟိုတ်နူညးအာတရဴအောန်” သာ်ဝွံ ဥုကျဝ်ဝေန်မာၚ် ဂးရ။
ပ္ဍဲကဵုဒၞာဲဒဒန်ကၠောံၜဳထပၠၚ် (ဂျိုၚ်းတံတား) တွဵုရးကရေၚ် – မန်ဂှ်ဝွံ ပ္ဍဲဂိတုသေပ်တေမ်ဗာ (၂) ဂှ် စကၠောန်သ္ပ စၟဳစၟတ်ကၠုၚ် ပရေၚ်ထိၚ်ဒဝ်စဵုဒၞာ ယဲကိုဝ်ဒေဝ် (၁၉) ဂှ်ရ ကွဳစက်(ယာဉ်)လာၚ်လ္ၚဵု မဓရိပ်မံၚ် ဍုၚ်မတ်မလီု – ဘာအၚ်ဂှ်လေဝ် ဒေံါဇူလဝ်ရ။
သွက်ဂွံပ္ကောံပ္ကေဝ် တၚ်နၚ်စၟတ်သမ္တီ ကေုာံ ဝၚ်ညးအာတရဴ လ္တူကွဳစက်(ယာဉ်)တံမာန်ဂှ် ကၠောန်သ္ပရေၚ်တၠုၚ်ကၠုၚ် ဗွဲတၟေၚ်ဂှ်ရ ပရေၚ်အာတရဴ အောန်စှေ်ကၠုၚ်ရောၚ် ဂွံတီ ကေတ်ရ။
“ဂကောံအလဵုအသဳ တွဵုရးဍုၚ်မန်တံဝွံ သွက်ဂွံစဵုဒၞာ ယဲကိုဝ်ဝေဒ်ဏံဂှ်တှေ် ဒၞာဲခုၚ်ဂဇံၜါခုၚ်ဂှ် မၞိဟ်အာတရဴမွဲတၠဟေၚ် သွက်ဂွံဂဇံဂှ် ကဵုလဝ်စၞောန်တုဲ သွက်ဂွံဒ္ဂေတ်ဗက် တၚ်စၞောန်တံဂှ်လေဝ် ဗက်ကောပ်ကာဲမံၚ်ရ” သာ်ဝွံ ညးဆက်ဟီုလဝ်ရ။
အရာတာဒၞာဗၞတ်ဗ္ၜတ် ပရေၚ်အာကၠုၚ် နွံကၠုၚ်ဂှ်ရ ပရေၚ်ဆက်စၠောံဂၠံၚ်ဍာန် ကေုာံ ပရေၚ်ဇၟောဝ်ဗၞိက် (ကုန်စည်စီးဆၚ်းမှု) ပိုတ်သ္ကုတ်အာမ္ဂး သာတုဲ အခက်ခုဲ နွံဂၠိုၚ်ကၠုၚ်မာန်ရောၚ် ညးဂးရ။
ကွဳစက်(ယာဉ်)လာၚ် မဓရိပ် (ဂြိပ်) မံၚ် (နူတွဵုရးဍုၚ်မန် – ဇရေၚ်ဒေသတၞဟ်ဂမၠိုၚ်) ကေုာံ ကွဳစက်(ယာဉ်)လာၚ် မဓရိပ်မံၚ် အပ္ဍဲတွဵုရးကီု သီုဖအိုတ် နွံ (၇၃) လာၚ်ရ။ အခိၚ်ယဲကိုဝ်ဝေဒ် စက္တဵုဒှ် ပ္ဍဲဂိတုမာတ်တုဲကၠုၚ်တေံဂှ် ဒေံါဇူလဝ် မွဲချိုန်ခဏတုဲ အခိၚ်အတးသၚ်္ကြာန်လောန်ဂှ်မှ က္လေၚ်ဓရိပ်လဝ်ရောၚ် ဂွံတီကေတ်ရ။
