ပ္ဍဲကဵုတွဵုရးဍုၚ်မန် ဍုၚ်မတ်မလီုဂှ် အလဵုအသဳတံ စၟတ်သမ္တီလဝ် ဒးဒၟံၚ်အပ္ဍဲသ္ၚိ Stay Home ကီုလေဝ် ညးပူဗိုၚ်ဗော် NLD တံ ပ္ဍဲကဵုဂိတုအံက်တဝ်ဗာ ၁၈ ဂှ် ထ္ၜးလဝ်ဇြဟတ်မၞိဟ်ဗွဲမဂၠိုၚ် နကဵုကွဳစက်၊ ကွဳလိုန်ဓာတ်ဂှ် ဂေတ်လဝ် ပ္ဍဲကဵုဍုၚ်မတ်မလီုရ။
“ကိစ္စဏံဂှ် အစဳဇန်နကဵုဗော်ဟွံသေၚ်ပုဟ်။ ညးဍုၚ်ကွာန်တံ ညးတံကၠောန်စကေတ်တ်ရ။ နကဵုဗော်လေဝ် စဳဇန်လဝ်ဟွံမွဲပုဟ်၊ ပတိတ်လိက် လၟေၚ်မေတ္တာလေဝ် နွံမံၚ်ရ။ ကောန်ဗော်တံကီု ဂကောံအံၚ်ဇၞးတံကီု ညံၚ်ဟွံဂွံဂေတ်ဂှ် ပ္တိတ်လဝ်အမိၚ်နွံမံၚ်ဟတုဲရ။ ဒှ်မံၚ်အခိၚ်ကာလ Stay Home ဏောၚ်” သာ်ဝွံ ဥက္ကဋ္ဌ ဗော် NLD တွဵုရးဍုၚ်မန် ဒဝ်နဲနဲအံၚ် ဟီုရ။
ပွိုၚ်ဍုၚ်မတ်မလီုကဵု ပွိုၚ်ဍုၚ်ၜဳကလေၚ်ဂှ် နူကဵုဂိတုသေပ်တေမ်ဗာ ၂၅ တေံ အလဵုအသဳကၟိန်ဍုၚ် ဌာနဝန်ဇၞော်ပရေၚ်ထတ်ယုက်တံ ပတိတ်လဝ်အစဳဇန် Stay Home ရ။
“ပြဟ်ဟ်ဏံ နကဵုဌာနပိုဲဂှ် ရေၚ်တၠုၚ်လဝ်တၞဟ်ခြာဂှ် ဟွံမွဲပုဟ်။ နကဵုဌာနဝန်ဇၞော်ပရေၚ်ထတ်ယုက်ကဵု ပရေၚ်ဝေၚ်ဇြဟတ်တံ ပ္တိတ်လဝ်လိက်နွံမံၚ်ရ။ နကဵုကဝ်မယှေန်ပေဲါရုဲမာဲလေဝ် ညးစန်ဒက်မာဲတံ ဂွံဒ္ဂေတ်ဗက် ပ္တိတ်လဝ်စၞောန်တုဲမံၚ်ရ။ နကဵုညးတံကေတ်ကၠုၚ်အဆက်၊ နွံပၟိက်တုဲစၞောန်နၚ်တှ်ေ သွက်ဂွံရေၚ်တၠုၚ်ကဵုအာနွံဏောၚ်” သာ်ဝွံ သ္ကိုပ်စၞောန်ပ္ညုၚ် ဌာနအုပ်ဓုပ်ပွိုၚ်ဍုၚ်မတ်လီု ဥုဝေလေန်ထောန် ဟီုရ။
နကဵုကဝ်မယှေန်ပေဲါရုဲမာဲကၟိန်ဍုၚ်တေံဂှ် ပ္ဍဲကဵုအခိၚ်ကာလယဲကဝ်ဝေဒ် ကတဵုဒှ်မံၚ်ဏံ ပွိုၚ်ဍုၚ် စၟတ်သမ္တီလဝ် Stay Home တံကဵု ပွိုၚ်ဍုၚ်ဖျေံလဝ် Lockdown တံ လ္ပစန်ဒက်ဂြဲမာဲညိဂှ် ပ္တိတ်လဝ်လိက်စၞောန်နွံမံၚ်ကီုရ။
“အဆံၚ်ကဝ်မယှေန်ကၟိန်ဍုၚ်တေံ ကဵုလဝ်လိက်စၞောန်နွံမံၚ်ရ။ ဗော်နွံမံၚ်သၟဝ်တံဂှ်လေဝ် ညံၚ်ဂွံဒ္ဂေတ်ဗက်အာ အတိုၚ်ဏံဂှ် ကဵုလဝ်စၞောန်ရ။ ညးပူဗိုၚ်တံဏောၚ် ကၠောန်ဏာတှ်ေ ပိုဲတံဂှ် အခေါၚ်ကၟာတ်လဒဵု ဟွံမွဲပုဟ်။ ဆက်စၠောံကဵုဗော်တံတုဲ အတိုၚ်စၞောန်လဝ်တံဂှ် ရေၚ်တၠုၚ်ကဵုမံၚ်ဖိုဟ်ရ” သာ်ဝွံ ဥက္ကဋ္ဌ ကဝ်မယှေန်ပေဲါရုဲမာဲ ပွိုၚ်ဍုၚ်မတ်မလီု ဥုဌေလွေန် ဟီုရ။
ပ္ဍဲကဵုတွဵုရးဍုၚ်မန် မၞိဟ်ယဲကဝ်ဝေဒ် မံက်ဂၠိုၚ်အိုတ် စဵုကဵု (၆၉) တၠတုဲ တ္ၚဲယးဂှ်ဟေၚ် ညးပူဗိုၚ်ဗော် NLD တံ ထ္ၜးလဝ်ဇြဟတ် ဂေတ်လဝ်ဍုၚ်မတ်မလီုရောၚ် ဂွံတီကေတ်ရ။
